Read bura-pabir 2 Kuthlyayeri 3 Bible Online

2 Kuthlyayeri 3 - bura-pabir bible

2 Kuthlyayeri 3

¹Akwa məva na kumnya nciskur ka ləkwa kuthlikur ar Yehoshafat na kuthlir Yahuda, antə Yoram na ɓzər Ahab ku ndzi kuthlir Israila. Antə Yoram ku hara kuthlikur akwa Samariya ar məva kumnya suɗa.

²Tsa ku hara su na ɗimi aka MTHLAKU, wala tə ɗimikurərni aɗi mzhita ar baba'ni wala Yezebel na mama'ni wa. Kamnyar tsa ku pukthləmta Baal natə baba'ni ku namtə ka vəngkər səli akari.

³Amma wala apani tsa ku ləkəma ka hara biku natə Yerobowam na ɓzər Nebat ku vu Israila akwa hara ri.

⁴Mowab ku fəi akira kuthlikur Israila antə tsa ana ntə tsəma aka kuthlyayeri ar Israila. Mesha na kuthlir Mowab ana vəi təma. Antə tsa ana hamta aka kuthlir Israila maɗa' təma dəpu aru, ka ulu ar gamayeri dəpu aru.

⁵Amma sakatə Ahab ku mti, antə kuthlir Mowab ku nggəlar ta kələngkər aka kuthlir Israila.

⁶Antə vir laga Kuthli Yoram ləɓəla kazhar kuta Samariya ka tsaptə shanga sojayeri ar Israila.

⁷Antə tsa ku thlentə ndər aka Yehoshafat na kuthlir Yahuda abbər, “Kuthlir Mowab ku zhar ta kələngkər ali. Ga ata hir dlar ra ka mwa ra dlər ni ya?” Antə Yehoshafat shinau alari abbər, “I ɗəmhəɗəmhari kəlara sakatə ga ku ɗəmhədzi, tsuwa sojayeri arna ka takwayeri arna ɗəmhəɗəmhari akwa səka nga.”

⁸Antə Yehoshafat pəla abbər, “Mwa ata nu laku madə ri?” Antə Yoram shinau abbər, “Mwa ata nu lakur mtakər Edom.”

⁹Apani antə Kuthli Yoram, ka Yehoshafat na kuthlir Yahuda, ka kuthlir Edom kəga sojayeri arɗa shang ku paktədzi ka ləkwa mwari. Aghəla tə da ku mwa ka kalaktə vəi ni ar vir murfa, antə yimi ku kuri aka sojayeri ka mwaɓiyayeri na adzə ɗa.

¹⁰Antə kuthlir Israila pəla, “Kara teddarna! MTHLAKU kəgaɓəla mburu makər ni kamnyar ka mjir Mowab sə nggyari mburu ya?”

¹¹Antə Yehoshafat yu su abbər, “Naɓiyir MTHLAKU aɗi azi wa ya tə mburu mzhi nggaɓəla su akəla MTHLAKU atar ni?” Tə pal akwa nca kwakunayeri ar kuthlir Israila shinau abbər, “Elisha na ɓzər Shafat aɗi azi, tsa ku ndzi mdər dlar Iliya.”

¹²Antə Yehoshafat pəla, “Ai MTHLAKU ata pəla ala mburu su atar ni.” Apani antə kuthlir Israila ka Yehoshafat ka kuthlir Edom ku təra mwari adzə Elisha.

¹³Antə Elisha pəla aka kuthlir Israila abbər, “Kamnyar mi tə gə si adzə ra ri? Mwar giri, adzə naɓiyayeri ar baba' nga ka mama' nga.” Amma Kuthli Yoram pəla alari, “Awa, su na hara an MTHLAKU ku kəgaɓəla yeru kuthlyayeri na makər ni kamnyar ka mjir Mowab ngkəi yeru.”

¹⁴Antə Elisha pəla, “I kahyel akwa thləma MTHLAKU na ka mpika abbər ma kamnyar səliyir Yehoshafat na kuthlir Yahuda wa, I aɗi ata wul nga, wala ngga ngə wa.

¹⁵Amma kulini səntə giri ali mdər tsa yakandi.” Sakatə mdə ni ku si ka baɗitə tsa yakandi ni, antə dunar MTHLAKU ku si ata kəra Elisha.

¹⁶Antə tsa pəla, “Nggədza su tə MTHLAKU pəla, ‘Ka giri msəmta kur yimi akwa shanga kuta zərkəu na ul'ula ni.

¹⁷Giri aɗi ata wutə shambar wala yimərhyel wa, amma kuta zərkəu ni ata sə nghyantədzi ka yimi. Antə giri kəga mwaɓiyayeri ar giri ata sə sari.’

¹⁸Ngəni an su na kasəla aka MTHLAKU. Tsuwa giri ata sə nggyari mjir Mowab.

¹⁹Giri ata səm shanga bərniyayeri arɗa na akwa katangga, ka na ɓɗakɓɗaku. Giri ata nthləgəmta shanga nfwayeri na ɓɗakɓɗaku, ka dzəɓta shanga kucirkilayeri, ka nghyantə shanga fakayeri arɗa na ata ya su ka pela.”

²⁰Səɓəla ɗəpari ata sakar hamta saɗaka, təng yimi wutədzi abwar Edom akwa hwi si, har ka hartə di.

²¹Akwa saka ngəni shanga mjir Mowab ku nggata abbər kuthlyayeri na makər ni ku səɓəla kamnyar mpa ɗa. Antə shanga mji na amzhi kəsi kariyir mpa, baɗitə ka maɗankyar ka mwanta aka mji na ol'ola mdə ku kəgaɓəla ɗa ka ntəhəmta ɗa ata kəla tsəɗi.

²²Sakatə da ku thlatə ɗəɗəpə mbing, pci akwa mbəla ata kəra yimi, antə mjir Mowab ku wutə yimi na akəma ɗa ni mamza pitu apa mamshi.

²³Antə da pəla, “Ngəni mamshi diya! Ai sakani kuthlyayeri ni an mpa ka kər ɗa, ka tsəgəidzi. Antə mbura mwara fatə kariyir ɗa!”

²⁴Amma sakatə da ku si akwa vəi tə mjir Israila ku fəli akwa, antə mjir Israila ku səɓəla ka mpa mjir Mowab, tar tə mjir Mowab ni ku shinardzi ka hwi. Antə mjir Israila ku nu ɗa ba akwa diyir ɗa akwa tsəgəi ɗa.

²⁵Antə da kuri ka bərniyayeri ar Mowab. Da ndzəndzəhəuwa pela akwa shanga fakayeri na ɓɗakɓɗaku, ka nghyantə ɗa ka pela. Da dzədzəɓta shanga kucirkilayeri ka nthləgəmta shanga nfwayeri na ɓɗakɓɗaku. Akwa tsikərari təng Kir Hareseth an mbila, amma sojayeri ka mavinding ku kalaktə ni ka səm ni.

²⁶Sakatə Mesha na kuthlir Mowab ku wuta abbər mpa ni akwa mula alari antə tsa fatə mjir katsakar aru murfa ka da puvidzi təbwar kuthlir Edom. Amma da aɗi mzhi wa.

²⁷Antə tsa kətə ɓzərni na olta shang na ata sə kətə vəi ndzəndziyirni ka hamta ni saɗaka mbamba ata kəra katangga. Antə mjir Israila ku yakatə ka duna ka ngka akwa tsəɗiyir ɗa.