Read bura-pabir 2 Kuthlyayeri 4 Bible Online

2 Kuthlyayeri 4 - bura-pabir bible

2 Kuthlyayeri 4

¹Vir laga mwalar pal akwa nca maɗa' makarantər naɓikur ku si ka tuwa aka Elisha. Tsa pəla, “Zanuwa salngkəya ku mti. Antə ga asənda abbər tsa mdər thlivər ɗəffa MTHLAKU. Amma mdə na akwa nu ni təmbəl ku si ka tsa fatə maɗankyarərna na suɗə ni ka da ndzi mafayeri arni.”

²Antə Elisha pəla, “Man su tə I ata mzhi dlar nga akwa ri? Pəla ali su na aɗi akwa kutambwar nga.” Antə tsa pəla, “I aɗi ka su wa, təng mal kwalɓa pal daci.”

³Antə Elisha pəla alari, “Mwari kara təpata kwalɓayeri na kula su akwa hang apatə ga amzhi akəla ntəwulayeri ar nga.

⁴Aghəla tə ga ku təpatə ɗa ka gə ləvəi ka da, ka giri ləmbwa kəga maɗa' nga ka hartə nyarmbwa ata kəra giri. Ka gə pu mal akwa shanga kwalɓayeri ni, ma kwalɓa pal ku nghyi ka gə vəi ni athlimbəli.”

⁵Apani antə mwala ni ku zhar Elisha ka təra, ka hara apatə tsa ku pəla alari. Da ku ləmbwa kəga maɗa'ni, antə tsa ku hartə nyarmbwa ata kəra ɗa. Antə ma tsa ku pu mal akwa kwalɓa ni, maɗa'ni ata hamta alari kwalɓa damwa.

⁶Sakatə shanga kwalɓayeri ni ku nghyi, antə mwala ni pəla aka pal akwa nca maɗa'ni, “Səntə ali kwalɓa damwa.” Antə ɓzər ni pəla alari, “Aɗi mbili kəra wa.” Apani antə mal ni ku thləthlata.

⁷Sakatə mwala ni ngka ka jikata aka Elisha su na ku hara, Elisha pəla alari abbər, “Mwari, kara ɗələmta mal ni kara ntəmta təmbəlayeri na ata kəra ga kəgari. Antə su na ku mbili akwa kuta kwaba ni ga ka maɗa' nga ata mzhi kəthlər kəgari.”

⁸Vir laga Elisha ku mwari akwa di laga ka thləmari Shunem, vəi tə mwala laga na ka gəna ka ndzi anda. Mwala ni ku kəga ni ka tsa səm susəma. Antə baɗitə ka vir nda, kəlara sakatə tsa mwari ahar Shunem tsa ana pəra ka səm susəma aharngkiɗa.

⁹Antə tsa pəla aka salngkiɗa abbər, “I ku mbərsa mdə na ana pəra azi tədəku ni tsa an mdər Hyel.

¹⁰Ndzi ka mwa həntə mbwa laga raka, ka pu alari dəkəl, ka tebər, ka kujara, ka pitəla. Antə kəlara sakatə tsa si, tsa ata mzhi ndzəndzi akwa.”

¹¹Vir laga tə Elisha jaktə ngka ahar Shunem, tsa pəra akwa kəi ni ka ləkwa mbwa ni ka tsa ghərəmtaghəra.

¹²Antə tsa pəla aka Gehazi na buɗarni, “Mwala ngəni ku dlar mwa ka duna. Ndəra alari bu ka tsa si ka yeru kəɓa raka.” Sakatə tsa ku mwari ka kəga ni, antə mwala ni ku si ka thləthlata akəmari. Antə Elisha pəla ka Gehazi pəla aka mwala ni abbər, “Ga ku ghəra ala yeru ka duna, man su tə ka yeru hara ala gə ri? Su laga aɗi natə yeru amzhi kiɗari ala ga akəla kuthli wala olər sojayeri ya?” Amma mwala ni pəla, “Awa, apatə I adzə yangkuri, I ka shanga su tə I ata turari.”

¹³

¹⁴Aghəla nda antə Elisha yu Gehazi abbər, “Ka ma apani man su tə mwa mzhi dlar ni akwa ri?” Gehazi shinau abbər, “To, tsa aɗi ka ɓzər wa, tsuwa salngkiɗa ku hali.”

¹⁵Elisha pəla, “Kəga ni.” Sakatə tsa ku kəga ni, antə mwala ni ku si ka thləthlata akwa nyarmbwa.

¹⁶Elisha pəla alari, “Apta saka pani ga ata kəsi ɓzər sal akwa humba ga.” Amma mwala ni shinau abbər, “Awa, ga an mdər Hyel, antə ga aɗiya pwaktə ra wa.”

¹⁷Amma mwala ni ku kətə hur ka ya ɓzər sal, tsu kalkal apa sakatə Elisha ku pəla alari ni.

¹⁸Sakatə ɓzəngkyar ni ku kəli antə vir laga tsa ku ləɓəla ka mwari adzə baba'ni akwa nca mji na akwa ɗəmha alari sur faku.

¹⁹Antə tsa hara kuraku ka pəla aka baba'ni, “Ai, kərai! Ai kərai!” Antə baba'ni pəla aka buɗarni, “Mwantə ni aka mama'ni.”

²⁰Sakatə buɗarni ku mwantə ni aka mama'ni, antə ɓzəngkyar ni ku ndzəndzi akwa humba mama'ni har kərathlər pci, antə ɓzər ni ku mti.

²¹Antə mwala ni mwantə ɓzəngkyar ni ambwar Elisha, ka peri ni ata dəkələrni, ka ləɓəla ka hartə nyarmbwa ata kəra ɓzəngkyar ni ka təra.

²²Antə mwala ni thlenta aka salngkiɗa, ka pəla, “Kara thlenta ali pal akwa nca buɗayeri ka kwara pal, kamnyar kəi təra mwari taktar adzə mdər Hyel ni, kəi ngka kulini.”

²³Antə salngkiɗa pəla, “Kamnyar mi tə ga ata mwari adzə ni ashina ri? Ashina aɗi an thlatər thliya bilən wala Vir Ghərəmtaghəra wa.” Antə mwala ni pəla, “Aɗi su na mwavər wa.”

²⁴Antə mwala ni ku vətə sərɗu ata kwara ni, ka pəla aka buɗarni, “Kədla kwara ni ka mwa təra taktar! Ga aɗiya ntsar səl wa, tar ma I an pəla ala ga.”

²⁵Antə tsa ku tərkwa laku, ka mwari adzə Elisha ni ata Gar Karmel. Sakatə Elisha ni ku wutə ni akwa si, antə tsa pəla aka buɗarni Gehazi, “Ndaga mwala Shunem akwa si!

²⁶Mwa taktar ka giri kəɓa, kara yu lapiyakurərni, ar salngkiɗa, ka lapiyakur ɓzərni. Sakatə Gehazi ku yu ni, antə mwala ni shinau abbər, ‘Shanga yeru lapiya.’ ”

²⁷Sakatə mwala ni ku lətə gar ni antə tsa mwari adzə Elisha ni ka zuzuri ka tamtə səlari. Antə Gehazi ku bara ka tsa tərar mwala ni. Amma Elisha pəla alari, “Zhar ni, kamnyar ɗəffari ɓzəɓzari ka duna. Amma MTHLAKU aɗi pəla ali su na hara wa.”

²⁸Antə mwala ni pəla, “I ku yu nga MTHLAKU kamnyar ɓzər ya? Nənga, I aɗi pəla ala ga abbər, Ga aɗiya vət ɗəffu ali wa ri?”

²⁹Antə Elisha pəla aka Gehazi, “Ɗəmhədzi kara kətə zwalərna, kara təra ləharngkiɗa. Kəlara mda tə giri ku kəɓa, ga aɗiya thlawar ni wa. Tsuwa kəlara mdə na ku thlawar nga, ga aɗiya shinau alari wa. Ma ga ku mzhitə kara peri zwal ni ata kəma ɓzər ni.”

³⁰Amma mama' ɓzər ni pəla, “I kahyel akwa thləma MTHLAKU na ka mpika, ka apatə gə ka mpika, I aɗi ata zhar vəi ni kula gə wa.” Antə Elisha ku thlata, tə da ku təra ata kəma duku.

³¹Gehazi ku təramta akəma ka peri zwal ni ata kəma ɓzər ni, amma wala seɗar mpika aɗi ata dzari wa. Antə Gehazi ku ngka adzə Elisha ka pəla alari, “Ɓzər ni aɗi thlatə wa.”

³²Sakatə Elisha ku si akwa kəi ni, tsa wutə ɓzər ni apəpəi mtəmtari ata dəkələrni.

³³Antə tsa ləmbwa adzə ni ka hartə nyarmbwa, ka hara adduwa aka MTHLAKU.

³⁴Antə tsa lətə vəipi ni ka pəpəi ka ndərangkərdzi ata kəra ɓzər ni, ka mbungkər mnyari ata mnya ɓzər ni, ka ncari ata nca ɓzər ni, ka tsiyari ata kəra tsiya ɓzər ni. Antə dza ɓzər ni ku hara gərgər.

³⁵Antə Elisha thlatə ka ləkwa mwa ka ngka akwa kutambwa ni, ka jaktə ngka, ka perəngkərdzi ata kəra ɓzər ni. Antə ɓzər ni ku wacihəi ka murfa ka kəlar ncari.

³⁶Antə tsa kəga Gehazi ka pəla, “Ndəra aka mama' ɓzərni ka tsa si.” Antə tsa ku ndəra alari. Sakatə mwala ni ku si, antə Elisha pəla alari, “Sə kətə ɓzər nga!”

³⁷Antə mwala ni ku si ka zuzuri ka dləri kəmari ata di adzə səla Elisha, ka kətə ɓzərni ni ka ləɓəla.

³⁸Aghəla nda antə Elisha ku mwari ahar Gilgal ka damwa akwa sakatə məi ku təri akwa tsəɗi nda. Vir laga sakatə maɗa' makarantər naɓikur andzəndzi akəmari tsa pəla aka buɗarni, “Vəta tughum na ola ata u'u kara ti səkwar aka naɓiyayeri ni.”

³⁹Duku akwa nca ɗa ku ləɓəla akwa mtaku, kamnyar ɗəmtsa thlaliyayeri ar səma, antə tsa wutə hwiyir kugwar mtaku na yayari. Antə tsa ku ɗəmtsa hang apatə tsa amzhi fatari akwa mnya ləptərni, ka si ka thləthlauwa akwa tughum kula səndə suari.

⁴⁰Antə da ku puɓəla səkwar ni aka mji ka da səma. Amma sakatə da ku ɗari antə da ku hara kuraku abbər, “Elisha, kuzəku akwa səkwar ni! Antə yeru amzhi səmari wa.”

⁴¹Antə Elisha pəla, “Səntə giri mpwa.” Antə tsa ku puwa akwa tughum ni ka pəla, “Ndəkəmta giri aka mji ka da səma.” Antə su aɗi damitə ɗa kəra wa.

⁴²Vir laga mdə laga ku thlata ahar Baal Shalisha ka səntə kər buradi sərkumari aka Elisha. Mdə ɓwa buradi ni ka barli na ntangkəma tə tsa fwaɓəla akwa bufu. Antə Elisha pəla, “Hamta giri ala ɗa ka da səma.”

⁴³Amma buɗarni pəla, “Məmi tə I ata mzhi ndəkəi susəma ngəni aka mji aru ri?” Amma Elisha jaktə pəla, “Hamta giri ala ɗa ka da səma, kamnyar MTHLAKU ku pəla abbər da ata səmari har ka da zhar mbilari.”

⁴⁴Apani antə tsa ku na ala ɗa. Antə da ku səma har tə susəm ni ku mbiləmta, apatə MTHLAKU ku pəla.