Read bura-pabir 2 Kuthlyayeri 6 Bible Online

2 Kuthlyayeri 6 - bura-pabir bible

2 Kuthlyayeri 6

¹Vir laga maɗa' makarantər naɓikur pəla aka Elisha abbər, “Wulhə bu, vəi tə mburu andzəndzi akwa ni ku hara raka ala mburu.

²Ndzi ka yeru mwari akwa Thlyagha Jodan ka yeru nthləi udzəm ka yeru namtə vəi ndzəndzi ala mburu anda.” Antə Elisha shinau abbər, “Mwar giri.”

³Antə pal akwa nca ɗa pəla, “Mbura mwari kəga gə bu usa.” Antə tsa pəla, “To, mburu ata mwari.”

⁴Apani antə da ku təra kəga tsa ata kəma duku. Sakatə da ku si akwa Jodan, antə da ləkwa nthlə nfwa.

⁵Sakatə pal akwa nca ɗa akwa nthlə nfu ni, antə kəmərni kulenga ka tərkwa yimi. Antə tsa hara kuraku, “Ya ləmari, zanuwa! Kəm təpatəpa!”

⁶Antə Elisha pəla, “Ama antə tsa tərkwa nə ri?” Sakatə tsa ku ncanta alari vəyari, antə Elisha ku ɓəli udzəm ka ndzəhəuwa anda, antə kəm ni ku səɓəla ata kəra yimi ni.

⁷Antə Elisha pəla aka mdə ni, “Kəli ni.” Antə tsa ku ha tsiyari ka kəli.

⁸Akwa saka laga tə kuthlir Siriya akwa mpa ka Israila antə kuthlir Siriya ku hara sauri kəga kwakunayeri arni abbər, “Mburu ata pwi sojayeri ar mburu akwa vəyayeri laga apani.”

⁹Amma Elisha thlentə ndər aka kuthlir Israila abbər, “Kara hara hangkal, ga aɗiya mwari kudzəhə ka vəi ndaga wa, kamnyar mjir Siriya ku mwari anda.”

¹⁰Antə kuthlir Israila ku thlentə ndər aka mji na akwa vəi tə Elisha tsaktə ni ata kər ni abbər ka da ndzi ɗəmhəɗəmhari. Tsa ku hara ngəni ka hang.

¹¹Antə hangkala kuthlir Siriya ku thlatə mwavər ka duna kamnyar su ngəni tə tsa ku kəga kwakunayeri arni ka pəla ala ɗa, “Pəla giri ali mdə na akwa nca mburu na akwa ɓəli mburu aka kuthlir Israila.”

¹²Antə pal akwa nca kwakunayeri arni pəla, “Ka barkar nga, aɗi mdə laga akwa nca mburu wa. Naɓi Elisha na akwa Israila an mdər pəla aka kuthlir Israila ndərayeri natə ga ana gariyari akwa mbwar piyir nga.”

¹³Antə kuthli ni pəla, “Mwari kara wutə vəi tə tsa ata, antə I ata thlentə ka mdə ra ngkəi ni.” Antə mda pəla alari abbər, “Tsa anda akwa Dothlan.”

¹⁴Antə kuthlir Siriya ku thlentə takwayeri ka wagənayeri ar taku ka dlamar sojayeri hang tə da ku si aviri ka kalaktə di ni.

¹⁵Sakatə buɗar Elisha ku thlatə ɗəɗəpə mbing ka ləɓəla, təng tsa wutə dlamar sojayeri ka takwayeri ka wagənayeri ar taku ku kalaktə di ni. Antə buɗarni pəla, “Su ku wutə mwa, mdərkəi! Man su tə ka mwa hara ri?”

¹⁶Antə Elisha pəla, “Ga aɗiya thlivər wa, kamnyar mji na adzə mwa ku təramta mji na adzə ɗa ka hangkur.”

¹⁷Antə Elisha ku hara adduwa ka pəla, “MTHLAKU, kəlar nca buɗarna ni ka tsa wuta.” MTHLAKU ku kəlar ncari, antə tsa ku wutə gar ni, nghyinghyari ka takwayeri ka wagənayeri ar taku na ka u'u na kalaktə Elisha.

¹⁸Sakatə mjir Siriya ku səghəi kamnyar mpa Elisha, antə Elisha ku hara adduwa aka MTHLAKU ka pəla, “I ata kiɗə nga kara tsa mji ngəni ka mdlyangkur.” Antə MTHLAKU ku tsa ɗa ka mdlyangkur apa tə Elisha ku kiɗa.

¹⁹Antə Elisha pəla ala ɗa, “Giri ku sha akwa laku ni, antə aɗi an di ni wa. Nu giri ra antə I ata mwantə giri adzə mdə natə giri akwa barari ni.” Antə tsa ku mwantə ɗa ahar Samariya.

²⁰Sakatə da ku ləkwa Samariya, antə Elisha pəla, “MTHLAKU, kəlar nca mji nayeri ni ka da wutə su.” Antə MTHLAKU ku kəlar nca ɗa, tə da ku wuta abbər da ata ɗəffa Samariya.

²¹Təkəma tə kuthlir Israila wutə ɗa antə tsa yu Elisha abbər, “Kəi tsəgəi ɗa ya, Zanuwa? Kəi tsəgəi ɗa ya?”

²²Antə Elisha shinau alari abbər, “Awa, ga aɗiya tsəgəi ɗa wa. Mda ana tsəgəi mji tə mdə ngkəi ɗa akwa mpa ya? Na ala ɗa susəma ka yimi, ka gə zhar ɗa ka da ngka adzə kuthlir ɗa.”

²³Antə kuthlir Israila ku namta ala ɗa susəma hang. Aghəla tə da ku səma ka sa, antə tsa ku salamtə ɗa, antə da ku ngka adzə kuthlir ɗa. Antə mjir Siriya aɗi jaktə mwantə dləra akwa tsəɗi Israila kəra wa.

²⁴Aghəla nda Benhadad na kuthlir Siriya ku tsaptə shanga sojayeri arni, ka mwari ka kalaktə Samariya ka sojayeri.

²⁵Antə mi na mwavər təri akwa Samariya kamnyar tə mjir Siriya ku kalaktə di ni ka fi, har tə mda akwa ɗəl kəra kwara ata kəra liyar adzərfa nciskumari ka ɗewar civər bukəl ata kəra liyar adzərfa ntəfu.

²⁶Vir laga kuthlir Israila akwa təramta ata kəra katanggar di ni, antə mwala laga ku haptə kurakari ka pəla, “Bundi, dlar ra bu!”

²⁷Antə kuthli pəla, “Ka MTHLAKU an dlar nga! Man dlar tə I amzhi hara ri? Gə tamata abbər I ka susəm wala yimər anap ya?”

²⁸Antə tsa yu ni, “Amma man damitədzər ngə ri?” Antə mwala ni shinau abbər, “Mwala ngəni pəla ali, ‘Hamta ala mwa ɓzər nga, ka mwa ɓɗəmnya ashina, ma ɗəpa ka mwa sə ɓɗəmnya ɓzərna.’

²⁹Antə yeru ku ti ɓzərna ni, ka ɓɗəmnya. Səɓəla ɗəpari antə I pəla alari, ‘Hamta ɓzər ngə ni kamnyar ka mwa ɓɗəmnya.’ Amma tsa ku ɗuwar ɓzərni ni.”

³⁰Sakatə kuthli ni ku nggatə labar mwala ni, antə tsa ku kukwahəmta ləptərni. Sakatə tsa akwa mwa ka təramta ata kəra katangga antə mji ku wutə ni ka dasayeri akira kariyeri ni.

³¹Antə tsa pəla, “Ka Hyel tsi ra ma mda aɗi nthləmta kəra Elisha na ɓzər Shafat ashina wa.”

³²Akwa saka ngəni, Elisha andzəndzi ambwarngkiɗa, ka mji ol'ola adzə ni. Antə kuthli ni thlentə mdə laga adzə Elisha, amma akwabə ka mdə ni mzhita, Elisha pəla aka mji ol'ol ni, “Wul giri mdər tsi mdə ni ku thlentə mda ka tsa sə nthləmta kəri. Ma sakatə mdər thlentə ni ku si, ka giri hartə nyarmbwa ni, ka kəsi ta tsa asəmbwa. Aɗi ata fəi wa giri ata nggatə kur səla mdərkəyirni aghəlari.”

³³Tsa aɗi kuri gari ni wa, təkəma mdərthlenta ni ku mzhita. Antə Elisha pəla, “MTHLAKU an thlentə bwani ngəni.” Mdərthlenta ni pəla, “Kamnyar mi tə I ata jaktə shamta sakarna akwa səka dlara akəla MTHLAKU ri?”