Read bura-pabir 2 Kuthlyayeri 7 Bible Online

2 Kuthlyayeri 7 - bura-pabir bible

2 Kuthlyayeri 7

¹Antə Elisha pəla, “Ngga su tə MTHLAKU akwa pəlari, ‘Ɗəpə saka apani akwa Samariya mdə ata ɗəl kilogram makər ar mpu na ɓɗakta shang ata kəra liyar adzərfa pal, ka kilogram ngkwa ar barli ata kəra liyar adzərfa pal.’ ”

²Amma kwakuna na mdər dlarər kuthli ku pəla aka Elisha abbər, “Wala ma MTHLAKU an ata kəlar kuta hyel, su apani aɗi ata hara wa.” Elisha shinau ka pəla abbər, “Ga ata wutari ka nca ga, amma ga aɗi ata səmari wa.”

³Mji laga aɗi nfwar ka shilkər kəsəm dza akwa nyarfur Samariya. Antə da pəla aka nvwa ɗa, “Kamnyar mi tə mburu ata ndzəndzi azi har ka mburu sə mti ri?

⁴Ma mburu pəla ka mburu ləkwa kuta di, mi aɗi anda, antə mburu ata mta. Tsuwa ma mburu ndzəndzi azi, mburu ata mta. Kamnyar ngəni kuji ka mburu mwari akwa vəi fəliyir mjir Siriya. Ma da ku zhar mburu ka mpika, mburu ku msəri, ma da ku tsəgəi mburu, daci.”

⁵Ka vəi zhimzhim antə da ku thlatə ka təra mwari akwa vəi fəliyir mjir Siriya. Sakatə da ku mzhitə mnya vəi fəliyir mjir Siriya, antə da wuta abbər wala mdə duku aɗi anda wa.

⁶Kamnyar MTHLAKU ku hara tə sojayeri ar Siriya ku nggatə kuraka wagənayeri ka takwayeri ka kərathlər sojayeri. Antə da ku pəla aka nvwa ɗa, “Ndaga kuthlir Israila ku kiɗətsa kuthlyayeri ar mjir Hitti ka mjir Masar ka da sə dlərəmta mburu.”

⁷Antə da ku thlatə ka hwi tsu tə vəi zhimzhim ka zhar tentayeri, ka takwayeri, ka kwarayeri arɗa, ka zhar vəi fəliyir ɗa tsu apatə da lata, ka msərantə mpika ɗa.

⁸Sakatə mji na ka shilkər kəsəm dza na nfwar ni ku si akwa vəi fəli nda, da ku ləkwa tent laga ka səma ka sa. Antə da fwaɓəla adzərfa, dinar ka kari hata, ka təra ra ɗuwardzi. Antə da jaktə ngka, ka ləkwa tent damwa, ka fwaɓəla suayeri na akwa kutari. Antə da təra ka ra ɗuwarari tsuwa.

⁹Antə da pəla aka nvwa ɗa, “Aɗi kalkal ka mburu hara su apani wa. Ashina an vir labar na msəra, amma mburu akwa ndzi ɗiɗi ata kər. Ma mburu ndzi ɗiɗi ata kər ka səka har tə viri kura, asar na ɗimi ata sə wutə mburu. Mbura mwa taktar ka mburu ra pəlari akwa kəi kuthli.”

¹⁰Antə da ku zhar vəi fəli mjir Siriya, ka ngka akwa Samariya, ka pəla aka mjir gadi nyarfu, “Yeru mwari akwa vəi fəliyir mjir Siriya, amma yeru aɗi wutə wala nggatə tsəkuya mdə wa. Takwayeri ka kwarayeri tsu mbwimbwiyari, ka tentayeri tsu apa na hwatu.”

¹¹Antə mjir sək nyarfu ni ku pəla labar ni ka kuraku antə labar ni ku mzhitə kəi kuthli.

¹²Antə kuthli ku thlatə tsu aviri ka pəla aka kwakunayeri arni abbər, “Ndzi kəi pəla ala giri ɗəmhədzi natə mjir Siriya ku hara ata kəra mburu. Da ku sənda abbər mburu ka mi, antə da ku ləɓəla kazhar vəi fəliyir ɗa ka ra ɗuwardzi akwa mtaku. Da dzama abbər ma sakatə mburu ku ləɓəla kazhar kuta di kamnyar bara susəma, antə da ata ngkamnya mburu ka mpika ka ngkəi di ni.”

¹³Antə pal akwa nca kwakunayeri arni pəla abbər, “Ka mda wutə mji laga ka da fatə takwayeri ntəfu na ku mbili akwa kuta di ni, ka mburu thlentə ɗa ka da ra wulɓəlari. Wala su an wutə ɗa ma suari aɗi ata ndzi mwavər ta ma da an ndzi ata kəma duku ka mburu ka mtə wa.”

¹⁴Antə da ku fatə mjir fəl taku suɗa, tə kuthli ku thlentə ɗa akwa vəi fəliyir sojayeri ar Siriya ka da ra wulɓəla su na hara.

¹⁵Apani mji ni ku mwa har ka mzhitə Thlyagha Jodan, ka wutə sur hata ka kariyir mpa apumta leɓ leɓu ata laku natə mjir Siriya ku pugəmta sakatə da akwa hwi. Antə mjir thlentə nda ku ngka ka jikata aka kuthli.

¹⁶Antə mjir Samariya ku ləɓəla ka ra famnya shanga su na akwa vəi fəliyir mjir Siriya. Apani antə da ku ɗəl kilogram makər ar mpu na ɓɗakta shang ata kəra liyar adzərfa pal, ka kilogram ngkwa ar barli ata kəra liyar adzərfa pal, kalkal apatə MTHLAKU ku pəla.

¹⁷Kuthlir Israila ku vətə kwakunarni na mdər dlarərni tə tsa ndzi ata kəra nyarfur di. Antə mji ku ntsəntsartə ni sakatə da akwa hwi ləɓəla ra masa susəma akwa nyarfu har tə tsa ku mti, tsu apatə Elisha ku pəla sakatə kuthli mwari adzə ni.

¹⁸Kamnyar Elisha ku pəla aka kuthli abbər, “Mda ata si ɗəl kilogram makər ar mpu na ɓɗakta shang ata kəra liyar adzərfa pal, ka kilogram ngkwa ar barli ata kəra liyar adzərfa pal, ɗəpa saka apani akwa nyarfur Samariya.”

¹⁹Amma kwakuna ni aɗi mbərsa abbər wala MTHLAKU ata mzhi hara su apani wa. Antə Elisha pəla alari, “Ga ata sə wutari ka nca ga, amma ga aɗi ata sə səmari wa.”

²⁰Tsu apani antə ku hara alari, kamnyar mji ku ntsəntsartə ni akwa nyarfu nda antə tsa ku mti.