Read bura-pabir 2 Kuthlyayeri 8 Bible Online

2 Kuthlyayeri 8 - bura-pabir bible

2 Kuthlyayeri 8

¹Akwa saka ngəni Elisha ku pəla aka mwala natə tsa ku mbantə ɓzərni ni abbər, “Thlatə ka giri təra kəga mjir kutakəyir nga ka giri mwari akwa kəlara vəi tə giri amzha. Kamnyar MTHLAKU ata hara ka mi təri akwa tsəɗi ni ar məva murfa.”

²Apani mwala ni ku hara tsu apatə Elisha ku pəla alari.Tsa ku təra ka mjir kutakəyirni kara ndzəndzi akwa tsəɗiyir mjir Filistiya mnyar məva murfa.

³Antə akwa tsikəra məva murfə ni, mwala ni ku ngka kazhar Filistiya, ka mwari adzə kuthli kamnyar ka mdə ngka alari ka kəyirni ka bəbalərni.

⁴Ata saka nda kuthli ni akwa gari ka Gehazi na buɗar Elisha. Tə kuthli ni pəla abbər, “Pəla ali shanga suayeri na ol'ola tə Elisha ku hara ni.”

⁵Sakatə Gehazi tsu akwa pəla aka kuthli apatə Elisha ku mbantə mdə na mta, təkəma mwala natə Elisha ku mbantə mpika ɓzərni nda ku si akwa kiɗə ka kuthli ngka alari kəyirni ka bəbalərni. Antə Gehazi pəla, “Bundi, nggədza mwala natə Elisha mbantə ɓzərni ni!”

⁶Sakatə kuthli ku yu mwala ni, antə mwala ni ku pəla alari shanga su na hara. Antə kuthli ku paktə ni ka kwakunarni laga, ka pəla, “Kara ngka alari ka shanga suayeri na arni. Ka gə paktə alari shanga su na ku ya ata fakayeri arni, baɗitə tsu akwa vir tə tsa ku zhar tsəɗi ni har ka sənta aka ashina.”

⁷Elisha ku mwari akwa Damaska di kuthlikur ar Siriya, sakatə Benhadad na kuthlir Siriya nggawa, antə mdə ku pəla alari, “Elisha ku si azi.”

⁸Antə kuthli ni pəla aka Hazayel, “Kəta cauta kara mwari ra wutə mdər Hyel ni, kara kiɗə ni ka tsa yuɓəla akəla MTHLAKU wala I ata sə thlata akwa nggawakur ngəni ya?”

⁹Apani antə Hazayel ku mwari kamnyar wutə ni ka cautayeri na ɓɗakɓɗaku ar suayeri na akwa Damaska, ka kələr dləkəmau nfwarkumari. Sakatə tsa ku si adzə Elisha, antə tsa pəla, “Buɗar nga Benhadad na kuthlir Siriya ku thlentə ra adzə nga, kəi yuɓəla akəla ga abbər, ‘I ata thlata akwa nggawakur arna ni ya?’ ”

¹⁰Antə Elisha pəla alari, “Mwari kara pəla alari, ‘Ga ata sə mbantədzi.’ Amma MTHLAKU ku ncanta ali abbər kula nuhum tsa ata mta.”

¹¹Antə Elisha ɗəməngkər ncari aka Hazayel, har tə Hazayel ku nggatə səli. Antə mdər Hyel ni ku tuwa.

¹²Antə Hazayel pəla, “Kamnyar mi tə ga akwa tuwa ri?” Antə Elisha shinau abbər, “Kamnyar I asəndə jili ɗimikur tə ga ata sə harari aka mjir Israila. Ga ata sə mbamta kauyayeri na akwa katangga ka tsəgəi kustayeri arɗa ka katsakar, ka dlidlirəmta maɗankyarər ɗa ata di, ka thləhumta kuta mwankir ɗa na ka hur.”

¹³Antə Hazayel yuwa abbər, “Apa madi tə I na aɗi suma wa, ata mzhi wutə dunar hara su na ola apani ri?” Antə Elisha shinau abbər, “MTHLAKU ku ncanta ali abbər, ga ata sə ndzi kuthlir Siriya.”

¹⁴Antə Hazayel ku thlatə ka təra kazhar Elisha ka ngka adzə Benhadad. Sakatə Benhadad ku yuwa abbər, “Man su tə Elisha pəla ala gə ri?” Tsa pəla abbər, “Kula nuhum ga ata thlata.”

¹⁵Amma səɓəla ɗəpari Hazayel ku kətə barkwa ka nciwa akwa yimi ka hartə kəma kuthli kəgari, har tə tsa ku mti. Antə Hazayel ku ndzi kuthli ata vəyari.

¹⁶Akwa məva na ntəfkur ar Yoram na ɓzər Ahab, na kuthlir Israila, Yehoram na ɓzər Yehoshafat na kuthlir Yahuda ku baɗitə kuthlikur.

¹⁷Yehoram ka məvari makkumari ka suɗa ka yarni sakatə tsa ndzi kuthli. Antə tsa hara kuthlikur ar məva ncisu akwa Urushalima.

¹⁸Antə tsa ku nu surharar kuthlyayeri ar Israila, ka hara suayeri na ɗimi apatə kutakəyir Kuthli Ahab ku hara. Tsa hara ɗimikur ngəni kamnyar tə ngkwar Ahab an mwalankiɗa. Antə apani tsa ku hara su na ɗimi ata nca MTHLAKU.

¹⁹Wala apani MTHLAKU aɗi hir shamta Yahuda wa, kamnyar tsa ku hara alkawal aka Dauda na buɗarni abbər, kutakəyirni ata ndzi ka kuthlikur tədəku.

²⁰Akwa sakar kuthlikur ar Yehoram, antə mjir Edom hara kər ɓəɓalkur aka kuthlikur ar Yahuda, ka vəi kuthli ar kəra ɗa.

²¹Antə Yehoram ku mwari ahar Zayir ka shanga wagənayeri ar takurni. Amma sojayeri ar Edom ku kalaktə ni kəga mji ol'olər mpa ar wagənayeri ar takurni. Antə da ku thlata aviri ka dlər mjir Edom amma da aɗi səm wa. Antə sojayeri arni ku hwi ləha.

²²Antə baɗitə ka vir nda har ka vədza aka pci na ashina, mjir Edom akwa nggəlar ndərər kuthlikur ar Yahuda. Tsuwa tsu akwa saka ndaga antə bərni Libna nggəlar kələngkər aka kuthlikur ar Yahuda ni.

²³Shanga kəthlərayeri tə Yehoram ku hara, mdə ku rəbutə ɗa akwa Kakaɗər Labar ar Kuthlyayeri ar Yahuda.

²⁴Yehoram ku mti, antə mdə ku harəmta ni akwa kulər kuthlyayeri akwa Bərniyir Dauda. Antə Ahaziya na ɓzərni ku ndzi kuthli ata vəyari.

²⁵Akwa məva na kumnya suɗkur ar Yoram na ɓzər Ahab na kuthlir Israila antə Ahaziya na ɓzər Yehoram, na kuthlir Yahuda, ku ləkwa kuthlikur.

²⁶Ahaziya ka məvari sərkumari ka suɗa ka yarni sakatə tsa baɗitə hara kuthlikur, antə tsa ku hara kuthlikur ar məva pal akwa Urushalima. Thləma mama'ni an Athlaliya, kəkar Omri na kuthlir Israila.

²⁷Ahaziya ku nu surharar mjir kutakəyir Ahab, ka hara su na ɗimi ata nca MTHLAKU apatə kutakəyir Ahab ku hara, kamnyar tə tsa salngkwar kutakəyir Ahab.

²⁸Kuthli Ahaziya ku paktə kər ka Yoram na kuthlir Israila ka ra dlər Hazayel na kuthlir Siriya ka Ramoth Gileyad. Antə mjir Siriya ku dəkəi Yoram akwa mpa ni.

²⁹Antə Kuthli Yoram ku ngka ahar Yezireyel kamnyar ka tsa kəcə mbəlkari tə mjir Siriya vədza alari ahar Rama, sakatə tsa akwa mpa ka Hazayel na kuthlir Siriya. Antə Ahaziya na ɓzər Yehoram na kuthlir Yahuda ku ləghəi ahar Yezireyel kamnyar ka tsa wuli Yoram na ɓzər Ahab akwa dəkəidzərni ni.