Read bura-pabir 2 Kuthlyayeri 9 Bible Online

2 Kuthlyayeri 9 - bura-pabir bible

2 Kuthlyayeri 9

¹Antə naɓi Elisha ku kəga pal akwa nca maɗa' makarantər naɓikur ka pəla alari, “Ɗəmhədzi kara kətə kutəkər mal zaitun akwa tsiya ga, kara mwari ahar Ramoth Gileyad.

²Ma sakatə ga ku mzhita, kara paktə Yehu na ɓzər Yehoshafat, na ɓzər Nimshi, kara kəgaɓəla ni akwa nca kəmarni, ka giri ləkwa mbwa laga giri shigiri.

³Ka gə kətə kutəkər mal kara pungkər ata kərari. Ka gə pəla, ‘MTHLAKU ku pəla, I ku carɓəla nga ka gə ndzi kuthlir Israila.’ Təkəma kara kəlar nyarmbwa kara hwi, ga aɗiya shamta saka wa”,

⁴Antə ɓzərdakwi na naɓi ni ku təra ka ləha Ramoth Gileyad.

⁵Sakatə tsa ku mzhita, antə tsa ku wutə mji ol'ola ar sojayeri akwa tsaptədzi. Antə tsa pəla, “I ka ngkər ala gə zanuwa.” Antə Yehu yuwa abbər, “Aka wa akwa nca yeru nə ri?” Tə tsa shinau abbər, “Ala gə zanuwa.”

⁶Antə Yehu thlatə ka ləmbwa, tə ɓzərdakwi ni ku pungkər mal ata kəra Yehu, ka pəla, “MTHLAKU na Hyelər Israila ku pəla, ‘I ku carɓəla nga ka gə ndzi kuthlir Israila.

⁷Ka gə shamta kutakəyir mdərkəyir nga Ahab. Apani I ata ɗi Yezebel kamnyar kurəmta naɓiyayeri kəga buɗayeri arna.

⁸Shanga mjir kutakəyir Ahab ata mta. I ata tsəgəi shanga maɗashilərni ola ka ntsaha.

⁹I ata shamta kutakəyir Ahab tsu apatə I shamta kutakəyir Yerobowam na ɓzər Nebat, ka kutakəyir Baasha na ɓzər Ahija.

¹⁰Ar Yezebel kilayeri an ata si ɓɗəmnya ni akwa tsəɗiyir Yezireyel, mda aɗi na ata harəmta ni wa.’ ” Aghəla tə tsa kuri ndər ni antə tsa kəlar nyarmbwa ka hwi təra.

¹¹Sakatə Yehu ku səɓəla ka mwari adzə mambila kwakunayeri, antə da yu ni abbər, “Lapiya? Man tə mdə ngəni ka cicu ni sə bara akəla ga ri?” Antə tsa pəla ala ɗa, “Ai giri asəndə mdə ngəni ka gariyirni.”

¹²Antə da pəla, “Awa, yeru asəndə wa. Pəla ala yeru.” Antə Yehu pəla abbər, “Tsa si ka ndər akəla MTHLAKU abbər MTHLAKU ku carɓəla ra kəi ndzi kuthlir Israila.”

¹³Antə da ntsui ləptər ɗa taktar ka pwi ata su tə mda ana ndləta, ka Yehu ləta. Antə da ku mbur təmbəl ka pəla ka kuraku abbər, “Yehu ku ndzi kuthli.”

¹⁴Antə Yehu ku ɗəmhə ɗimikur ata kəra Yoram, na akwa Yezireyel, vəi tə tsa ra kəcə mbəlku tə tsa wuta akwa mpar ɗa ka kuthlir Siriya, Hazayel tə da hərta ahar Ramoth ni. Apani antə Yehu pəla aka pazhayeri arni ni abbər, “Ma giri ata hir kəi ndzi kuthlir giri, giri aɗiya hir ka mdə wala duku ngguɗi kərari ka nggwar ləɓəla akwa di ni kara pəla labar ni ahar Yezireyel wa.”

¹⁶Antə Yehu ləkwa wagənər takurni ka mwari ahar Yezireyel. Ahaziya na kuthlir Yahuda tsuwa ku mwari anda kamnyar thlawar Yoram.

¹⁷Mdər gadi laga na athləthlata ata kəra mbwar gadi na nal akwa Yezireyel ku wutə dlamar mjir Yehu akwa si. Antə tsa haptə kuraku ka pəla, “I akwa wul dlamar mji.” Antə Yoram pəla, “Thlentə mda ata taku ka tsa ra kəɓa ka da, ka tsa yu ɗa abbər, ‘Mwar lapiyakur ya?’ ”

¹⁸Antə mdə na ata taku ni ku mwari ka kəɓa ka Yehu, ka pəla, “Kuthli Yoram ata bara ka tsa nggaɓəla wala nuhum lapiyakur an səntə giri.” Antə Yehu pəla, “Man tə ga ata harari ka lapiyakur ri? Ngka aghəli kara nu ra!” Antə mdər gadi ni pəla, “Mdərthlenta ni ku mzhitə ɗa, amma tsa aɗi akwa ngka wa.”

¹⁹Antə Yoram thlentə mdə na suɗkur adzə Yehu. Antə tsa mwari adzə ni ka pəla, “Kuthli Yoram ata bara ka tsa nggaɓəla wala nuhum lapiyakur an səntə giri ya?” Yehu shinau abbər, “Man tə ga ata harari ka lapiyakur ri? Ngka aghəli kara nu ra.”

²⁰Mdər gadi ni jaktə thlenta abbər, “Tsa ku mzhitə ɗa, amma tsa aɗi akwa ngka wa. Amma ndlə takur olər ɗa ni apa ndlə takur Yehu na kəkar Nimshi, kamnyar tsa an mdər ndlə taku apa cicu ni.”

²¹Yoram pəla, “Ɗəmhə girdzi!” Antə da ku ɗəmha alari wagənayeri ar taku. Antə Yoram na kuthlir Israila ka Ahaziya na kuthlir Yahuda ku ləɓəla, waskəi ka wagənərni, ka təra ra kəɓa ka Yehu. Da kəɓa akwa fakər Naboth na mdər Yezireyel.

²²Sakatə Yoram ku kəɓa ka Yehu, antə Yoram ku pəla, “Lapiyakur an səntə nga?” Antə Yehu shinau abbər, “Amzhi ndzi ar lapiyakur ya? Sakatə mburu tsu ka ɗeaghayeri ka mjir ləka hang natə mama' nga Yezebel ku səntə?”

²³Antə Yoram ngka ka bwahili ka hwi, akwa pəla aka Ahaziya abbər, “Kai! Ngəni an səm mdəkur, Ahaziya!”

²⁴Antə Yehu ku kətsə laliyirni ka shanga dunari, ka shi Yoram tə afə ni ku pwa ata bwahilari ka ntsəvəmta ɗəffari, antə tsa ku ndla ka mta akwa kuta wagənərni.

²⁵Antə Yehu pəla aka Bidkar na mdər dlarərni abbər, “Kəɓəla ni kara ndzəhəu ni akwa vəi Naboth na mdər Yezireyel. Ka gə ɗangtə sakatə mwa akwa nu Ahab na baba'ni, MTHLAKU ku pəla labar ngəni ata kərari abbər,

²⁶‘Naha I wutə mamshir Naboth ka maɗa'ni, antə I ku kətə alkawal abbər tar ma I ntəmta ata ga akwa vəi ngəni ni.’ Antə kulini kətə mshiyir Yoram ka gə psəmta akwa vəi ni, tsu apatə MTHLAKU ku pəla.”

²⁷Sakatə Ahaziya na kuthlir Yahuda ku wutə su na ku hara, antə tsa hwi təbwar Beth Haggan. Antə Yehu ku kədla ni ka pəla aka sojayeri arni, “Shi giri ni tsuwa.” Antə da ku shi ni akwa wagənərni akwa ndləɓəlar Gur na kudzəhə ka Ibleyam. Amma tsa ku nggita ka mzhitə Megiddo ka mti anda.

²⁸Antə kwakunayeri arni ku kətə ni akwa wagənər taku ka mwantə ni ahar Urushalima ka harəmta ni akwa kulərni, akwa vəi duku kəga kəkayeri arni akwa Bərniyir Dauda.

²⁹Ahaziya ku baɗitə ndzi kuthlir Yahuda akwa məva na kumkantangkur ar Yoram na kuthlir Israila.

³⁰Sakatə Yehu ku si ahar Yezireyel, antə Yezebel ku nggatə su ata kər. Antə Yezebel ku fadzə tozali aka ncari ka dəɓatə shishir kərari, ka puɓəla ncari akwa windau akwa wul su.

³¹Sakatə Yehu ku ləkwa nyarfu, antə Yezebel pəla, “Gə na mdər tsi mda, gə si Lapiyakur? Gə ndzi tsu apa Zimri na tsi mthlakərni!”

³²Antə Yehu ku haptə kəmari atar windau ka pəla, “Mda madi an təbwarna ri?” Antə kulaɓayeri suɗa wala makər ku puɓəla nca ɗa ka wul ni.

³³Antə Yehu pəla, “Ndzəghəi giri ni ata di.” Antə da ku ndzəghəi ni, tə bwadukwa mamshirni ku pshipshitə dza mbwa, ka takwayeri na ku ntsəntsartə ni ni ka mpəla ɗa.

³⁴Antə Yehu ku ləmbwa ka səma ka sa, ka pəla, “Kulini ka giri kətə mwala ngəni hilhilari ni, ka giri harəmta ni, kamnyar tsa ngkwar kuthli.”

³⁵Amma sakatə da ku mwari kamnyar harəmta ni, da wutə kugwar kərari, ka səlari, ka mandaɓar tsiyari daci.

³⁶Sakatə da ku ngka ka pəla aka Yehu, antə tsa pəla, “Ngəni an su tə MTHLAKU ku pəla, atar buɗarni Iliya na mdər Tishbe abbər, ‘Kilayeri ata sə ɓɗəmnya kumər Yezebel akwa tsəɗiyir Yezireyel.

³⁷Antə mshiyir Yezebel ata sə ndzi apa kuɓa akwa Yezireyel, tə mda aɗi ata səndari abbər tsa an Yezebel wa.’ ”