Read bura-pabir 1 Labar Na Waci 10 Bible Online

1 Labar Na Waci 10 - bura-pabir bible

1 Labar Na Waci 10

¹Vir laga təng mjir Filistiya mwari ka dlər mjir Israila, har tə mjir Israila ku hwi mjir Filistiya ni. Antə mjir Filistiya ni ku tsəgəi mjir Israila hang ata Gar Gilbowa.

²Amma mjir Filistiya ni ku kalaktə Shawulu kəga maɗashilərni, ka tsəgəi maɗashilərni makər, watau Jonathlan ka Abinadab, ka Malkishuwa.

³Mpa ni ku ntsəhədzi ka hara mwavər ata kəra Shawulu, antə sakatə mjir lali ar Filistiya ni ku si ata kərari, da ku dəkəi ni ka duna.

⁴Antə Shawulu pəla aka soja na ana kəsi alari kari mparni ni abbər, “Ntsuɓəla katsakarər ngə ni ka ra ntsəvəmta ra, ta mji na kula kaciya ni asə si ka mnya ɗimi ali, ka hara bwani ali ka ntsəvəmta ra.” Amma mdər kəsi alari kari mparni ni aɗi hir wa, kamnyar tsa ku thlivər ka duna. Antə Shawulu ntsuɓəla katsakarərni ni surni, ka nci ata di, ka ndla ata kər.

⁵Sakatə soja na ana kəsi alari kari mparni ni ku wuta abbər Shawulu ku mti, antə tsa ndla ata kəra katsakarərni ni tsuwa ka mta tsu adzə ni.

⁶Apani antə Shawulu ku mti, tsa ka maɗashilərni makər, ka shanga mjir kutakəyirni ku mti ata kəma duku.

⁷Sakatə shanga mjir Israila na akwa mular ni ku wuta abbər sojayeri ni ku hwi, tsuwa Shawulu ka maɗashilərni ku mti, antə da hwi kazhar diyayeri arɗa. Antə mjir Filistiya ku si ka ndzəndzi akwa.

⁸Səɓəla ɗəpari sakatə mjir Filistiya ku si abbər ka da fəi kariyir mshiyayeri ni, təng da wutə mshiyir Shawulu ka maɗashilərni ata Gar Gilbowa.

⁹Antə da fəi kariyirni, ka nthləi kərari, ka fatə kariyir mparni, ka thlentə mji akwa shanga tsəɗiyir Filistiya, ka da psəmnya labar na msəra ni aka haptayeri arɗa ka aka mjir ɗa.

¹⁰Antə da pwi kariyir mparni ni akwa mbwar haptər ɗa, ka hahəi kərari ni akwa mbwar haptər ɗa Dagon.

¹¹Amma sakatə shanga mjir Yabesh Gileyad nggatə shanga su tə mjir Filistiya hara aka Shawulu,

¹²antə shanga sojayeri na katsala ku ləɓəla ka kətə mshiyir Shawulu kəga maɗa'ni, ka sənta akwa Yabesh. Antə da harəmta ɗethlər ɗa akira nfur ok laga akwa Yabesh, ka hara asham vir murfa.

¹³Apani antə Shawulu ku mti kamnyar watsəɓər bikərni na ar ndzi kula jirkur aka MTHLAKU, ka tsuwa kamnyar ra hakdzi adzə mambələr mji na mtəmta,

¹⁴tə tsa aɗi hir yu sauri akəla MTHLAKU wa. Kamnyar ngəni antə MTHLAKU ku tsi ni, ka dlutsə kuthlikur na akwa tsiyari ka hamta aka Dauda na ɓzər Yesse.