Read bura-pabir 1 Labar Na Waci 12 Bible Online

1 Labar Na Waci 12 - bura-pabir bible

1 Labar Na Waci 12

¹Ngəni an mji na si adzə Dauda ahar Zigklag, sakatə tsa hwi ka ra ɗuwardzi ta kuthli Shawulu na ɓzər Kish ni. Da akwa nca sojayeri na mulmulari na dlar Dauda akwa mpa.

²Da an mjir mpa ka lali, mji na masəkur shə afa wala ndzəha pela ka mavinding ka matsəkar wala ka mazəm. Da an mjir Benjamin, watau da yangkura Shawulu.

³Mji na ol'ola ata kəra ɗa an Ahiyezer ka Yowash na maɗa' Shemaa, na mdər Gibeya. Nayeri ni an thləma mambila sojayeri ni. Yeziyel ka Pelet na maɗashilər Azmaveth, ka Beraka, ka Yehu na mdər Anathloth,

⁴ka Ishmaiya na mdər Gibeyon, Soja na mulmulari akwa nca mji na “Makkumari ni”, ka Irmiya, ka Yahaziyel, ka Yahwanan, ka Yozabad na mdər Gedera,

⁵ka Eluzai, ka Yerimoth, ka Beyaliya, ka Shemariya, ka Shefatiya na mdər Haruf,

⁶ka Elkana, ka Isshiya, ka Azarel, ka Yoyezer, ka Yashobeyam na akwa nyarmbwar Kora,

⁷ka Yowela ka Zebadiya na maɗa' Yeroham na ahar Gedor.

⁸Akwa nyarmbwar Gad mji aɗi tsuwa na ku nu Dauda ka mwari akwa vəi ɗuwardzərni akwa mtakə ni. Da an mji na ku mula akwa mpa, mji na masəkur mpa ka partau ka mwasu. Kəma ɗa apa kəma tsəngiyayeri, tsuwa da ɓəɓatu apa kimar ata gar.

⁹Mdə na olər ɗa an Ezer, Obadiya an na suɗkur, Eliyab an makərkur,

¹⁰Mishmanna an nfwarkur, Irmiya an ntəfkur,

¹¹Attai an ngkwakur, Eliyel an murfəkur,

¹²Yahwanan an nciskur, Elzabad an na əmdləkur,

¹³Irmiya an na kumkur, ka Makbannai an kumkantangkur.

¹⁴Mjir Gad nayeri ni an ol'olər sojayeri. Dunar mdə na raka ta shang akwa nca ɗa an kalkal ka dunar sojayeri aru pal, tsuwa dunar mdə na ola akwa nca ɗa an kalkal ka dunar sojayeri dəpu pal.

¹⁵Da an mji na fəlɓəla Thlyagha Jodan akwa thliya na ntangkəma sakatə thlyagha ni ku nghyi ka puɓəladzi. Da fəlɓəla thlyagha ni ka kədləmta shanga mji na akwa mularayeri na abwar raghəi ka na abwar ramta.

¹⁶Mji damwa aɗi na akwa nyarmbwar Benjamin ka ar Yahuda na ku mwari adzə Dauda akwa vəi ɗuwardzərni ni.

¹⁷Antə Dauda ku ləɓəla kamnyar thlakəma ɗa. Antə tsa pəla ala ɗa, “Ma msərakur an səntə giri kamnyar ka giri dlar ra, mburu ata ndzi pazhi. Amma ma giri si kamnyar ka giri ɓəli ra aka dawayeri arna, kula I ɓzamta ala giri su, to ka Hyelər kəkayeri ar mburu wuta, ka tsa ɗi giri.”

¹⁸Antə mambələr Hyel ku si ata kəra Amasai na olər mji na “Makkumari ni”, ka pəla, “Dauda, yeru an ar nga! Ɓzər Yesse, yeru ata vəi duku ka ga! Msərakur ka ləkəma an ar nga, ka aka shanga mji na ata dlar nga! Kamnyar Hyelər nga akwa dlar nga.” Antə Dauda ku dlu ɗa ka namtə ɗa mji na ol'olər sojayeri arni.

¹⁹Sojayeri aɗi laga na akwa nyarmbwar Manasse na ku ngka adzə Dauda, sakatə Dauda səɓəla kəga mjir Filistiya kamnyar mpa Shawulu ni. Amma Dauda aɗi dlar mjir Filistiya akwa mpa ni wa, kamnyar da pəla alari ka tsa ngka. Kamnyar da dzama abbər, “Ata ndzi ata kəra mpika mburu ma har mburu zhar Dauda ka mburu mpa ata kəma duku kəga tsa, kamnyar tsa ata mzhi ngka adzə Shawulu ka tsa mpa mburu.”

²⁰Sakatə Dauda ku mwari ahar Zigklag, antə mji ngəni na akwa nyarmbwar Manasse ni ku ngka adzə ni. Da an Adna, ka Yozabad, ka Yediyayel, ka Mikayel, ka Yozabad, ka Elihu, ka Zillethlai. Da an mji na ol'olər sojayeri na dəpu dəpu akwa nyarmbwar Manasse.

²¹Da ku dlar Dauda tə tsa kədləmta mjir səntə mpa ata kəra mji, kamnyar shanga ɗa sojayeri na masəku ka duna. Antə da ku ndzi mji na ol'olər sojayeri arni.

²²Tədək viri mji akwa jakjaka adzə Dauda kamnyar dlar ni, har tə zarar sojayeri arni ku nghyi ka sojayeri dlama dlama.

²³Nayeri ni an hangkur sojayeri na masəku akwa mpa na mwari adzə Dauda ahar Hebron, kamnyar ka da dlutsa alari kuthlikur na akwa tsiya Shawulu ni, apatə MTHLAKU ku pəla.

²⁴Akwa nyarmbwar Yahuda, da ka sojayeri dəpu ngkwa ka aru ncisu, mjir kəsi mwasu ka partau kamnyar mpa.

²⁵Akwar nyarmbwar Simeyon, da ka sojayeri dəpu murfa ka aru pal, mji na katsala akwa mpa.

²⁶Akwa nyarmbwar Lawi, da ka sojayeri dəpu nfwar ka aru ngkwa.

²⁷Ngəni ku paktə ka Yehoyada na ola akwa kutakəyir Haruna, na ka mji dəpu makər ka aru murfa.

²⁸Tsuwa ngəni ku paktə ka Zadok, ɓzərdakwi na katsala akwa mpa, ka mji na ol'olər sojayeri sərkumari ka suɗa na akwa kutakəyirni.

²⁹Akwa nyarmbwar Benjamin, watau mjir ga Shawulu, da ka sojayeri dəpu makər. Tsuwa bwar ola mjir Benjamin ni ku bartə mjir kutakəyir Shawulu har ka sənta aka saka ngəni.

³⁰Akwa nyarmbwar Ifrayim, da ka sojayeri dəpu sərkumari ka aru ncisu, shang sojayeri na katsala akwa mpa, natə thləma ɗa ku tuwa akwa nca mjir kutakəyir ɗa.

³¹Akwa nyarmbwar Manasse na abwar ramta ka Thlyagha Jodan, da ka sojayeri dəpu kumnya ncisu. Mji ngəni antə mdə hamta kamnyar bartə kəra Dauda ka tsa ndzi kuthli.

³²Akwa nyarmbwar Issakar, da ka sojayeri na ana nggaɓəla su ata kəra sakayeri, ka səndə su na kalkal tə ka Israila hara. Antə da ka kuthlyayeri aru suɗa, ka shanga yangkurayeri arɗa na akira da.

³³Akwa nyarmbwar Zebulun, da ka sojayeri dəpu ntəfkumari na masəkur mpa ka kəlara kari mpa, tsuwa da ɗəmhəɗəmhari kamnyar mpa ka kəlara jili kariyir mpa madi. Antə da ku səɓəla kamnyar ka da dlar Dauda ka ɗəffə duku.

³⁴Akwa nyarmbwar Naftali, da ka sojayeri na ol'ola dəpu pal, na ata kəra sojayeri dəpu makkumari ka murfa natə da andər kəsi partau ka mwasu akwa mpa ni.

³⁵Akwa nyarmbwar Dan, da ka sojayeri dəpu sərkumari ka ncisu ka aru ngkwa, na ɗəmhəɗəmhari kamnyar mpa.

³⁶Akwa nyarmbwar Asher, da ka sojayeri na masəku dəpu nfwarkumari, na ɗəmhəɗəmhari kamnyar mpa.

³⁷Akwa nyarmbwar Ruben, ka ar Gad, ka ar Manasse na abwar raghəi ka Jodan, da ka sojayeri dəpu aru ka sərkumari, shanga ɗa ka kari mpa.

³⁸Shanga ɗa an sojayeri na ɗəmhəɗəmhari kamnyar mpa. Da hamta kərɗa ka si akwa Hebron ka dzam duku, an abbər ka da vəi Dauda kuthlir shanga Israila. Tsuwa shanga mambila mjir Israila ka dzama duku abbər ka da vətə Dauda ata kuthlikur.

³⁹Antə mji ngəni ku hara vir makər adzə Dauda, akwa səm ka sa, kamnyar mambila mjir Israila ku sənta ala ɗa susəmayeri.

⁴⁰Tsuwa wala ntəwulayeri arɗa na ciju apa akwa tsəɗi mjir Issakar, ka Zebulun, ka Naftali, ku sənta ala ɗa susəma ata kwara, ka dləkəmau, ka kwaraləbandər, ka thlar fa kəla. Tsuwa susəmayeri ni ku paktə ka mpwa, ka kek ar yar kamnda ul'ula, ka kek ar yar anap ul'ula, ka yimər anap, ka mal, kəga thla, kəga təma, kamnyar shanga mjir Israila ku hara kucali ka duna.