Read bura-pabir 1 Labar Na Waci 13 Bible Online

1 Labar Na Waci 13 - bura-pabir bible

1 Labar Na Waci 13

¹Antə Dauda ku hara sauri kəga mji ol'olər sojayeri arni na ata kəra mji dəpu dəpu ka na aru aru.

²Antə Dauda pəla aka shanga mjir Israila na tsaptədzi ni abbər, “Ma an ata hara ɓɗaku ala giri, tsuwa ma an hirər MTHLAKU na Hyelər mburu, ndzi ka mburu thlentə ndər aka mambila maɗama' mburu na ciju ka na kudzəha akwa shanga tsəɗi Israila, ka aka pristayeri kəga mjir Lawi na adzə ɗa akwa bərniyayeri, kəga vəi ɓəla na aɗi shang, ka da si ka mburu paktədzi.

³Antə mburu ata mwari ra səntə Akwati Alkawal ar Hyel ni adzə mburu. Kamnyar akwa zaman kuthlikur ar Shawulu mburu aɗi vədza hangkala mburu akari wa.”

⁴Antə shanga mjir Israila na tsaptədzi ni ku kələngkər akari, kamnyar sauri ngəni ku kəskəra ɗa.

⁵Apani antə Dauda ku tsaptə shanga mjir Israila, su na baɗita akwa Thlyagha Shihor na akwa tsəɗi Masar har ka mwanta aka lakur ləvəi akwa Hamath na abwar yala, kamnyar ka da ra səntə Akwati Alkawal ar Hyel na ahar Kiriyath Yeyarim ni.

⁶Antə Dauda ka shanga mjir Israila ku təra ləhar Baala, watau Kiriyath Yeyarim, na akwa tsəɗi Yahuda. Antə tsa təra ata kəma duku kəga shanga mji na adzə ni kamnyar mwari ra səntə Akwati Alkawal ar Hyel natə mda ana kəga thləmari MTHLAKU ni, na ana ndzəndzi ata dəkəl kuthlikur na ata kəra Kerubayeri ni.

⁷Antə da ku ra kətə Akwati Alkawal ar Hyel ni akwa kəyir Abinadab, ka vəta ata amalangke na bilən ar thla. Antə Uzza ka Ahiyo an akwa pwarari.

⁸Antə Dauda ka shanga mjir Israila akwa tsa su ka ɓathla ka duna ɗa shang akəma Hyel. Antə mdə ləkəma ka hara hayeri, ka tsa yakandi, ka guləm ka kəcaikəcai, ka liyar ɓu tsi, ka mbur təmbəlayeri.

⁹Sakatə da si akwa vəi dəkə mthli na akwa Kidon ni, təng thlayeri na akwa ndəkər Akwati Alkawal ni tsamta səla ɗa, antə Uzza ha tsiyari taktar ka rwati Akwati Alkawal ar MTHLAKU ni ta tsa atəri.

¹⁰Təkəma təng ɗəffa MTHLAKU ku ɓzi ka duna, tə ɗəffari ləkwa mbwa ata kəra Uzza. Antə MTHLAKU ku pthli Uzza har tə tsa mta tsu ata vəyari, kamnyar tə tsa ku ha tsiyari ka tsəkwar akwati na an seɗar vəi tə MTHLAKU ata.

¹¹Antə ɗəffa Dauda ku ɓzi, kamnyar tə MTHLAKU ku pumta ɗəffə bwarbwarkurərni ata kəra Uzza. Antə ba ashina mda ana kəga vəi ndaga abbər Perez Uzza, watau vəi tə Hyel hukthləmta Uzza.

¹²Antə vir nda Dauda ku thlivər Hyel. Tə tsa pəla abbər, “Laku madi antə I ata mwantə Akwati Alkawal ar Hyel ni akwa vəi tə I ata ri?”

¹³Apani tsa aɗi mwantə Akwati Alkawal ni akwa Bərniyir Dauda kəra wa. Ata vəyari tsa mwari ka ra sutiyari akwa mbwar Obed Edom na mdər Gath.

¹⁴Antə Akwati Alkawal ar Hyel ni ku ndzi akwa kəyir Obed Edom ni har thliya makər. Antə MTHLAKU ku vədzə barka aka mjir kutakəyirni ka shanga su tə tsa kəgari.