Read bura-pabir 1 Labar Na Waci 16 Bible Online

1 Labar Na Waci 16 - bura-pabir bible

1 Labar Na Waci 16

¹Antə da ku səntə Akwati Alkawal ar Hyel ni, ka vəi ni akwa kuta tent natə Dauda ɗəmhə kamnyar ni ni. Antə da hamta saɗaka mbamba ka saɗakar jakə mwardzi akəma Hyel.

²Aghəla tə Dauda ku kuri hamta saɗaka mbamba ka saɗakar jakə mwardzi, antə tsa vədzə barka aka mji akwa thləma MTHLAKU.

³Antə tsa ndəkəmta susəm ni aka shanga mjir Israila, shili ka mwanki. Tsa hamta aka waskəi kər buradi pal, ka dakulər kum ptsaptsa, ka kek tə mdə nam ka mpur anap ul'ula.

⁴Antə Dauda pwi mjir Lawi laga ka da hara kəthlər akəma Akwati Alkawal ar MTHLAKU ni. Da an mji na ata kiɗə barka akəla MTHLAKU na Hyelər Israila, ka usar ni, ka hu ni tədəku.

⁵Antə Asaf an ola ata kəra ɗa, tsuwa mdə na ata nu ni akwa olkur an Zakariya. Antə ar Yehiyel, ka Shemiramoth, ka Yehiyel, ka Mattithliya, ka Eliyab, ka Benaiya, ka Obed Edom, ka Yeyiyel, da an mjir tsa guləmayeri kəga yakandiyayeri. Ar Asaf tsa ata tsa liyar ɓu tsi.

⁶Antə Benaiya ka Yahaziyel na pristayeri an mjir mbur təmbəlayeri tədək saka akəma Akwati Alkawal ar Hyel.

⁷Tsu vir nda antə Dauda ku hamta aka Asaf ka maɗama'ni, ha ngəni na ar hu MTHLAKU ni.

⁸Usar gir MTHLAKU, ka giri ka thləmari, ka psəmnya su tə tsa hara aka shanga mji.

⁹Hara gir ha alari, ka giri fwaltə ni akwa ha, ka ngkər shanga surndatayeri tə tsa hara!

¹⁰Ka giri gaya ka thləmari na ɓɗakkarkara, ka giri hara kucali, giri na ana bara kəma MTHLAKU!

¹¹Bara gir MTHLAKU ka dunarni, ka giri bara si akəmari tədəku.

¹²Ɗangtə gir surndatayeri tə tsa hara, suayeri tə tsa hara na ana ndatə mda, kəga shariyayeri tə tsa thlamta.

¹³Mjir Israila, giri na nyarmbwar mafarni, kəkayeri ar Yakub, mjirni na carcarari.

¹⁴Tsa an MTHLAKU na Hyelər mburu, kuthlikurərni an ata kəra shanga duniya.

¹⁵Ɗangtə gir alkawalərni na ba saka madi, ka tsawayeri arni, na kamnyar zamanayeri dəpu dəpu,

¹⁶alkawal tə tsa kəta aka Ibrahim, ka kahyel tə tsa hara aka Ishaku,

¹⁷tsawayeri tə tsa thlamta kamnyar Yakub, alkawal na ba saka madi tə tsa kəta aka Israila,

¹⁸abbər, “I ata hamta ala gə tsəɗi Kanana, ka tsa ndzi nəɓwar nga ar kifa.”

¹⁹Sakatə da yiɗauwa daci, sakatə da raka, tə da mətəpi akwa tsəɗi ni,

²⁰sakatə da akwa kadla akwa tsəɗiyayeri zumzum, akwa likira kuthlikurayeri zumzum,

²¹tsa aɗi hir zhar ka mdə hara ala ɗa bwani wa, tsuwa tsa ku mpa aka kuthlyayeri kamnyar ɗa

²²abbər, “Giri aɗiya tsəkwar mji ngəni tə I carɓəla ni wa, tsuwa giri aɗiya dəkəi naɓiyayeri arna wa!”

²³Hara gir ha aka MTHLAKU, shanga giri na akwa duniya! Psəmnya gir tədək viri abbər tsa ku mbantə yeru.

²⁴Psəmnya gir səliyirni akwa nca mji, ngkər gir surndatayeri na ol'ola tə tsa hara, aka shanga mji.

²⁵Kamnyar MTHLAKU an ola, tsuwa kalkal ka mdə hu ni swaiswai, ka mdə thlivər ni ta shanga haptayeri.

²⁶Kamnyar shanga su tə mji ana vəngkər səli akari an haptayeri, amma MTHLAKU an namtə vəi na amtazi.

²⁷Səli ka olkur ana thlata akəlari, duna ka kucali an nghyantə vəi ndzəndziyirni.

²⁸Hu gir MTHLAKU, shanga giri na akwa duniya, ka giri nar səli ka olkur!

²⁹Hamta gir səli aka MTHLAKU, səli na ata ndzi kalkal ka thləmari. Səntə gir saɗaka akwa mbwarni, ka giri zuzuri ka vəngkər səli aka MTHLAKU, kamnyar darajarni na ɓɗakkarkara.

³⁰Kədzə gir akəmari, shanga giri na mjir duniya! Duniya ku ncidzi ɓəɓal, antə sur kənggərantə ni aɗi wa.

³¹Ka vəi na amtazi ndzi ka ɗəffu mwapu, ka duniya tsuwa hara kucali. Ka da pəla aka mji abbər, “MTHLAKU an ka kuthlikur!”

³²Ndzi ka manda na ola hara kuraku, ka shanga su na akwa. Ndzi ka mtakəu hara kucali, ka shanga su na akwa!

³³Ndzi ka shanga nfwayeri ar kuɓər nfwa, haptə kurakər kucali aka MTHLAKU! Kamnyar tsa akwa si, ka tsa hara shariya aka duniya.

³⁴Ka giri usar MTHLAKU, kamnyar tsa ana hara ɓɗakkur, kamnyar hirkurərni na ana palidzi wa an ba saka madi.

³⁵Ka giri pəla alari, “Mbantə yeru, Hyel ragai kamnyar ga an mdər mbantə yeru. Tsaptə yeru ata kəma duku, ka gə mbantə yeru ta durayeri ni, kamnyar ka yeru mzhi usar nga, ka hu thləma gə na ɓɗakkarkara.

³⁶Hu gir MTHLAKU na Hyelər Israila, na aɗi waci ka na aɗi ba saka madi.” Aghəla tə tsa kuri gari ni, antə shanga mji haptə kuraku akwa pəla, “Amin.” Antə da ku hu MTHLAKU.

³⁷Antə Dauda ku zhar Asaf kəga maɗama'ni akəma Akwati Alkawal ar MTHLAKU kamnyar ka da hara kəthlər anda, kalkal apatə mda ata turari tədək viri.

³⁸Tsuwa Dauda ku zhar Obed Edom ka maɗama'ni ngkwakumari ka ncisu, ka da hara kəthlər ni ata kəma duku kəga da. Obed Edom na ɓzər Yeduthlun ka Hosa an mjir sək nyarfu.

³⁹Tsuwa Dauda ku zhar Zadok na prist ka maɗada'ni na pristayeri, ka da hara kəthlər akwa Tentər MTHLAKU na ata kəra gar ahar Gibeyon ni.

⁴⁰Da ata hamta saɗaka mbamba aka MTHLAKU ata kəra bagaɗi tədək ɗəɗəpa ka tahaku, kalkal apatə MTHLAKU tsawa, apatə mdə rəbwamta ka hamta aka mjir Israila.

⁴¹Tsuwa Dauda ku pwi Heman, ka Yeduthlun, ka mambila mji tə mdə carɓəla, kamnyar hara ha ar usar MTHLAKU kamnyar hirkurərni na aɗi ana palidzi wa ba saka madi ni.

⁴²Antə Heman ka Yeduthlun an mjir mbur təmbəlayeri, ka tsa liyar ɓu tsi, ka kariyir su tsatsayeri damwa tə mda ana kəthlər kəgari akwa har hu Hyel. Tsuwa maɗa' Yeduthlun antə mdə pwi ɗa kamnyar sək nyarfu ni.

⁴³Antə shanga mji ku təra, tə waskəi ku ngka avəi akwa kəyirni. Antə Dauda tsuwa ku ngka aharngkiɗa kamnyar ka tsa wuli lapiyakur kutakəyirni.