Read bura-pabir 1 Labar Na Waci 18 Bible Online

1 Labar Na Waci 18 - bura-pabir bible

1 Labar Na Waci 18

¹Aghəla nda akwa saka laga təng Dauda jaktə dlər mjir Filistiya ka səm ɗa. Tsa dlutsə Gath ka diyayeri na kalaktə ni akwa tsiya mjir Filistiya.

²Tsuwa Dauda ku səm mjir Mowab akwa mpa, antə da ku ndzi akirari akwa nta alari tsəma.

³Tsuwa Dauda ku dlər Hadadezer na kuthlir Zoba na kudzəhə ka Hamath, ka səm ni. Tsa səm ni akwa sakatə Hadadezer ləɓəla kamnyar kəlar olkur tsəɗiyirni har ka mzhitə mnya Thlyagha Yufiretis ni.

⁴Antə Dauda ku dlutsə wagənayeri ar takurni dəpu pal, ka mjir fəl taku dəpu murfa, ka sojar səl dəpu sərkumari. Antə Dauda ɓəgələmta səla takwayeri ar ndəkər wagənayeri ni tə da ndzi nggurdəkəi, ka mbilar takwayeri laga kalkal na ata mzhi ndəkər wagənayeri aru pal.

⁵Sakatə mjir Siriya ar Damaska ku si ka da dlar Hadadezer na kuthlir Zoba, antə Dauda kurəmta sojayeri arɗa dəpu sərkumari ka suɗa.

⁶Antə tsa pwi sojayeri arni zara zara akwa Damaska na di kuthlikur tsəɗi Siriya. Antə mjir Siriya ni ku ndzi akirari akwa nta alari tsəma. Antə MTHLAKU ku nar nggyari su aka Dauda akwa kəlara vəi tə tsa ku mwari akwa.

⁷Antə Dauda ku dlutsə partauwayeri akəla mji na ol'olər sojayeri ar Hadadezer, ka sənta ahar Urushalima.

⁸Tsuwa Dauda ku fatə kariyayeri hang tə mdə nam ka əmza, akwa bərniyayeri na akira kuthlikur Hadadezer, watau na ahar Tibhath, ka Kun. Aghəla nda Solaman ku kəthlər ka əmzayeri ni akwa nam gəlam yimi, ka zhimbwalayeri, ka kariyayeri damwa na akwa mbwar vəngkər səli.

⁹Sakatə Tou na kuthlir Hamath nggata abbər Dauda ku mula aka shanga sojayeri ar Hadadezer na kuthlir Zoba,

¹⁰antə tsa thlentə ɓzərni Hadoram aka Kuthli Dauda ka tsa thlawarni, ka hu ni kamnyar tə tsa ku səm Hadadezer akwa mpa, kamnyar tə tədəku Hadadezer akwa mpa ka Tou. Antə Hadoram ku mwanta alari cautayeri tə mdə nam ka dinar ka adzərfa kəga əmza.

¹¹Antə Kuthli Dauda ku hamta shanga suayeri ngəni aka MTHLAKU, tsu apatə tsa hara ka adzərfa ka dinar natə tsa fata akwa tsəɗiyayeri tə tsa səm ɗa akwa mpa ni, watau Edom, ka Mowab, ka Ammon, ka Filistiya, ka Amalek.

¹²Antə Abishai na ɓzər Zeruwiya ku tsəgəi mjir Edom dəpu kumnya ncisu akwa Mular Una.

¹³Antə Dauda ku pwi sojayeri arni zara zara akwa Edom, tə shanga mjir Edom ku ndzi akirari. Antə MTHLAKU ku nar nggyari su aka Dauda akwa kəlara vəi tə tsa ku mwari akwa.

¹⁴Apani antə Dauda ku hara kuthlikur ata kəra shanga Israila, tsuwa tsa ku ndzi ka jirkur ka hara su na kalkal aka shanga mjirni.

¹⁵Antə Yowab natə thləma mama'ni Zeruwiya, an ata kəra sojayeri. Antə Yehoshafat na ɓzər Ahilud tsuwa an mdər rəbutə sur vəi.

¹⁶Antə Zadok na ɓzər Ahitub, ka Ahimelek na ɓzər Abiyathlar an pristayeri. Shavsha an sakatari,

¹⁷Benaiya na ɓzər Yehoyada an olər mjir Kerethli ka Pelethli na an mjir sək kəra Kuthli Dauda. Antə maɗashilər Dauda ku ndzi kwakunayeri na ol'ola akwa kəthlər arni.