Read bura-pabir 1 Labar Na Waci 19 Bible Online

1 Labar Na Waci 19 - bura-pabir bible

1 Labar Na Waci 19

¹Aghəla nda antə Nahash na kuthlir Ammon ku mti, antə ɓzərni Hanun ku dlu tsiyari ka ndzi kuthli.

²Antə Dauda pəla akwa ɗəffari, “I ata hara ɓɗakkur aka Hanun na ɓzər Nahash, kamnyar baba'ni ku hara ali ɓɗakkur.” Antə Dauda ku thlentə mji ka da ra səzəmta Hanun ata kəra mtər baba'ni. Sakatə mji tə Dauda thlentə ni ku mwari adzə Hanun akwa tsəɗi Ammon ka da səzəmta ni,

³antə kwakunayeri ar Ammon ni pəla aka Hanun abbər, “Ga ana wuta apa Dauda ana nar olkur aka baba' ngə ya tə tsa thlentə mjirni ka da sə səzəmta ngə ni? Ai da si kamnyar ka da wulɓəla ashira tsəɗi ni, ka da nggaɓəla ashirari, kamnyar ka da sə səm ni.”

⁴Antə Hanun ku ngkəgəi mjir Dauda ni, ka shimta shishir kumiya ɗa, ka thlagamta ləptər ɗa ata ɗəffu, ka zhar mpur kuciva ɗa aɓəla, ka psi ɗa tə da təra, antə da ku təra.

⁵Amma da aɗi ngka avəi wa, kamnyar da akwa ngga səli ka duna. Sakatə mdə pəla aka Dauda su na wutə mjirni ni, antə tsa thlentə mji laga ka ndər adzə mji tə mdə tsi səliyir ɗa ni abbər ka da ndzəndzi tsu ahar Yariko, har tar ma sakatə shishir kumiya ɗa ku ptsi ka kəla, kambəla da ngka avəi.

⁶Sakatə mjir Ammon ku nggaɓəla mwavərkur laku tə da ɓzamtə ɗəffa Dauda akwa, antə Kuthli Hanun ka mjir Ammon thlentə talent ar adzərfa dəpu pal, kamnyar hayatə wagənayeri ar taku ka sojayeri ar fəl taku akəla mjir Mesopotamiya, ka akəla mjir Maaka ka Zoba na akwa tsəɗi Siriya.

⁷Antə mjir Ammon ni ku hayatə wagənayeri ar taku dəpu makkumari ka suɗa, ka wutə dlara akəla kuthlir Maaka kəga sojayeri arni. Antə da səɓəla ka fəli adzə Medeba. Antə mjir Ammon səɓəla akwa diyayeri arɗa ɗəmhəɗəmhari kamnyar mpa.

⁸Sakatə Dauda nggata ata kəra ɗəmhədzə tə da hara ni antə tsa thlentə Yowab ka shanga sojayeri na mulmulari akwa mpa ka da ra dlər ɗa.

⁹Antə mjir Ammon ku səɓəla ka ntəhəmtadzi ata mnya nyarfur bərniyir ɗa kamnyar mpa, antə kuthlyayeri na thlata ahar Siriya kəga sojayeri arɗa si ka fəli shiɗa akwa bəbal kamnyar mpa.

¹⁰Sakatə Yowab wuta abbər mpa ni aɗi akəmari ka abwahilari, antə tsa carɓəla sojayeri na asəndə mpa ta shang akwa Israila, ka da kəɓa ka mjir Siriya ni.

¹¹Antə tsa pwi mambila sojayeri ni ka da kəɓa ka mjir Ammon na akira ɓzərma'ni Abishai ni.

¹²Antə Yowab pəla aka Abishai, “Ma sakatə gə wuta abbər mjir Siriya akwa mula ali, ka gə si kara dlar ra. Tsuwa ma I wuta abbər mjir Ammon akwa mula ala ga, I ata mwari kəi dlar nga.

¹³Ka gə ntsətədzi, ka mburu mpa kula thlivəra kamnyar mjir mburu, ka tsuwa kamnyar bərniyayeri ar Hyelər mburu. Tsuwa ka MTHLAKU hara su tə tsa wuta abbər ɓɗaku alari.”

¹⁴Antə Yowab ka sojayeri arni ku ləkəma kamnyar ka da baɗitə mpa ka mjir Siriya amma mjir Siriya ku hwi.

¹⁵Sakatə mjir Ammon wuta abbər mjir Siriya akwa hwi, antə da hwi tsuwa aka Abishai na ɓzərma' Yowab ni, ka ləvəi akwa kuta bərni. Antə Yowab ku ngka akwa Urushalima.

¹⁶Aghəla tə mjir Siriya wuta abbər mjir Israila ku mula ala ɗa, antə da thlentə mji ka da ra səntə mjir Siriya na aɓəla bwanda Thlyagha Yufiretis. Shofak na olər sojar Hadadezer an akwa pwar ɗa.

¹⁷Sakatə Dauda nggatə labar ngəni, antə tsa tsaptə shanga sojayeri ar Israila, ka fəlɓəla Thlyagha Jodan ka da. Antə tsa pu ɗa akwa layi ka kəma ɗa awul mjir Siriya, ɗəmhəɗəmhari kamnyar mpa. Antə da baɗitə mpa ni.

¹⁸Amma mjir Siriya ni ku jaktə hwi aka mjir Israila. Antə Dauda ku tsəgəi sojayeri ar Siriya na ana mpa ka wagənər taku dəpu murfa, ka kurəmta sojayeri ar səl dəpu nfwarkumari. Tsuwa tsa ku tsi Shofak na olər sojayeri arɗa.

¹⁹Sakatə kuthlyayeri na akira Hadadezer wuta abbər mjir Israila ku mula ala ɗa, antə da bara shwalatədzi ka Dauda, antə da ndzi akirari. Apani mjir Siriya aɗi hir jaktə dlar mjir Ammon kəra wa.