Read bura-pabir 1 Labar Na Waci 20 Bible Online

1 Labar Na Waci 20 - bura-pabir bible

1 Labar Na Waci 20

¹Akwa sakatə di ata mərta, sakatə kuthlyayeri ana ləɓəla akwa mpa, antə Yowab ləɓəla ka sojayeri ar Israila, ka ɓdləmta shanga diyayeri na akwa tsəɗi Ammon, ka mwari tsuwa ka kalaktə Rabba, ka dlərəmta ni, ka higəlantə ni. Amma ar Dauda tsa ndzi tsu avəi akwa Urushalima.

²Antə Dauda vu tə mdə ntsui dzakwar kuthlikur ar kuthlir ɗa, ka tsangkər alari tsa na Kuthli Dauda ni. Tsuwa kəgəɓkur dinar ar dzakwar kuthli ni ku mwanta apa kilogram makkumari ka nfwar. Tsuwa mdə dəɓatə dza dzakwar kuthlikur ni ka pelar dəɓa. Aghəla nda antə Dauda fatə shanga kariyayeri na hang tə tsa dlutsa akwa mpa akwa bərni nda ka sənta.

³Tsuwa Dauda ku fwaɓəla mjir bərni ni ka vu ɗa akwa hara kəthlər ka zartauwayeri, ka dəkayeri, kəga kəmayeri. Tsuwa tsa hara su ngəni ni aka shanga diyayeri ar mjir Ammon. Antə Dauda ka shanga sojayeri arni ku ngka ahar Urushalima.

⁴Aghəla saka laga antə mpa ku thlata akwa daɓwa mjir Israila ka mjir Filistiya ahar Gezer. Antə Sibbekai na mdər Husha ku tsi Sippai, pal akwa nca mjir nyarmbwar mji na gurjam gurjam ni. Antə mdə ku səm mjir Filistiya.

⁵Aghəla nda antə mpa damwa ku thlata akwa daɓwa ɗa ka mjir Filistiya, antə Elhanan na ɓzər Yayir ku tsi Lahmi na ɓzərma' Goliyath na thlata ahar Gath. Tsuwa olkur kuli mwasərni ni an kalkal ka dəla.

⁶Antə mpa damwa ku jaktə thlata ahar Gath, vəi tə gurjam laga aɗi na ka kuleng tsiyari ngkwa ngkwa ka kuleng səlari ngkwa ngkwa, da sərkumari ka nfwar ata kəma duku. Tsa ma tsa səɓəla akwa nyarmbwar mji na gurjam gurjam ni.

⁷Antə sakatə mdə ni hara mnya ɗimi aka mjir Israila, antə Jonathlan na ɓzər Shimeya, na ɓzərma' Dauda ku tsi ni.

⁸Nayeri ni an mjir nyarmbwar mji na gurjam gurjam ahar Gath natə Dauda ka sojayeri arni kurəmta ni.