Read bura-pabir 1 Labar Na Waci 26 Bible Online

1 Labar Na Waci 26 - bura-pabir bible

1 Labar Na Waci 26

¹Tsuwa nggədza laku tə mdə ndəkəi mjir sək nyarfu ni kutakəi kutakəi akwa zarayeri. Akwa kutakəyir Kora, mdə carɓəla Meshelemiya na ɓzər Kore, pal akwa nca kəkayeri ar Asaf.

²Tsuwa maɗashilər Meshelemiya an, Zakariya na yarakəma, ka Yediyayel na suɗkur, ka Zebadiya na makərkur, ka Yathniyel na nfwarkur,

³ka Elam na ntəfkur, ka Yehohanan na ngkwakur, ka Eliyehoyenai na murfəkur.

⁴Maɗashilər Obed Edom tsuwa an, Shemaiya na yarakəma, ka Yehozabad na suɗkur, ka Yowa na makərkur, ka Sakar na nfwarkur, ka Nethlanel na ntəfkur,

⁵ka Ammiyel na ngkwakur, ka Issakar na murfəkur, ka Peyullethlai na nciskur. Kamnyar Hyel ku vədzə barka aka Obed Edom.

⁶Antə Shemaiya na ɓzər Obed Edom tsuwa ku yaɓəla maɗashili na ku ndzi mji ol'ola akwa kutakəyir baba' ɗa, kamnyar da mji na asəndə kəthlər swaiswai.

⁷Antə maɗashilər Shemaiya an, Othni, ka Refayel, ka Obed, ka Elzabad, shang kəga maɗada'ni Elihu ka Semakiya, ku səndə kəthlər ni swaiswai.

⁸Shanga mji ngəni an kəkar Obed Edom. Antə da kəga maɗashilər ɗa kəga maɗada' ɗa shang asəndə hara kəthlər ni, tsuwa da ka dunar hara kəthlər ni. Antə shanga mjir kəthlər na səɓəla akwa nyarmbwar Obed Edom ni an mji ngkwakumari ka suɗa.

⁹Tsuwa Meshelemiya ka maɗashili kəga maɗada'ni na asəndə hara kəthlər ni, shanga ɗa ata kəma duku mji kumnya ncisu.

¹⁰Tsuwa Hosa na akwa kutakəyir Merari ka maɗashili. Antə Shimri an olər ɗa, kamnyar wala tə tsa aɗi an yarakəma wa, baba'ni ku vəi ni ola ata kəra ɗa.

¹¹Na suɗkur an Hilkiya, na makərkur an Tabaliya, na nfwarkur an Zakariya. Antə maɗashilər Hosa ata kəma duku kəga maɗada' ɗa shang mji kumnya makər.

¹²Antə mdə ndəkəi mjir sək nyarfu ni zara zara atar mji na ol'ola akwa nyarmbwar ɗa. Antə da ku hara kəthlər akwa mbwar MTHLAKU tsu apa mambila maɗada' ɗa na mjir Lawi tə mdə ndəkəi ala ɗa kəthlər.

¹³Tsuwa atar ndzəh kuriya antə kəlara kutakəi, ola ka ntsaha, ku carɓəla nyarfu tə da ata səkari.

¹⁴Antə kuriyar nyarfu na abwar raghəi ku mwari aka Shelemiya, antə kuriya tə mdə ndzəh kamnyar nyarfu na abwar yala tsuwa ku mwari aka ɓzərni Zakariya, mdə na ɗəɗu akwa hamta sauri.

¹⁵Kuriya na kamnyar nyarfu na abwar anəm ku mwari aka Obed Edom, antə kuriya na kamnyar sək kəra mbwar pwi su ku mwari aka maɗashilərni.

¹⁶Kuriya na kamnyar sək nyarfu na abwar ramta ka nyarfur Shalleketh atar laku na amta, ku mwari aka Shuppim ka Hosa. Antə mdə ku ndəkəi kəthlər sək ni akwa sakayeri tə mdə thlamta ata ata.

¹⁷Tədək viri mjir Lawi ngkwa an ata sək nyarfu na abwar raghəi, mji nfwar an ata sək nyarfu na abwar yala, ka mji nfwar abwar anəm, ka mji suɗsuɗa an ata sək mbwar pwi kari.

¹⁸Tsuwa mji aɗi nfwar na ata sək kəra lakur mwari akwa mbwa na raka abwar ramta ni, ka mji suɗa na akwa sək mbwa na raka ni.

¹⁹Ngəni an mjir sək nyarfu ni, da səɓəla akwa kutakəyir Kora ka ar Merari.

²⁰Tsuwa akwa nca mambila mjir Lawi, Ahija an ola ata kəra mbwar pwi su na akwa bəbal kutakəyir Hyel ni, ka tsuwa shanga suayeri tə mdə ku hamta aka Hyel.

²¹Ladan an pal akwa nca maɗashilər Gershon, antə tsa ku ndzi kəkar kutakəyayeri hang. Pal akwa nca kutakəyayeri ni an kutakəyir ɓzərni Yehiyeli.

²²Antə maɗashilər Yehiyeli an Zethlam ka ɓzərma'ni Yowel. Da an mjir wul mbwar pwi su na akwa kutakəyir MTHLAKU.

²³Tsuwa mdə ku hamta aka mjir kutakəyir Amram, ka ar Izhar, ka ar Hebron, ka ar Uzziyel kəthlər tə da ata harari.

²⁴Tsuwa kəkar Gershom na ɓzər Musa aɗi ka thləmari Shebuwel, antə tsa an ola ata kəra mbwayeri ar pwi su na akwa kutakəyir Hyel ni.

²⁵Antə maɗada'ni na atar Eliyezer an Rehabiya, ka Yeshaiya, ka Yoram, ka Zikri, ka Shelomoth.

²⁶Shelomoth ka maɗada'ni an mjir wul shanga mbwayeri ar pwi shanga su tə Kuthli Dauda, ka mji na ol'olər kutakəyayeri ar kəka, ka mji na ol'ola ata kəra sojayeri na dəpu dəpu, ka na aru aru, ka mambila sojayeri damwa, ku hamta aka Hyel.

²⁷Akwa nca suayeri tə da fata akwa mpa ni, mji ni ku pwi bwaduku kamnyar namtə mbwar MTHLAKU.

²⁸Antə Shelomoth ka maɗada'ni ku wulwul shanga suayeri tə Samiwal na mdər wulsu, ka Shawulu na ɓzər Kish, ka Abner na ɓzər Ner, ka Yowab na ɓzər Zeruwiya, hamta aka Hyel.

²⁹Akwa kutakəyir Izhar, mdə carɓəla Kenaniya ka maɗashilərni ka da ndzi mji ol'olər Israila ka mjir hara shariya akwa Israila. Arɗa da aɗi ka kəthlər akwa mbwar Hyel wa.

³⁰Tsuwa akwa kutakəyir Hebron, mdə carɓəla Hashabiya ka maɗada'ni, ka da hara kəthlər aka MTHLAKU, ka tsuwa aka kuthli akwa bwar Israila na abwar ramta ka Thlyagha Jodan. Antə hangkur shanga ɗa ata kəma duku an mji dəpu pal ka aru murfa, tsuwa shanga ɗa asəndə kəthlər ni swaiswai.

³¹Tsuwa akwa kutakəyir Hebron ni, Yeriya an olər ɗa, apatə mdə wuta akwa labar nyarmbwar ɗa. Akwa məva na nfwarkumarkur ar kuthlikur Dauda, antə mdə wul labar ni akwa kakaɗu, ka nggaɓəla abbər mji na asəndə kəthlər swaiswai akwa kutakəyir Hebron ni akwa ndzəndzi ahar Yazer na akwa Gileyad.

³²Yeriya ka maɗada'ni dəpu suɗa ka aru murfa na asəndə kəthlər ni swaiswai, natə da an mji na ol'olər kutakəyayeri ar kəkar ɗa. Antə Kuthli Dauda ku na ɗa olkur ata kəra mjir nyarmbwar Ruben, ka nyarmbwar Gad, ka nyarmbwar Manasse na abwar raghəi, ata kəra shanga su na ku tsəkwar kəthlər ar Hyel ka wujir na ar kuthli.