Read bura-pabir 1 Labar Na Waci 27 Bible Online

1 Labar Na Waci 27 - bura-pabir bible

1 Labar Na Waci 27

¹Ngəni an thləma mjir Israila na ku hara kəthlər soja aka kuthli. Da an mji na ku ndzi mji ol'olər kutakəyayeri ar kəkar ɗa, kəga mji na ol'olər sojayeri na ata kəra dəpu dəpu, kəga na ata kəra aru aru, shang kəga mambila sojayeri na ol'ola. Kəlara zara ka mji dəpu sərkumari ka nfwar. Tsuwa kəlara zara ana hara kəthlər ar thliya pal akwa məva.

²Akwa thliya na ntangkəma, mdə na ndzi ola ata kəra zara na ntangkəma ni an Yashobeyam na ɓzər Zabdiyel. Mji dəpu sərkumari ka nfwar an akwa zararni.

³Tsa səɓəla akwa kutakəyir Perez na bwadukwa nyarmbwar Yahuda. Tsuwa tsa an olər shanga sojayeri na ol'ola na ar thliya na ntangkəma.

⁴Akwa thliya na suɗkur, mdə na ndzi ola ata kəra zara ni an Dodai na kəkar Ahowa, antə Mikloth an mdər dlarərni. Antə tsa ka mji dəpu sərkumari ka nfwar akwa zararni.

⁵Akwa thliya na makərkur, mdə na ndzi ola ata kəra zara ni an Benaiya na ɓzər Yehoyada na prist. Antə tsa ka mji dəpu sərkumari ka nfwar akwa zararni.

⁶Ngəni an Benaiya na ndzi olər mji na Makkumari ni, tsuwa tsa an mdə na ka duna akwa nca ɗa. Antə ɓzərni Ammizabad ku sə dlu tsiyari aghəla nda ka ndzi ola ata kəra zara ni.

⁷Akwa thliya na nfwarkur, mdə na ndzi ola ata kəra zara ni an Asahel na ɓzərma' Yowab. Antə ɓzərni Zebadiya ku sə dlu tsiya baba'ni. Antə tsa ka mji dəpu sərkumari ka nfwar akwa zararni.

⁸Akwa thliya na ntəfkur, mdə na ndzi ola ata kəra zara ni an Shamhuth na kəkar Izra. Antə tsa ka mji dəpu sərkumari ka nfwar akwa zararni.

⁹Akwa thliya na ngkwakur, mdə na ndzi ola ata kəra zara ni an Ira na ɓzər Ikkesh, na mdər Tekowa. Antə tsa ka mji dəpu sərkumari ka nfwar akwa zararni.

¹⁰Akwa thliya na murfəkur, mdə na ndzi ola ata kəra zara ni an Helez na kəkar Ifrayim, na mdər Pelon. Antə tsa ka mji dəpu sərkumari ka nfwar akwa zararni.

¹¹Akwa thliya na nciskur, mdə na ndzi ola ata kəra zara ni an Sibbekai na kəkar Zera, na mdər Husha. Antə tsa ka mji dəpu sərkumari ka nfwar akwa zararni.

¹²Akwa thliya na əmdləkur, mdə na ndzi ola ata kəra zara ni an Abiyezer na mdər Anathloth, akwa tsəɗi Benjamin. Antə tsa ka mji dəpu sərkumari ka nfwar akwa zararni.

¹³Akwa thliya na kumkur, mdə na ndzi ola ata kəra zara ni an Maharai na kəkar Zera, na mdər Netofa. Antə tsa ka mji dəpu sərkumari ka nfwar akwa zararni.

¹⁴Akwa thliya na kumkantangkur, mdə na ndzi ola ata kəra zara ni an Benaiya na kəkar Ifrayim, na mdər Pirathlon. Antə tsa ka mji dəpu sərkumari ka nfwar akwa zararni.

¹⁵Akwa thliya na kumnya suɗkur, mdə na ndzi ola ata kəra zara ni an Heldai na kəkar Othniyel, na mdər Netofa. Antə tsa ka mji dəpu sərkumari ka nfwar akwa zararni.

¹⁶Mji na ol'ola ar nyarmbwayeri na akwa Israila an apani. Mdə na olər mjir nyarmbwar Ruben an Eliyezer na ɓzər Zikri, antə mdə na olər mjir nyarmbwar Simeyon an Shefatiya na ɓzər Maaka.

¹⁷Mdə na olər mjir nyarmbwar Lawi an Hashabiya na ɓzər Kemuwel, antə mdə na olər mjir kutakəyir Haruna an Zadok.

¹⁸Mdə na olər mjir nyarmbwar Yahuda an Elihu na ɓzərma' Dauda, antə mdə na olər mjir nyarmbwar Issakar an Omri na ɓzər Mikayel.

¹⁹Mdə na olər mjir nyarmbwar Zebulun, an Ishmaiya na ɓzər Obadiya, antə mdə na olər mjir nyarmbwar Naftali an Yerimoth na ɓzər Aziriyel.

²⁰Mdə na olər mjir nyarmbwar Ifrayim an Hosheya na ɓzər Azaziya, antə mdə na olər kutakəyir Manasse na abwar ramta an Yowel na ɓzər Pedaiya.

²¹Mdə na olər mjir nyarmbwar Manasse na abwar raghəi akwa Gileyad an Iddo na ɓzər Zakariya, antə mdə na olər mjir nyarmbwar Benjamin an Yaasiyel na ɓzər Abner.

²²Mdə na olər mjir nyarmbwar Dan an Azarel na ɓzər Yeroham. Antə nayeri ni an mji na ol'ola akwa nyarmbwayeri ar Israila.

²³Dauda aɗi rəbutə hangkur mji na ka məva ɗa aghəya sərkumari wa, kamnyar MTHLAKU ku hara alkawal abbər tsa ata hara ka mjir Israila ndzi hang apa sasəlkayeri na amtazi.

²⁴Yowab na ɓzər Zeruwiya ku baɗitə jikatə mji ni, amma tsa aɗi kuri wa, kamnyar ɗəffa Hyel ku ɓzi ata kəra Israila kamnyar jika mji ni. Antə mda aɗi mzhi vu hangkurər shanga mji ni akwa Kakaɗər Labar Kuthli Dauda wa.

²⁵Azmaveth na ɓzər Adiyel an ola ata kəra mbwar pwi kari ar kuthli. Jonathlan na ɓzər Uzziya an ola ata kəra mbwayeri ar pwi kari na akwa mtakəu, ka na akwa bərniyayeri damwa, ka na akwa diyayeri, kəga na akwa mbwayeri ar səka na nal nal.

²⁶Ezri na ɓzər Kelub an ola ata kəra mjir kəthlər fakayeri ar kuthli.

²⁷Shimeyi na mdər Rama an ola ata kəra mjir kəthlər akwa fakər anap. Zabdi na mdər Shefam an ola ata kəra yar nfur anap tə mdə wuta akwa fakəu, ka vəi pwi yimər anap ni.

²⁸Baal Hanan na mdər Geder an ola ata kəra yar nfur zaitun, ka yar nfur kamndə na ata kusar garayeri na abwar ramta. Yowash an mdə na ola ata kəra vəi pwi mal zaitun.

²⁹Shitrai na mdər Sharon an mdə na ola ata kəra ciɓayeri ar mwaɓi na akwa mtakər Sharon. Shafat na ɓzər Adlai an ola ata kəra ciɓayeri na akwa kuta mularayeri.

³⁰Obil na mdər Ishmayel an ola ata kəra dləkəmauwayeri. Yehdeyiya na mdər Meronoth an ola ata kəra mwala kwarayeri

³¹Yaziz na mdər Hagar an ola ata kəra təma kəga kwi. Shanga mji nayeri ni an mji ol'ola na ata kəra kari Kuthli Dauda.

³²Jonathlan na msəkər Dauda an mdər hamta sauri na ɓɗaku. Tsa an mdə na ana nggaɓəla su ɓɗaku, tsuwa tsa ka kər. Yehiyel na ɓzər Hakmoni an mdər wul maɗashilər kuthli.

³³Ahithlofel an mdər hamta sauri aka kuthli. Hushai na mdər Arki an pazhir kuthli.

³⁴Aghəla Ahithlofel, antə Yehoyada na ɓzər Benaiya ka Abiyathlar ndzi mjir hamta sauri aka kuthli. Yowab an mdə na ola ata kəra shanga sojayeri ar kuthli.