Read bura-pabir 1 Labar Na Waci 28 Bible Online

1 Labar Na Waci 28 - bura-pabir bible

1 Labar Na Waci 28

¹Antə Dauda ku kəga shanga mji ol'olər Israila, tə da tsaptədzi ahar Urushalima. Mji na tsaptədzi ni an mji na ol'olər nyarmbwayeri, ka mji na ol'olər zarayeri ar mji na akwa hara kəthlər aka kuthli, ka mji na ol'ola ata kəra sojayeri na dəpu dəpu, ka na aru aru, ka mjir wul kari kuthli kəga mwaɓiyayeri arni, ka na ar maɗa'ni, ata kəma duku kəga kwakunayeri arni, ka sojayeri na katsala, ka shanga sojayeri na mulmulari akwa tsəɗi ni.

²Antə Kuthli Dauda thlatə ka pəla, “Psi gir thləm ali, giri na maɗama'na kəga mjirna. I ku vu akwa ɗəffi abbər I ata həntə mbwar ghərəmtaghəra aka Akwati Alkawal ar MTHLAKU, ka tsuwa kulahər putə səl aka Hyelər mburu. Antə I ɗəmhədzi ka suayeri tə mda ata tsa mbwa ni kəgari.

³Amma Hyel pəla ali abbər aɗi I an ata həna alari mbwar haptə thləmari ni wa, kamnyar tə I ana mpa, tsuwa I ku pumta mamshi hang akwa mpa ni.”

⁴“Amma wala apani tsu MTHLAKU na Hyelər Israila ku carɓəla ra akwa shanga kutakəyirna kamnyar kəi ndzi kuthlir Israila ba saka madi. Kamnyar tsa ku carɓəla nyarmbwar Yahuda ka tsa ndzi nyarmbwar kuthlikur, ka carɓəla kutakəyir baba'na akwa nyarmbwar Yahuda ni, antə akwa kutakəyir baba'na tsuwa tsa carɓəla ra kəi ndzi kuthlir shanga Israila.

⁵MTHLAKU ku na ali maɗashili hang, antə akwa nca shanga maɗa' tə tsa hamta ali ni, tsa carɓəla ɓzərna Solaman, ka tsa an ndzi ata kəra dəkəl kuthlikur ar MTHLAKU ata kəra Israila.

⁶Tsa pəla ali, ‘Solaman na ɓzər nga an ata həna ali mbwa, ka mambila mbwayeri na akwa kuta bəbalər mbwa ni. Kamnyar I ku carɓəla Solaman ka tsa ndzi ɓzərna, antə I tsuwa ata ndzi təddarni.

⁷I ata nci kuthlikurərni ka tsa ndzi har ba saka madi, ma tsa ku ləkəma ka ɓəla tsawurna ka suayeri tə mdə thlamta abbər ka mdə hara, apatə tsa akwa harari ashina.’ ”

⁸“Antə kulini, mjirna, akəma Hyelər mburu, ka shanga mjir Israila na tsaptədzi, natə da an mjir MTHLAKU ni, I akwa kəga giri abbər ka giri vədzə hangkala giri, ka giri ɓəlatə shanga tsawur MTHLAKU na Hyelər giri. Atar apani antə giri ata mzhi ndzi mthlakər tsəɗi ngəni ɓɗaku ni, har ka giri sə zhari aka maɗa' giri apa kifa ba saka madi.”

⁹“Antə gə na ɓzərna Solaman, ka gə wuta abbər ga ku səndə Hyelər kəkar nga. Ka gə vəngkər səli aka Hyel, ka kələngkər alari ka ɗəffa gə shang, ka hangkala gə shang, ka hirər ɗəffa ga. Kamnyar MTHLAKU ana wul ɗəffa kəlara mda, ka nggaɓəla shanga su na akwa ɗəffa mda. Ma ga ku bara ni, ga ata wutə ni. Amma ma ga ku fwari ata kərari, tsa ata psəmta nga ba saka madi.

¹⁰Ka gə vədzə hangkala ga aka su ngəni, kamnyar MTHLAKU ku carɓəla nga abbər ga an ata hənta alari mbwar vəngkər səli ni. Ka gə ntsətədzi ka duna, ka gə hara kəthlər ni.”

¹¹Aghəla nda antə Dauda hamta aka ɓzərni Solaman lakur tsa galahər mbwar vəngkər səli ni, ka shanga bwayeri na adzə mbwa ni, kəga kutambwayeri ar pwi kari, kəga mbwayeri na amta, kəga kutambwayeri na avəivəi, kəga vəi kələmta watsəɓər biku.

¹²Dauda hamta alari shanga su tə tsa ɗəmha akwa ɗəffari kamnyar kuta bəbalər mbwar MTHLAKU ni, ka shanga mbwayeri na kalakta, kəga mbwayeri ar pwi kari na akwa mbwar Hyel, kəga mbwayeri ar pwi shanga cautayeri tə mdə hamta aka Hyel.

¹³Tsuwa Dauda ku hamta aka Solaman laku tə tsa ata ndəkɓəla kəthlər ar pristayeri ka na ar mjir Lawi, ka laku tə mda ata mwa ka shanga kəthlərayeri na akwa mbwar MTHLAKU, ka tsuwa jili kari tə mda ata kəthlər kəgari akwa mbwar MTHLAKU ni.

¹⁴Dauda ku thlamta hangkur dinar ka adzərfa natə mda ata kəthlər kəgari akwa nam shanga suayeri tə mda ata kəthlər kəgari akwa kəlara vəngkər səli.

¹⁵Tsa ku hamta hangkur dinar ka adzərfa tə mda akwa barari kamnyar nam pitəlayeri kəga zwalər kəsi pitəlayeri ni, kalkal ka kəthlər tə mda ata harari ka kəlara zwalər pitəla ni.

¹⁶Tsuwa tsa ku pəla hangkur dinar tə mda ata hara kəthlər kəgari akwa nam tebər ar putə buradi tə mdə hamta aka Hyel ni, ka tsuwa hangkur adzərfa tə mda ata kəthlər kəgari akwa nam tebər ar adzərfa,

¹⁷ka hangkur dinar na shini kamnyar nam cagwaliyayeri na ka kuleng, ka tasayeri na ol'ola, ka kapayeri, ka tasayeri ar buradi, ka tsuwa hangkur adzərfa tə mda ata kəthlər kəgari akwa nam kəlara tasar adzərfa,

¹⁸ka hangkur dinar na shini tə mda ata kəthlər kəgari akwa nam bagaɗi ar mba sur shiwur na msəra. Tsuwa tsa ku hamta aka Solaman lakur nam wagənər taku tə mda ata namari ka dinar, watau wagənər kəl kerubayeri ar dinar na pəbəlar ɓəɓəka ɗa ka hartə kəra Akwati Alkawal ar MTHLAKU ni.

¹⁹Antə Dauda pəla, “Shanga ɗəmhədzi ngəni MTHLAKU ku ncanta ali ata bəbal, atar rəbutə tə tsa hara ka tsiyari, tsuwa tsa ku hamta ali səndər su ata kəra shanga suayeri ngəni.”

²⁰Tsuwa Dauda ku pəla aka Solaman na ɓzərni abbər, “Ka gə ntsətədzi, ka ndzi ɓəɓal, ka gə hara kəthlər ni. Ga aɗiya thlivər wa, wala hara shishiɓə wa, kamnyar MTHLAKU na Hyelərna an ata vəi duku ka ga. Tsa aɗi ata zhar ngə wa, wala fwari ata kəra gə wa, har tar ma ga ku kuri shanga kəthlər ar hən mbwar MTHLAKU ni.

²¹Nggədza ma mdə ku kurtə ndəkəmta aka pristayeri ka mjir Lawi jili kəthlər tə da ata harari akwa mbwar Hyel. Tsuwa kəlara mdə na asəndə kəthlər ɓɗaku, tsa ɗəmhəɗəmhari kamnyar ka tsa dlar nga akwa kəlara kəthlər madi. Tsuwa shanga mji kəga mji ol'olər ɗa ata kələngkər aka shanga tsawur nga.”