Read bura-pabir 1 Labar Na Waci 5 Bible Online

1 Labar Na Waci 5 - bura-pabir bible

1 Labar Na Waci 5

¹Ruben an ɓzər sal na yarakəma ar Israila. Amma sakatə tsa ləmbwar mwala' baba'ni ka hara adiyakur, antə mdə dlutsə olkur yarakəmakur ni ka hamta aka maɗa' Yusuf. Antə apani mda aɗi ana jikau thləmari akwa nyarmbwar ɗa abbər tsa yarakəma wa.

²Wala tə mjir nyarmbwar Yahuda ku ndzi ka duna ta shanga mambila mji na akwa nyarmbwayeri, tsuwa tsa an nyarmbwar na ka kuthlikur, olkur ar yarakəmakur ku ndzi tsu akwa nyarmbwar Yusuf.

³Maɗashilər Ruben, ɓzər sal na yarakəma ar Israila an, Hanok, ka Pallu, ka Hezron, ka Karmi.

⁴Maɗashilər Yowel an, Shemaiya, ka Gog, ka Shimeyi,

⁵ka Mika, ka Reyaiya, ka Baal

⁶ka tsuwa Beyera. Beyera an ɓzərni natə Tiglath Pileser na kuthlir Assiriya kətə ka mwanta akwa tsəɗiyir mafakur ni. Beyera an mdə na ola akwa nyarmbwar Ruben.

⁷Nggədza thləma mji na yangkura Beyera, kəlara mda akwa nca ɗa mdə hamta thləmari ata ata baɗitə ka kəkarni, Yeyiyel na kuthli, ka Zakariya,

⁸ka Bela na ɓzər Azaz, na ɓzər Shema, na yangkura Yowel. Mji na yangkura Yowel ku ndzəndzi akwa bwar Arower har ka mwanta aka Nebo ka Baal Meyon.

⁹Kamnyar tə thlar ɗa ku hara hang akwa Gileyad, antə da ndzi akwa bwar raghəi ar tsəɗi ni, ka titilidzi akwa bəbal ni har ka mwanta ata mnya mtakə na mwari təbwar Thlyagha Yufiretis.

¹⁰Akwa zamanər Kuthli Shawulu, antə mjir nyarmbwar Ruben ku ra dlər mjir Hagar, ka kurəmta ɗa, ka ndzəndzi akwa kəyayeri arɗa, ka shanga bwar mjir Hagar na təbwar raghəi ka Gileyad.

¹¹Mjir nyarmbwar Gad an ndzi təbwar yala ka mjir nyarmbwar Ruben akwa bwar Bashan, har ka mwanta adzə Saleka təbwar raghəi.

¹²Yowel an kuthlir ɗa akwa Bashan, Shafam an mdə na akwa nu ni na suɗkur, kambəla Yanai ka Shafat.

¹³Mji na yangkura ɗa atar kutakəyir kəkar ɗa an, Mikayel, ka Meshullam, ka Sheba, ka Yorai, ka Yakan, ka Ziya, ka Eber. Da murfa.

¹⁴Nayeri ni an maɗashilər Abihayil na ɓzər Huri, na ɓzər Yarowa, na ɓzər Gileyad, na ɓzər Mikayel, na ɓzər Yeshishai, na ɓzər Yahdo, na akwa kutakəyir Buz.

¹⁵Antə Ahi na ɓzər Abdiyel, na ɓzər Guni, an olər kutakəyir kəkar ɗa.

¹⁶Antə mjir Gad ku ndzəndzi akwa Gileyad, akwa Bashan, ka diyayeri na kalaktə ɗa, kəga shanga vəi ɓəla ar Sharon.

¹⁷Shanga ndərayeri ngəni mdə ku rəbwamta akwa kakaɗər labar ar kəkayeri arɗa, akwa sakatə Yotam an kuthlir Yahuda, sakatə Yerobowam an kuthlir Israila.

¹⁸Mjir nyarmbwar Ruben, ka mjir nyarmbwar Gad, ka retar nyarmbwar Manasse, da ka sojayeri dəpu nfwarkumari ka nfwar ka aru murfa ka ngkwakumari. Tsuwa sojayeri ngəni masəku akwa kəthlər partau, ka katsakar, ka tsuwa lali.

¹⁹Antə da mwari ka dlər mjir Hagar, ka mjir Yetur, ka mjir Nafish, ka mjir Nodab.

²⁰Akwa kəlara sakatə sojayeri ni ku ləɓəla kamnyar dlər dawayeri arɗa, da ana hara adduwar bara dlara akəla Hyel, ka mbərsa abbər tsa ata dlar ɗa. Antə Hyel ana amsa ala ɗa. Antə tsa ku hara tə da ku səm mjir Hagar ka shanga mjir dlar ɗa, kamnyar tə da ku mbərsa ka tsa.

²¹Antə mjir nyarmbwa nayeri ni ku ngkəgəi mwaɓiyir mjir Hagar, ka na ar mji na dlar ɗa akwa mpa ni. Da fatə dləkəmau dəpu ntəfkumari, ka təma dəpu aru suɗa ka ntəfkumari, ka kwara dəpu suɗa. Tsuwa da ku fatə mji mafa dəpu aru ka mpika,

²²ka kurəmta mji hang, kamnyar tə mpa ngəni ni ar Hyel. Antə mjir nyarmbwayeri ar Ruben, ka na ar Gad, ka na ar Manasse na abwar raghəi ku ndzəndzi akwa tsəɗiyir mji ngəni har ka vədza aka sakatə mdə fatə ɗa ka mwantə ɗa akwa mafakur akwa tsəɗi damwa.

²³Antə mjir nyarmbwar Manasse na abwar raghəi ku hara hang. Antə da ndzəndzi akwa tsəɗi ni, baɗita akwa Bashan har ka mwanta adzə Baal Hermon, ka Senir, ka Gar Hermon təbwar yala.

²⁴Ngənayeri ni an thləma mji na ol'olər kutakəyayeri arɗa, Efer, ka Ishi, ka Eliyel, ka Aziriyel, ka Irmiya, ka Hodaviya, ka Yahdiyel. Shanga ɗa an sojayeri na katsala tə thləma ɗa ku tuwa, tsuwa da an mji ol'ola na sənsəndari akwa kutakəyayeri arɗa.

²⁵Amma da aɗi ndzi ka jirkur aka Hyelər kəkayeri arɗa wa. Da ku hara karwakur atar nu haptayeri ar mjir tsəɗi ni, mji tə Hyel kurəmta ala ɗa akəmata da asi.

²⁶Apani antə Hyelər Israila ku mbwantə ɗəffa Pul na kuthlir Assiriya, tə mda ana kəga ni tsuwa abbər Tiglath Pileser, abbər ka tsa dlər tsəɗi ni. Antə tsa ku fatə mjir Ruben, ka mjir Gad ka mjir Manasse na abwar raghəi, ka mwantə ɗa akwa mafakur ahar Hala, ka Habor, ka Hara, ka tsuwa ata mnya Thlyagha Gozan, antə da tsu anda ba ashina.