Read bura-pabir 2 Lab 10 Bible Online

2 Lab 10 - bura-pabir bible

2 Lab 10

¹Antə vir laga Rehobowam ku təra mwari ahar Shekem, kamnyar shanga mjir Israila ku tsaptədzi anda kamnyar ka da vəi ni kuthli.

²Sakatə Yerobowam na ɓzər Nebat nggata abbər mda ata vəi Rehobowam kuthli, antə tsa zhar Masar, vəi tə tsa hwi ta Kuthli Solaman ka ra ɗuwardzi akwa ni, ka ngka avi.

³Antə nyarmbwayeri na akwa yala ni thlenta aka Yerobowam abbər ka tsa si. Antə tsa ka shanga mjir Israila ku mwari ka pəla aka Rehobowam abbər,

⁴“Baba nga ku ɗar bwani ala yeru ka duna. Antə kulini, kəmta ala yeru bwani tə baba' nga vəngkər ala yeru ni, antə yeru ata hara shanga su tə gə pəla ala yeru.”

⁵Antə Kuthli Rehobowam pəla ala ɗa, “To, mwar giri, ka giri jaktə ngka adzə ra aghəla vir makər, ka giri dlu amsari.” Antə mji ni ku təra.

⁶Aghəla nda antə kuthli Rehobowam ku yu sauri akəla mji na halhalari, na ku hara kəthlər aka baba'ni Solaman sakatə tsa ka mpika. Tsa pəla ala ɗa abbər, “Jili sauri madi tə giri ata na ali kəi hamta aka mji ngəni ri?”

⁷Antə da pəla alari, “Ma ga ata ndzi ka hangkal aka mji ngəni, ka hara su na ata kəskəra da, ka gari na msəra ala ɗa, da ata hara kəthlər ala gə ka jirkur tədəku.”

⁸Amma Rehobowam aɗi hir kəthlər ka sauri tə mji ol'ola na alari ni wa. Tsa kətə sauri natə maɗadakwi na kəmarni ka tsuwa na ana kəthlər alari ku na alari.

⁹Antə tsa pəla ala ɗa, “Ni giri amsa tə kəi hamta aka mji na pəla ali abbər, ‘Kəmta ala yeru bwani natə baba' nga ku vəngkər ala yeru ni.’ ”

¹⁰Antə maɗadakwi na kəla ata kəma duku ka tsa ni pəla alari, “Nggədza amsa tə ga ata hamta aka mji na pəla abbər, ‘Baba nga ku ɗar bwani ala yeru kamta, antə kəmta ala yeru bu’ ni. Pəla ala ɗa abbər, ‘Gajir kulengi bitu ta kusara baba'na!

¹¹Antə ma baba'na ku vəngkər ala giri kəl na kəgəɓu, I ata jakəngkər aka kəl ndaga. Babana ku ɓu giri ka purpu, amma arna I ata ɓu giri ka kwandeng na ata kəta apa njir hiɗi.’ ”

¹²Antə aghəla vir makər Yerobowam ka mji ni ku ngka adzə Rehobowam, tsu apatə tsa ku tsawa ala ɗa.

¹³Antə kuthli ku ni ku nggəlar sauriyir mji na halhalari ni, ka shinau ala ɗa ka ɗəffu.

¹⁴Tsa kəthlər ka sauri tə maɗadakwi na alari ni, ka pəla ala ɗa, “Babana ku vəngkər ala giri kəl na kəgəɓu, amma I ata jakəngkər aka ndaga. Babana ku ɓu giri ka purpu, amma I ata ɓu giri ka kwandeng na ata kəta apa njir hiɗi.”

¹⁵Apani kuthli ni aɗi psi thləm aka mji ni wa, kamnyar su ngəni akwa pal ni thlata akəla MTHLAKU na Hyel. Tsa hara apani kamnyar ka tsa nghyaɓəla su tə tsa pəla aka Ahija na mdər Shilo abbər ka tsa pəla aka Yerobowam na ɓzər Nebat.

¹⁶Sakatə shanga mjir Israila ku wuta abbər kuthli ni aɗi psi thləm ala ɗa wa, antə da shinau aka kuthli ni abbər, “Su aɗi na damitə yeru ka Dauda wa, Su aɗi tə yeru ata barari akəla ɓzər Yesse wa. Mjir Israila, ka waskəi ngka avi aharngkiɗa! Mbura təra kazhar Rehobowam ma'ra, ka Dauda wul kutakəyirni!” Apani antə shanga mjir Israila ku ngka akwa kəyayeri arɗa.

¹⁷Amma Rehobowam ku ləkəma ka hara kuthlikur ata kəra mjir Israila na akwa bərniyayeri ar Yahuda.

¹⁸Antə Kuthli Rehobowam ku thlentə Adoniram natə tsa an ola ata kəra kəthlər dwalikur, ka tsa mwari adzə mjir Israila. Antə mjir Israila ni ku ndzəndzəhtə ni ka pela har tə tsa ku mti. Sakatə Kuthli Rehobowam ku nggatə labar ni antə tsa thlatə ka huva ka fəlwa wagənər takurni ka hwi ləhar Urushalima.

¹⁹Antə mjir Israila na abwar yala baɗitə nggəlar mjir nyarmbwar Dauda təng akwa saka ndaga har ka ba ashina.