Read bura-pabir 2 Lab 11 Bible Online

2 Lab 11 - bura-pabir bible

2 Lab 11

¹Sakatə Rehobowam ku si akwa Urushalima, antə tsa tsaptə sojayeri na akwa nyarmbwar Yahuda ka na akwa nyarmbwar Benjamin, na mulmulari akwa mpa, mji dəpu aru ka nciskumari. Antə tsa ɗəmhə ɗa kamnyar ka da ra mpa mjir Israila, ka ngka ka da akira kuthlikur arni.

²Amma MTHLAKU ku gari aka Shemaiya na mdər Hyel abbər,

³“Pəla aka Rehobowam na ɓzər Solaman na kuthlir mjir Yahuda, ka aka shanga mjir Israila na akwa Yahuda ka Benjamin abbər,

⁴‘MTHLAKU pəla, giri aɗiya ra mpa maɗama' giri mjir Israila wa. Ka waskəi ngka aviyarngkiɗa kamnyar su ngəni thlata akəli.’ ” Antə da ku kələngkər aka su tə MTHLAKU pəla ni, ka ngka. Antə da aɗi ra dlər Yerobowam ni kəra wa.

⁵Antə Rehobowam ku ndzəndzi akwa Urushalima, ka vu tə mdə jaktə hənɓəla bərniyayeri laga na akwa tsəɗi Yahuda kamnyar ngkatə ta dawayeri aləkwa tsəɗi ni.

⁶Bərniyayeri tə tsa jaktə hənɓəla ni an Bethlelehem, ka Etam, ka Tekowa,

⁷ka Bethzur, ka Soko, ka Adullam,

⁸ka Gath, ka Maresha, ka Zif,

⁹ka Adorayim, ka Lakish, ka Azeka,

¹⁰ka Zora, ka Ayalon, ka Hebron. Shanga ɗa an kauyayeri na akwa katangga akwa Yahuda ka Benjamin.

¹¹Tsa vu tə mdə həntə katanggayeri na ka duna, ka pwi mji na ol'olər sojayeri ata kəra kəlara pal akwa nca bərniyayeri ni. Tsuwa tsa ku pwi kari susəma hang kəga mal, kəga yimər anap akwa kəlara bərni ni.

¹²Tsuwa Rehobowam ku tsaptə partauwayeri kəga mwasayeri akwa shanga bərniyayeri ni kamnyar ka da ndzi ka duna swaiswai. Atar apani antə tsa ku kəsi bwar Yahuda ka Benjamin akirari.

¹³Antə pristayeri ka mjir Lawi na akwa shanga Israila ku ngka adzə Rehobowam akwa shanga vəyayeri tə da ndzəndzi akwa.

¹⁴Kamnyar mjir Lawi ku təra kazhar fakər ɗa kəga kariyir ɗa, ka si akwa Yahuda ka Urushalima, kamnyar Yerobowam ka maɗa'ni ku ngkata ala ɗa kəthlər pristkur aka MTHLAKU.

¹⁵Antə Yerobowam pwi pristayeri na ar kərari akwa vəi haptayeri na ol'ola, ka ata kəra haptayeri na dludzər nciwayeri ka kənayeri natə tsa namta.

¹⁶Amma akwa kəlara nyarmbwa na akwa Israila mji aɗi na ku hamta ɗəffa ɗa kamnyar bara MTHLAKU na Hyelər Israila. Antə mji ngəni ku nu mjir Lawi ka mwari ahar Urushalima kamnyar ka da hamta saɗaka aka MTHLAKU na Hyelər kəkayeri arɗa.

¹⁷Antə da ku hara tə kuthlikur ar Yahuda ndzi ka duna. Tsuwa da ku hara məva makər akwa mbwa kir aka Rehobowam na ɓzər Solaman, da akwa nu shanga su tə Kuthli Dauda ka Kuthli Solaman ku tsawa ala ɗa.

¹⁸Rehobowam ku kəl Mahalath na ngkwar Yerimoth na ɓzər Dauda, natə mama'ni an Abihayil na ngkwar Eliyab na ɓzər Yesse.

¹⁹Antə Mahalath ku yaɓəla alari maɗashili makər, natə da an Yewush, ka Shemariya, ka Zaham.

²⁰Aghəla nda, tsa ku kəl Maaka na ngkwar Absalom, antə Maaka ku yaɓəla alari Abija, ka Attai, Ziza, ka Shelomith.

²¹Tsuwa Rehobowam ku hir Maaka na ngkwar Absalom təramta shanga mwankirni ka maɗankwi tə tsa fatsa, kamnyar tsa ku kəl mwanki kumnya ncisu ka fatə maɗankwi damwa ngkwakumari. Tsuwa da ku yaɓəla alari maɗashili sərkumari ka ncisu ka maɗankwi ngkwakumari.

²²Antə Rehobowam ku vəi Abija na ɓzər Maaka tə tsa ndzi maina na olta shang akwa nca maɗadarni, kamnyar tsa akwa bara sə vəi ni kuthli.

²³Antə Rehobowam hara ɗəɗukur ka na olkur aka mambila maɗa'ni ni tə da ndzi ata kəra tsəɗiyayeri laga na akwa Yahuda ka Benjamin, ka akwa shanga bərniyayeri na akwa katangga. Tsuwa tsa ku hamta ala ɗa susəma hang, ka kəta ala ɗa mwanki hang.