Read bura-pabir 2 Lab 12 Bible Online

2 Lab 12 - bura-pabir bible

2 Lab 12

¹Sakatə kuthlikur ar Rehobowam ku ncidzi ka ndzi ka duna, antə tsa ka shanga mjir Israila na adzə ni ku zhar nu tsawur MTHLAKU.

²Kamnyar tə da ku ndzi kula jirkur aka MTHLAKU, antə akwa məva na ntəfkur ar kuthli Rehobowam, Shishak na kuthlir Masar ku dlər Urushalima.

³Shishak ku si ka wagənayeri ar taku dəpu pal ka aru suɗa, ka mjir fəl taku dəpu ngkwakumari, ata kəma duku ka sojayeri hang na ajikatədzi wa, watau sojar tsəɗi Libiya, ka tsəɗi Sukki, ka tsəɗi Ithliyopiya, na thlata ahar Masar.

⁴Antə tsa ku səm bərniyayeri na akwa katangga akwa Yahuda, har ka mwari ahar Urushalima.

⁵Antə naɓi Shemaiya ku si adzə Rehobowam ka mji ol'olər Yahuda na tsaptədzi ahar Urushalima kamnyar thlivər Shishak. Antə tsa pəla ala ɗa, “MTHLAKU pəla, ‘Giri ku nggəlar ra, antə I ata zhar giri aka Shishak.’ ”

⁶Antə kuthli ka mji ol'olər Israila ni ku tərghəi kəra ɗa ka pəla, “MTHLAKU ku hara su na kalkal.”

⁷Sakatə MTHLAKU ku wuta abbər da ku tərghəi kəra ɗa, antə MTHLAKU jaktə gari aka Shemaiya abbər, “Təng tə da ku tərghəi kəra ɗa, I aɗi ata shamta ɗa kəra wa, amma I ata ɗar dlar ɗa raka. I aɗi ata kəthlər ka Shishak kamnyar pumta ɗəffə bwarbwarkur arna ata kəra Urushalima wa.

⁸Amma wala apani da ata ndzi akirari, kamnyar ka da nggaɓəla zumzumkur ndzi akiri ka ndzi akira kuthlir tsəɗiyayeri damwa.”

⁹Apani antə Shishak na kuthlir Masar ku si ka dlər Urushalima, ka fatə kari na akwa mbwar MTHLAKU ka na akwa kəi kuthlikur. Tsa famnya shanga su, purəm kəga partauwayeri ar dinar natə Solaman namta.

¹⁰Amma kuthli Rehobowam ku jaktə namtə partauwayeri damwa ka əmza ata vəya ɗa, ka hamta ɗa akwa tsiya mji na ol'ola ata kəra mjir sək nyarfur ləvəi akwa kəi kuthlikur ni.

¹¹Antə kəlara sakatə kuthli akwa ləkwa mbwar MTHLAKU, mjir gadi ni ana fatə partauwayeri ni akwa tsiya ɗa ka da pwar ni kəgari. Ma sakatə tsa ku kuri vəngkər səli ka səɓəla, da ata jaktə ngka ka da akwa mbwar gadi ni.

¹²Antə kamnyar tə Rehobowam ku tərghəi kərari, ɗəffa MTHLAKU ku pəpəi. Antə Hyel aɗi hilantə ni purəm wa. Antə su ku jaktə mwa ɓɗaku akwa Yahuda.

¹³Apani antə Kuthli Rehobowam ku dunautə kərni akwa kuthlikur akwa Urushalima. Tsa ka məvari nfwarkumari ka ntang ka yarni sakatə tsa baɗitə hara kuthlikur ni, antə tsa ku hara kuthlikur ar məva kumnya murfa akwa Urushalima, bərni tə MTHLAKU ku carɓəla akwa shanga Israila, abbər anda antə mda ata vəngkər səli alari. Thləma mama' Rehobowam an Naama, ngkwar mjir Ammon.

¹⁴Antə Rehobowam ku hara su na ɗimi, kamnyar tsa aɗi vu hangkalari akwa bara MTHLAKU wa.

¹⁵Mambila suayeri tə Rehobowam hara akwa kuthlikurərni, baɗita ata səlari har tsikərari, an rəbutə rəbutari akwa Kakaɗər Labar Ar Naɓi Shemaiya, ka akwa Kakaɗər Iddo Na Mdər Wulsu. Tsuwa mpa ku ləkəma ka thlata akwa daɓwa Rehobowam ka Yerobowam.

¹⁶Antə Rehobowam ku mti ka ra wutə kəkayeri arni, antə mdə ku harəmta ni akwa Urushalima, na Bərniyir Dauda. Antə Abija na ɓzərni ku dlu tsiyari ka ndzi kuthli.