Read bura-pabir 2 Lab 13 Bible Online

2 Lab 13 - bura-pabir bible

2 Lab 13

¹Akwa məva na kumnya nciskur ar kuthli Yerobowam na ɓzər Nebat, antə Abija baɗitə hara kuthlikur ata kəra Yahuda.

²Antə tsa hara kuthlikur ar məva makər akwa Urushalima. Thləma mama'ni an Mikaiya, ngkwar Uriyel ahar Gibeya. Aghəla nda təng mpa thlata akwa daɓwa Abija ka Yerobowam.

³Antə Abija fatə sojayeri arni dəpu aru nfwar na masəku akwa mpa, ka ləɓəla ka da akwa mpa, antə Yerobowam tsuwa ku ntəhəmta sojayeri arni na carcarari dəpu aru ncisu.

⁴Antə Abija ku thləthlata ata Gar Zemarayim na akwa tsəɗi gar ar Ifrayim ka pəla, “Psi gir thləma giri ali, Gə na Yerobowam, ka shanga giri na mjir Israila!

⁵Giri aɗi sənda abbər MTHLAKU na Hyelər Israila ku hamta kuthlikur ar Israila aka Dauda kəga nyarmbwarni atar alkawalər una tə mda amzhi ɓəliyari wa ya?

⁶Amma wala apani Yerobowam na ɓzər Nebat, na buɗar Solaman na ɓzər Dauda, ku thlatə ka hara kər ɓəɓalkur aka mthlakərni.

⁷Tsa tsaptə maɗa' shambar laga na ɗimi adzə ni, abbər ka da nggəlar ndərər Rehobowam na ɓzər Solaman, sakatə Rehobowam tsu ɓzəngkyar tə kərari aɗi ɗuwul katagu wa, antə tsa aɗi mzhi nggyari ɗa wa.”

⁸“Antə kulini giri akwa dzama abbər giri ata mzhi ngkatə kuthlikur tə MTHLAKU an vəi akwa tsiya kəkayeri ar Dauda ya? Jiri, giri ka sojayeri dlama dlama, amma kənayeri tə Yerobowam nam ka dinar an hyelər giri!

⁹Nənga giri aɗi kədləɓəla pristayeri ar MTHLAKU na akwa nyarmbwar Haruna, ka mambila mjir Lawi wa ya? Tsuwa giri aɗi ka pwi pristayeri ar kəra giri tsu apatə mjir tsəɗiyayeri damwa ana hara? Kəlara mdə na ku si ka ɓzər gyal ka gamayeri murfa kamnyar hamta kərni, tsa ata mzhi ndzi prist aka suayeri ngəni tə giri ana kəta abbər da hyel ni!”

¹⁰“Amma ar yeru, MTHLAKU an Hyelər yeru, tsuwa yeru aɗi fwari ata kərari wa. Yeru ka pristayeri na akwa hara kəthlər aka MTHLAKU, natə da akwa nyarmbwar Haruna, ka tsuwa mjir Lawi na akwa dlar ɗa.

¹¹Da ana hamta aka MTHLAKU saɗaka mbamba ka sur shiwura na msəra tədəku ɗəɗəpa ka tahaku, ka pwi Buradi ar hamta aka Hyel ni akwa layi ata tebər tə mdə nam ka dinar swakti, ka da njiu u'u akwa pitəlayeri na ata zwalər kəsi pitəla tə mdə nam ka dinar ni tahaku tahaku. Kamnyar ar yeru, yeru akwa ɓəla su tə MTHLAKU na Hyelər yeru ku tsawa ala yeru, amma ar giri, giri ku psəmta ni.

¹²Nggədza giri akwa wulari abbər Hyel adzə yeru, tsuwa tsa an akwa pwar yeru. Pristayeri arni akwa mbur ala yeru təmbəl ar ləkwa mpa kamnyar ka yeru baɗitə mpa giri. Mjir Israila, giri aɗiya mpa ka MTHLAKU na Hyelər kəkayeri ar giri wa, kamnyar giri aɗi ata səm wa.”

¹³Tsuwa akwa saka ndaga, Yerobowam ku kurtə thlentə sojayeri arni laga ka da ra ɗuwardzi abwahili ka sə səɓəla ata kəra mjir Yahuda, antə sojayeri arni na abwakəma ata dlər mjir Yahuda na abwakəma ɗa.

¹⁴Sakatə mjir Yahuda wuta abbər mji akwa dlər ɗa abwahili ka abwakəma, antə da tuwa aka MTHLAKU abbər ka tsa dlar ɗa. Antə pristayeri ku mbur təmbəl,

¹⁵antə sojayeri ar Yahuda ku tsa ləlu ka kuraku ar ləkwa mpa. Sakatə mjir Yahuda ku haptə kuraku ngəni, antə Hyel ku nggyari Yerobowam ka shanga sojayeri arni, tə da ku hwi aka Abija ka sojayeri ar Yahuda.

¹⁶Sojayeri ar Israila ku hwi aka sojayeri ar Yahuda, antə Hyel ku hamta ɗa aka sojayeri ar Yahuda.

¹⁷Antə Abija ka sojayeri arni ku kurəmta sojayeri ar Israila hang ka duna, da kurəmta sojayeri na masəkur mpa dəpu aru ntəfu.

¹⁸Apani antə mdə ku səm mjir Israila ata saka ndaga. Tsuwa mjir Yahuda ku səmi kamnyar tə da ku mbərsa ka MTHLAKU na Hyelər kəkayeri arɗa.

¹⁹Antə Abija ku nu ghəla Yerobowam ka dlutsə bərniyayeri laga akəlari.Tsa dlutsə Bethlel ka kauyayeri na kalaktə ni, ka Efron ka kauyayeri na kalaktə ni.

²⁰Apani Yerobowam aɗi jaktə wutə dunar kuthlikur akwa sakatə Abija akwa kuthlikur wa. Antə MTHLAKU ku tsa ni antə tsa ku mti,

²¹amma ar Abija kuthlikur arni ku jakə ka duna. Tsa ku kəl mwanki kumnya nfwar, ka wutə maɗashili sərkumari ka suɗa, ka maɗankwi kumnya ngkwa.

²²Mambila kəthlərayeri tə Abija hara, ka laku tə tsa hara su akwa, ka gariyayeri arni shang, mdə ku rəbutə ɗa akwa Kakaɗər Labar ar Naɓi Iddo