Read bura-pabir 2 Lab 14 Bible Online

2 Lab 14 - bura-pabir bible

2 Lab 14

¹Antə Abija ku mti, antə mdə ku harəmta ni akwa Bərniyir Dauda, watau akwa Urushalima. Antə Asa na ɓzərni ku ləkwa kuthlikur ata vəyari. Antə tsəɗi ni ku wutə ndzəndzi lapiyakur har məva kuma.

²Antə Asa ku hara su na ɓɗaku, ka kalkal ata nca MTHLAKU na Hyelərni.

³Tsa ku famta bagaɗiyayeri ar haptər durayeri damwa, kəga vəi vəngkər səli na ata kəra garayeri, ka ɓəgələmta shanggamayeri, ka nthləgəmta udzəm haptayeri ar Ashera.

⁴Asa ku tsawa aka mjir Yahuda ka da bara MTHLAKU na Hyelər kəkayeri arɗa, ka tsuwa ka da ɓəlatə tsawayeri arni, kəga suayeri tə tsa thlipa ala ɗa.

⁵Tsuwa tsa ku fwaɓəla shanga vəi vəngkər səli na ata gar, kəga bagaɗiyayeri ar mba sur shiwura na akwa shanga bərniyayeri ar Yahuda. Antə tsəɗi ni ku wutə ndzəndzi lapiyakur akwa sakarni.

⁶Tsa ku jaktə namtə bərniyayeri na akwa Yahuda, təng tə lapiyakur aɗi akwa tsəɗi ni. Kamnyar akwa məvayeri ndaga mda aɗi na akwa mpa ka tsəɗi Yahuda wa, kamnyar MTHLAKU ku na alari ndzəndzi lapiyakur.

⁷Antə tsa pəla aka mjir Yahuda, “Ndzi ka mburu jaktə namtə bərniyayeri ngəni, ka kalaktə ɗa ka katanggayeri, ka mbwayeri na nal nal, ka pu nyarfayeri tə mda ata hartari ka liya. Tsəɗi ni tsu ar mburu, kamnyar mburu ku bara MTHLAKU na Hyelər mburu. Mburu ku bara ni, antə tsa ku na ala mburu lapiyakur ar tsəɗi akwa kəlara bwa.” Antə da ku hara hənayeri ka ləkəma.

⁸Kuthli Asa ka sojayeri arni dəpu aru makər akwa Yahuda, ɗəmhəɗəmhari ka partauwayeri na ol'ola kəga mwasayeri. Tsuwa tsa ka sojayeri mji dəpu aru suɗa ka nciskumari na thlata akwa nyarmbwar Benjamin, kəlara mda ka partau na raka ka lali. Tsuwa shanga mji ngəni an mji na katsala ka duna akwa mpa.

⁹Antə Zera na mdər Ithliyopiya ku səɓəla ka sojayeri milliyan pal, ka wagənayeri ar taku aru makər, har ka si ahar Maresha.

¹⁰Antə Asa ku ləɓəla kamnyar ka da kəɓa ka tsa, tə tsa pwi sojayeri arni akwa mular ar Zefathla kudzəhə ka Maresha.

¹¹Antə Asa ku tuwa aka MTHLAKU na Hyelərni abbər, “MTHLAKU, mda aɗi na mzhi dlara apa gə wa, akwa sakatə mdə na hava ku kəɓa ka mdər duna. Dlar yeru, MTHLAKU na Hyelər yeru, kamnyar yeru akwa vəkər ka ga! Tsuwa akwa thləma ga antə yeru ku si ka yeru kəɓa ka dlamar sojayeri ngəni. Antə MTHLAKU, ga an Hyelər yeru! Antə ga aɗiya zhari ka mdə mula ala gə wa.”

¹²Apani antə MTHLAKU ku nggyari sojayeri ar Ithliyopiya akəma Asa na kuthlir Yahuda ka sojayeri arni. Antə sojar Ithliyopiya ku hwi.

¹³Antə Asa ka sojayeri arni ku nu ɗa har ka mzhitə Gerar. Antə da ku kurəmta sojar Ithliyopiya har tə da aɗi mzhi jaktə tsaptədzi ka ləkəma ka mpa wa, kamnyar MTHLAKU ka sojayeri arni an tsəgəi ɗa. Antə sojayeri ar Yahuda ku fatə kari hang akəla sojayeri ar Ithliyopiya.

¹⁴Antə da ɓdləmta shanga bərniyayeri na kalaktə Gerar, kamnyar MTHLAKU vu tə thlivər ku ngkəi ɗa. Antə sojayeri ar Yahuda ku famnya shanga su tə da ku mwaɓta akwa bərniyayeri ni, tsuwa kari aɗi hang anda.

¹⁵Antə da huzamta tentər mjir ɓəla thla, ka fatə təma, kəga kwi, kəga dləkəmau hang. Antə da ngka ahar Urushalima.