Read bura-pabir 2 Lab 15 Bible Online

2 Lab 15 - bura-pabir bible

2 Lab 15

¹Aghəla nda amtə mambələr Hyel ku si ata kəra Azariya na ɓzər Oded,

²antə tsa ku ləɓəla kamnyar thlakəma Asa, tə tsa pəla alari, “Psi thləm ali, gə na Asa, ka shanga giri na mjir Yahuda ka mjir Benjamin! MTHLAKU ata vəi duku ka giri, kəlara sakatə giri ata vəi duku ka tsa. Ma giri ku bara ni, giri ata wutə ni, amma ma giri ku zhar ni, tsa ata zhar giri.

³Kamnyar Israila ku fəi kula wutə Hyel na jirari, ka kula prist na ata thlipə su, ka tsuwa kula tsawur Hyel.

⁴Amma akwa sakatə da akwa ɗar bwani, antə da shinardzi abwar MTHLAKU na Hyelər Israila, ka bara ni, antə tsuwa da ku wutə ni.

⁵Akwa sakayeri na ndaga msərmsərkur aɗi aka mdə na ata ləɓəla wala aka mdə na ata ləvəi akwa tsəɗi ni wa, kamnyar bwani na mwavər ku si ata kəra shanga mji na akwa tsəɗi ni akwa kəlara bwa.

⁶Mjir tsəɗi ni ku ndəkəmtadzi, natə har mji ngəni akwa mpa mji ngənda, bərni ka bərni akwa mpa, kamnyar tə Hyel ku pungkər ala ɗa bwaniyayeri zumzum.

⁷Amma ar giri, ka giri ntsətədzi, dza giri aɗiya mtə wa, kamnyar giri ata wutə watsəɓər kəthlərər giri.”

⁸Sakatə Asa ku nggatə ndərayeri ngəni akəla naɓi Azariya na ɓzər Oded, antə tsa ku ntsətədzi. Antə tsa ku famta haptayeri na an sur cika akwa shanga tsəɗi Yahuda ka Benjamin, ka akwa bərniyayeri natə tsa dlutsa akwa tsəɗi garayeri ar Ifrayim. Antə tsa jaktə namtə bagaɗi ar hamta saɗaka aka MTHLAKU na akəma galahər mbwar vəngkər səli aka MTHLAKU.

⁹Antə tsa tsaptə shanga mjir Yahuda ka Benjamin ka mji na thlata ahar Ifrayim, ka Manasse, ka Simeyon, na si ka ndzi akwa nca ɗa. Kamnyar mji hang na akwa Israila ku ngka adzə Asa akwa Yahuda sakatə da wuta abbər MTHLAKU na Hyelərni adzə ni.

¹⁰Antə da tsaptədzi ahar Urushalima akwa thliya na makərkur ar məva na kumnya ntəfkur ar kuthlikur Asa.

¹¹Antə vir nda da ku hamta saɗaka aka MTHLAKU ka mwaɓiyayeri laga akwa nca natə da fatsa akwa mpa ni, kamnyar da ku si ka gyal aru murfa ka təma dəpu murfa.

¹²Antə da ku mbwi alkawal abbər da ata bara MTHLAKU na Hyelər kəkayeri arɗa ka ɗəffa ɗa shang, ka hangkala ɗa shang.

¹³Tsuwa kəlara mdə na aɗi ata bara MTHLAKU na Hyelər Israila wa, mda ata tsi ni, wala tsa an ɓzəngkyar wala mda ola, wala tsa an mda sal wala mdə mwala.

¹⁴Da ku hara kahyel aka MTHLAKU ka kuraku na ola, akwa hara kuraku ka mbur təmbəlayeri.

¹⁵Antə shanga mjir Yahuda ku hara kucali ata kəra kahyel tə da hara ni, kamnyar da ku hara ka ɗəffa ɗa shang, ka bara ni ka hangkala ɗa swakti, antə apani da ku wutə ni. Antə MTHLAKU ku na ala ɗa ndzəndzi lapiyakur akwa kəlara bwa.

¹⁶Tsuwa har Kuthli Asa ku kəli Maaka na kəkarni kazhar vəi ndzəndziyir kuthli mwalakur, kamnyar tə tsa an namtə haptu Ashera na sur cika ni. Asa ku tadərəmta haptu ni, ka pukthləmta ni, ka mbamta ni akwa Mular Kidron.

¹⁷Wala tə Asa aɗi famta mbwar haptayeri ni kazhar Israila wa, tsa ku kəsi Hyelərni ka ɗəffari duku akwa shanga ndzəndziyir mpikari.

¹⁸Tsuwa tsa ku səntə cautayeri natə babani hamta aka Hyel, ka cautayeri natə tsa ka kərari an hamta, ka pwi ɗa akwa mbwar vəngkər səli aka Hyel. Cautayeri ngəni an adzərfa, ka dinar, ka kari kəthlərayeri damwa.

¹⁹Antə mpa aɗi jaktə thlatə kəra wa, tar akwa məva na makkumari ka ntəfkur ar kuthlikur Asa.