Read bura-pabir 2 Lab 16 Bible Online

2 Lab 16 - bura-pabir bible

2 Lab 16

¹Akwa məva na makkumari ka ngkwa ar kuthlikur Asa, antə Baasha na kuthlir Israila ku mwantə dləra aka Yahuda, ka pwi sojayeri arni akwa Rama kamnyar ngkatə ta mda asəɓəla wala ləvəi adzə Asa na kuthlir Yahuda.

²Antə Asa ku fata adzərfa ka dinar na akwa mbwar pwi su na akwa mbwar MTHLAKU, ka na akwa kəi kuthlikur, ka thlentə ɗa aka Benhadad na kuthlir Siriya, na ka ndzi ahar Damaska, ka pəla,

³“Ndzi ka mwa mbwi alkawal akwa daɓwa mwa, tsu apatə baba'na ka baba' nga ku hara waci. Nggədza tsuwa, I ata thlenta ala ga adzərfa ka dinar. Antə mwari ka ra sharəmta alkawalər giri ka Baasha na kuthlir Israila, kamnyar ka tsa fwaɓəla sojayeri arni kazhar tsəɗiyirna.”

⁴Antə Benhadad ku kələngkər aka Kuthli Asa, ka thlentə sojayeri arni kəga mji na ol'ola ata kəra ɗa, ka da ra dlər bərniyayeri ar Israila. Antə da ku səm Ijon, ka Dan, ka Abelmayim, ka shanga bərniyayeri na ar pwi kari na akwa Naftali.

⁵Antə sakatə Baasha ku nggatə su na akwa hara, antə tsa thləthlatə ka hənɓəla Rama, ka zhar kəthlər tə tsa akwa harari ni.

⁶Antə Kuthli Asa ku tsaptə shanga mjir Yahuda, ka vu tə da famta pela na akwa Rama, kəga udzəm tə Baasha ku kəthlər kəgari akwa hənɓəla katanggar Rama ni. Ka suayeri ngəni antə Kuthli Asa kəthlər kəgari akwa hənɓəla katanggar Geba ka Mizpa.

⁷Ata saka ndaga, Hanani na mdər wulsu ku si adzə Asa na kuthlir Yahuda, ka pəla alari, “Kamnyar ga ku mbərsa ka kuthlir Siriya, ka zhar mbərsa ka MTHLAKU na Hyelər nga, antə apani sojayeri ar kuthlir Siriya ku msəra ala ga.

⁸Ai sojar Ithliyopiya ka Libiya ni hang ka duna. Tsuwa da ka wagənər takwayeri ar mpa ka mjir fəl taku hang. Amma wala apani ata kəra hangkurər ɗa ni, kamnyar tə ga ku mbərsa ka MTHLAKU, tsa ku hamta ɗa ala ga.

⁹Kamnyar nca MTHLAKU ana wul shanga su na akwa mwa akwa duniya, kamnyar dunautə shanga mji na ku hamta ɗəffa ɗa swakti alari. Amma ga ku hara cakukur akwa su ngəni. Antə baɗitə kulini har ka ləkəma ga ata ndzi akwa mpa tədəku.”

¹⁰Amma labar ngəni ku hara tə ɗəffa Asa ku ɓzi adzə Hanani na mdər wulsu ni, har tə tsa ku vu ni akwa pərsəna. Tsuwa tsu akwa saka ndaga antə Asa baɗitə hara bwani na ɗimi aka mji laga.

¹¹Kəthlərayeri tə Asa ku hara akwa baɗitari har ka mwanta akwa tsikərari, an rəbutə rəbutari akwa Kakaɗər Kuthlyayeri ar Yahuda ka Israila.

¹²Akwa məva na makkumari ka əmdləkur ar kuthlikurərni, antə shilku laga ku ngkəi Asa ata səlari. Antə shilkə ni ku hara mwavər, amma wala apani tsa aɗi bara si adzə MTHLAKU wa, ata vəyari tsa bara dlara akəla mjir kuzəku.

¹³Antə Asa ku mti akwa məva na nfwarkumari ka ntangkur ar kuthlikurərni, ka mwari adzə kəkayeri arni.

¹⁴Antə da ku harəmta ni akwa kul natə tsa an lamta aka kərari, akwa Bərniyir Dauda, na an Urushalima. Da pəri ni ata sur pəpəi laga tə mdə nghyantə ka tulari kəga sur shiwura na msəra, ka mbata u'u na ola kamnyar nar olkur.