Read bura-pabir 2 Lab 18 Bible Online

2 Lab 18 - bura-pabir bible

2 Lab 18

¹Ata saka ndaga Yehoshafat ku hara gəna hang ka duna, tsuwa mji akwa na səli ka duna. Tsuwa tsa ku mbwi alkawalər pazhikur ka Ahab atar kəldzər ɓzərni ka ngkwar Ahab.

²Aghəla məvayeri laga, antə Yehoshafat ləghəi ahar Samariya kamnyar thlawar Ahab. Antə Ahab ku hara kucali, ka tsi təmayeri ka gyalayeri hang kamnyar Yehoshafat kəga mji na adzə ni. Antə tsa kiɗə kəra Yehoshafat abbər ka tsa nu ni ka da ra dlər Ramoth Gileyad.

³Antə Ahab na kuthlir Israila pəla aka Yehoshafat na kuthlir Yahuda abbər, “Ga ata hir nu ra ka mwa ra dlər Ramoth Gileyad ya?” Antə Yehoshafat shinau alari abbər, “I ɗəmhəɗəmhari ka mwa təra. Ai sojayeri arna ndzi apa da ar nga. Mburu ata mwari ata kəma duku ka ga akwa mpa ni.”

⁴Antə Yehoshafat pəla aka kuthlir Israila abbər, “Amma ndzi ka mburu tsəkwitə MTHLAKU katagu.”

⁵Antə kuthlir Israila ku tsaptə naɓiyayeri aru nfwar, ka yu ɗa abbər, “Ka yeru mwari ra dlər Ramoth Gileyad, nənga ka yeru zhari ri?” Antə da shinau alari abbər, “Mwari, kamnyar Hyel ata hamta ni ala ga.”

⁶Amma Yehoshafat pəla, “Naɓi damwa na ar MTHLAKU aɗi azi wa ya, ka mburu yutə ni tsuwa?”

⁷Antə kuthlir Israila shinau aka Yehoshafat abbər, “Mdə laga aɗi tə mburu ata mzhi yuɓəla su na akwa ɗəffa MTHLAKU akəlari, thləmari an Mikaiya na ɓzər Imla. Amma I ana hir ni wa, kamnyar tsa aɗi ana hara naɓikur na ɓɗaku ata kəri wa, sai su na ɗimi tədəku.” Antə Yehoshafat pəla, “Awa, kuthli aɗiya gari apani wa!”

⁸Antə kuthlir Israila thlentə ka mdə kəga alari pal akwa nca mjirni na ol'ola, ka pəla alari, “Mwari, ka gə səntə Mikaiya na ɓzər Imla kulikulini.”

⁹Ata saka nda, Ahab na kuthlir Israila ka Yehoshafat na kuthlir Yahuda ku hatə ləptər ɗa na ar kuthlikur, ka ndzəndzi ata dəkəlayeri ar kuthlikur adzə laliyir dəkə mthli na aɓəla akwa nyarfur ləvəi akwa Samariya. Tsuwa shanga naɓiyayeri na akwa tsəɗi ni akwa ləkəma ka hara naɓikur akəma ɗa.

¹⁰Antə pal akwa nca ɗa na ka thləmari Zedekiya na ɓzər Kenaana, ku namtə təmbəlayeri ar liya, ka pəla, “MTHLAKU pəla, ‘Ka təmbəlayeri ngəni antə ga ata dlərəmta mjir Siriya ka kurəmta ɗa karkar.’ ”

¹¹Antə shanga naɓiyayeri ni ku hara naɓikur tsu apani, akwa pəla, “Jiri, mwari ahar Ramoth Gileyad, ka gə səm ni. Kamnyar MTHLAKU ata hamta ni ala ga.”

¹²Antə mdər thlentə na mwari ra kəga Mikaiya ni pəla alari, “Shanga naɓiyayeri ku pəla su na ku kəskəra kuthli, antə kuji ka gə hara ka ndərər giri si duku, ka gə gari na ata kəskərari.”

¹³Amma Mikaiya pəla, “I ata kahyel ala ga akwa thləma MTHLAKU na ka mpika, abbər tar su tə Hyelərna pəla, antə I ata pəlari.”

¹⁴Sakatə Mikaiya ku si akəma Kuthli Ahab, antə kuthli ni pəla alari, “Mikaiya, ka yeru mwari ra dlər Ramoth Gileyad, nənga I aɗiya mwari wa ri?” Antə Mikaiya shinau alari abbər, “Mwari, ka ra səm ni, kamnyar mda ata hamta ɗa ala ga.”

¹⁵Amma kuthli ni pəla alari, “Haba, ka yiɗau antə ga ata bara kəi pəla ala ga abbər ga aɗiya thlandər ali wa, amma tar jirkur antə ka gə pəla ali akwa thləma MTHLAKU ri?”

¹⁶Antə Mikaiya pəla alari, “I wutə shanga mjir Israila titiltitilari ata kəra garayeri apa təmayeri na kula mdər ɓəla. Antə MTHLAKU pəla, ‘Mji ngəni aɗi ka mthlaku wa, antə ka kəlara mda ngka aviyarngkiɗa lapiya.’ ”

¹⁷Antə Ahab pəla aka Yehoshafat, “I aɗi pəla ala gə wa ya, abbər mdə ngəni aɗi ata ɗar hara naɓikur na ɓɗakari ata kəri wa, tar na ɗimiyari!”

¹⁸Antə Mikaiya pəla, “Antə psi thləma ga aka su tə MTHLAKU pəla. I ku wutə MTHLAKU andzəndzi ata kəra dəkəl kuthlikurərni, ka shanga mjirthlentərni athləthlata abwar tsi mazəmari ka matsəkarari.

¹⁹Antə MTHLAKU pəla, ‘Wan an ata mzhi pwaktə Ahab na kuthlir Israila, abbər ka tsa ra dlər Ramoth Gileyad, ka tsa mta anda ri?’ ” “Antə da ku səntə sauriyeri zumzum.

²⁰Aghəla nda, antə mambəl laga si ka thləthlata akəma MTHLAKU, ka pəla, ‘I ata ndəkərtə hangkalari.’ ” “Antə MTHLAKU pəla alari, ‘Akwa laku madə ri?’ ”

²¹“Antə mambəl ni pəla, ‘I ata mwari kəi ndzi mambələr thlandər akwa mnya shanga naɓiyayeri arni.’ ” “Antə MTHLAKU pəla, ‘Ga ata mzhari, antə mwari, ka ra harata.’ ”

²²Antə Mikaiya pəla, “Apani antə MTHLAKU ku vu mambələr thlandəra akwa mnya naɓiyayeri na ar ngə ni, kamnyar MTHLAKU ku kurtə ɗəmhə ka asar si ata kəra ga.”

²³Antə Zedekiya na ɓzər Kenaana shahədzi kudzəhə ka Mikaiya, ka tsa ni ata nggamari ka pəla, “Nawa antə mambələr MTHLAKU təra kazhar ra, ka ra gari ala gə ri?”

²⁴Antə Mikaiya pəla, “Ga ata sə səndari ma vir tə ga ata sə hwi ka ra ɗuwardzi akwa kutambwa na aghəli.”

²⁵Antə Ahab na kuthlir Israila pəla, “Ngkəi giri Mikaiya, ka giri ngka ka tsa aka Ammon na gwamnar bərni ni, ka aka Yowash na ɓzər kuthli.

²⁶Ka giri pəla ala ɗa, ‘Kuthli pəla, ka giri vu mdə ngəni akwa pərsəna, ka mdə nar buradi ka yimi daci, har tar ma I ku ngka lapiya.’ ”

²⁷Antə Mikaiya pəla, “Ma har ga ku ngka lapiya, to, tar MTHLAKU aɗi gari atar na jiri wa.” Antə tsa jaktə pəla, “Shanga giri, I akwa bara ka giri vədzə hangkala giri aka su tə I pəla ni!”

²⁸Apani antə Ahab na kuthlir Israila ka Yehoshafat na kuthlir Yahuda ku təra mwari ahar Ramoth Gileyad.

²⁹Antə Ahab na kuthlir Israila pəla aka Yehoshafat, “Arna, I ata pali laku tə I akwa, kəi mwari akwa mpa ni, amma ar nga, ka gə hatə ləptər kuthlikur ar nga.” Antə Ahab ku pali laku tə tsa akwa, ka mwari akwa mpa ni.

³⁰Hwatu kuthlir Siriya ku tsawa aka mji na ol'ola ata kəra sojayeri arni na ana mpa ka wagənər takwayeri abbər da aɗiya mpa ka mdə damwa wa, wala mdə ola, wala ɓzəngkyar, tar Ahab na kuthlir Israila shini.

³¹Antə sakatə mji na ol'olər sojar mpa ka wagənər taku ar mjir Siriya ni wutə Yehoshafat ka ləptər kuthlikur ni, təng da kəta abbər tsa an kuthlir Israila ni. Antə da ku shinardzi ka da mpa ni. Amma Yehoshafat ku hara kuraku ka duna. Antə MTHLAKU na Hyel ku dlar ni, ka famta ɗa kazhar ni.

³²Antə təkəma tə mji na ol'ola ata kəra sojayeri ka wagənər taku ni nggaɓəla abbər aɗi tsa an kuthlir Israila ni wa, təng da zhar nu ghəlari.

³³Amma wala apani akwa sakatə da akwa mpa ni, soja laga ar Siriya ku shu afərni akwa nca sojayeri ar Israila, antə afə ni ku ra pwa aka Ahab na kuthlir Israila akwa vəi dethlər ləptər liya arni. Antə Ahab pəla aka mdər nggur wagən takur mpa arni ni abbər, “Shinardzi, kara ləɓəla ka iya kazhar vəi mpa ni, kamnyar I ku dəkəidzi.”

³⁴Antə vir nda mpa ni ku hara mwavər ka duna. Antə kuthlir Israila ni ku thlatə ka rwatidzi akwa wagənər takur mpa arni ka bwakəmari awul mjir Siriya, har tə tahaku hara. Sakatə pci akwa təri antə tsa mta.