Read bura-pabir 2 Lab 19 Bible Online

2 Lab 19 - bura-pabir bible

2 Lab 19

¹Antə Yehoshafat na kuthlir Yahuda ku ngka aharngkiɗa akwa Urushalima lapiya.

²Antə mdər wulsu laga na ka thləmari Yehu na ɓzər Hanani, ku ləɓəla kamnyar thlakəmari. Antə Yehu pəla aka Kuthli Yehoshafat abbər, “Kalkal ya tə gə ra dlar mji na kəmanggar, ka hir mji na nggəlar MTHLAKU ni? Kamnyar su ngəni tə gə hara ni, antə ɗəffə bwarbwarkur ar MTHLAKU ku si ata kəra ga.

³Amma wala apani tsu su laga aɗi na ɓɗaku tə ga ku hara, kamnyar ga ku fwaɓəla shanga haptu Ashera na akwa tsəɗi ni, ka vu hangkala ga akwa bara Hyel.”

⁴Antə Yehoshafat ku ndzəndzi akwa Urushalima. Amma tsa ana ləɓəla ka ləɓəla kamnyar dlarhə mjirni, baɗita akwa Beyersheba har ka mwari akwa bwar garayeri na akwa Ifrayim, kamnyar dunautə ɗa ka da ngka adzə MTHLAKU na Hyelər kəkayeri arɗa.

⁵Tsuwa tsa ku pwi mjir hara shariya akwa shanga bərniyayeri na akwa katangga akwa Yahuda,

⁶ka pəla aka alkaliyayeri ni abbər, “Ka giri hara su ka hangkal, kamnyar giri aɗi akwa hara shariya ni kamnyar namtə ɗəffa mdə wa, amma kamnyar namtə ɗəffa MTHLAKU. Tsuwa tsa ata ndzi adzə giri akwa kəlara sakatə giri ata thlamta shariya.

⁷Antə ka giri thlivər ɗəffa MTHLAKU, ka hara su ka hangkal. Kamnyar MTHLAKU aɗi ana hir kula jirkur, wala nca zumzumkur, wala dlu sur dzəɓə mnya wa.”

⁸Tsuwa akwa Urushalima Yehoshafat ku pwi mjir Lawi laga, ka pristayeri, ka mji na ol'olər kutakəyayeri ar Israila, ka da hara shariya apatə MTHLAKU ku tsawa, ka thlamta shariyar beɗi. Tsuwa da ata ndzəndzi akwa Urushalima.

⁹Antə tsa tsawa ala ɗa abbər, “Ka giri hara kəthlər ar giri ka thlivər ɗəffa MTHLAKU, ka jirkur, ka ɗəffa giri shang.

¹⁰Kəlara sakatə maɗama' giri na akwa bərniyayeri ku si ka damitədzər ɗa akəma giri, wala damitədzi na ata kəra tsi mda, wala ata kəra ɓəli tsawa, wala suayeri tə mdə thlamta abbər ka mdə hara, ka gə tsaktə ɗa ta da asə ndəkərəngkər biku aka kəra ɗa akəma MTHLAKU. Kamnyar ma apani wa ɗəffə bwarbwarkur ar MTHLAKU ata si ata kəra giri kəga maɗama' giri. Amma ma giri ku nu tsawu ni, to giri aɗi ata ndəkərəngkər biku aka kəra giri wa.

¹¹Tsuwa nggədza Amaliya na olər pristayeri ni ata pwar giri akwa kəlara su na ku tsəkwar bwar MTHLAKU. Tsuwa Zebadiya na ɓzər Ishmayel na gwamnar kuthlir Yahuda an ata pwar giri akwa shanga wujir na ar kuthli. Tsuwa mambila mjir Lawi ata ndzi mjir dlar giri akwa suayeri na ol'ola. Antə ka giri ntsətədzi akwa kəthlər ar giri. Ka MTHLAKU ndzi adzə mji na ana hara su kalkal!”