Read bura-pabir 2 Lab 2 Bible Online

2 Lab 2 - bura-pabir bible

2 Lab 2

¹Ata saka nda antə Solaman kwamta abbər saka ku hara kamnyar həntə mbwar vəngkər səli aka MTHLAKU, ka tsuwa ka tsa tsatə kəi kuthlikur aka kərari.

²Antə tsa fatə mji dəpu murfəkumari ka da ndzi mjir fa kari, ka mji dəpu nciskumari ka da ndzi mjir mar pela akwa bwar garayeri, ka mji dəpu makər ka aru ngkwa tsuwa kamnyar wul mjir kəthlər ni.

³Antə Solaman thlentə kuraku aka Hiram na kuthlir Taya abbər, “I ku sənda abbər ga ku thlentə katakowayeri ar seda aka baba'na Dauda kamnyar ka tsa latə kəi kuthlikur kəgari, ka ndzi akwa. Antə kulini I ma, I akwa bara ka gə hara ali apani.

⁴Kamnyar kulini, I akwa bara latə mbwar vəngkər səli kamnyar haptə thləma MTHLAKU na Hyelərna. Tsuwa I ata hamta kəi ni aka Hyel kamnyar mba sur shiwura na msəra akəmari, tsuwa kamnyar ka mdə vəi Buradi tə mdə ku hamta aka Hyel tədəku, ka tsuwa kamnyar hara saɗaka mbamba tədəku ɗəɗəpa ka tahaku ar Vir Ghərəmtaghəra na ar Sati, ka ar kucalər Thliya Bilən, ka shanga mambila sakar kucalayeri tə MTHLAKU na Hyelər mburu ku thlamta. Ngəni an tsawu na ata ndzi har ba saka madi kamnyar mjir Israila.

⁵Mbwar Hyel tə I akwa bara hənari ni an ola, kamnyar Hyelər mburu an olta shanga haptayeri.

⁶Amma wa an ata mzhi hənta alari mbwa ri? Ai vəi na amtazi, ka vəi na amta ta shang ma aɗi mzhi kəsi ni wa. Antə I wa ri har tə I ata mzhi lata alari mbwa? Awa, su tə I ata harari daci an kəi lata alari mbwa tə mburu ata mzhi hamta saɗakayeri alari akwa.

⁷Antə apani, ka gə thlenta ali mdə na masəkur kəthlər ka dinar, ka adzərfa, ka əmza, ka liya mənggəl, ka puwar tsa su na kalar yar ndləngi həng'ha, ka na mamza, ka na zarkina, ka tsuwa na masəku akwa ɗahəi su ata udzəm wala liya. I akwa bara ka tsa ndzi ata kəma duku kəga mjir kəthlər tsi arna na masəku akwa Yahuda ka Urushalima, watau mji tə baba'na Dauda carɓəla ali ni.”

⁸“Tsuwa ka gə thlenta ali gangayeri ar seda, ka udzəmayeri na ɓɗakɓɗaku, kəga udzəm algum na ahar Lebanon, kamnyar I ku sənda abbər mjir kəthlər ar nga masəku akwa nta katako. I ata bara ka mjir kəthlər arna paktə kər ka mjir kəthlər ar nga,

⁹ka da ɗəmha ali katakowayeri hang, kamnyar mbwa tə I ata hənari ni ata ndzi ola tsuwa kəmar olkurərni ka ɓɗakkurərni aɗi wa.

¹⁰I ata ntəmta watsəɓər mjir kəthlər ar nga, watau mjirna ata nta ali katako ni, ka alkama balang dəpu aru, ka mthlir barli balang dəpu aru, ka yimər anap galan dəpu aru pal, ka mal zaitun galan dəpu aru pal.”

¹¹Antə Hiram na kuthlir Taya shinau aka Solaman atar wasika, abbər, “Kamnyar tə MTHLAKU hir mjirni antə tsa vəi nga kuthlir ɗa.

¹²Hu gir MTHLAKU na Hyelər Israila na hara vəi amtazi ka duniya.Tsa ku hamta aka Kuthli Dauda ɓzər na ɗəɗu, na asəndə su, tsuwa na ka nggaɓəlar su, na ata həntə mbwar vəngkər səli aka MTHLAKU, ka həntə kəi kuthlikur tsuwa aka kərari.

¹³I ata thlenta ala gə Huram Abi, mdə na masəku ka duna akwa kəthlər tsi,

¹⁴natə mama'ni səɓəla akwa nyarmbwar Dan, ka baba'ni mdər Taya. Tsa masəku akwa nam su ka dinar, ka adzərfa, ka əmza, ka liya mənggəl. Tsa asəndə kəthlər ka pela, ka udzəm, har kəga tsa zhaɓi ka puwa na kalar ndləngi həng'ha, ka na lipəla, ka na mamza, kəga lilin. Tsuwa tsa asəndə shanga ɗahə su tə mda ana hara ata liya wala udzəm, antə tsa ata mzhi ɗahətə kəlara su tə gə na alari. Tsa ata hara kəthlər kəga mjir kəthlər tsi ar nga, kəga na ar mdərkəyirna Dauda na baba' nga.

¹⁵Antə kulini, ga ata mzhi thlenta alkama, ka barli, ka mal zaitun, ka yimər anap, apatə ga ku hara alkawalari ni.

¹⁶Antə ar yeru, yeru ata nthlətsa ala gə shanga gang ar katako na azi akwa Lebanon tə ga ata turari ni, ka yeru ləghəi ka da ata mnya manda. Yeru ata mbwamta ɗa kər kər, ka putə ɗa ata yimi, ka da ləghəi ahar Yoppa. Anda antə mjir nga ata fatə ɗa ka mwantə ɗa ahar Urushalima.”

¹⁷Antə Solaman ku jikatə shanga durayeri na sisi akwa tsəɗi Israila, aghəla jika natə baba'ni Dauda hara ni. Antə tsa wutə hangkurər ɗa mji dəpu aru ka ntəfkumari ka makər ka aru ngkwa.

¹⁸Antə tsa carɓəla mji dəpu murfəkumari akwa nca ɗa ka da ndzi mjir fa kəla, ka dəpu nciskumari ka da ndzi mjir mar pela akwa garayeri, ka tsuwa mji na dəpu makər ka aru ngkwa ni ka da ndzi mjir wul mji ngəni akwa kəthlər ni, kamnyar ka kəthlər mwa ɓɗaku.