Read bura-pabir 2 Lab 20 Bible Online

2 Lab 20 - bura-pabir bible

2 Lab 20

¹Aghəla ngəni, antə mjir Mowab, ka mjir Ammon, ka mjir Meyuni laga ku si ata kəra Yehoshafat kamnyar mpa.

²Antə mji laga si ka pəla aka Yehoshafat abbər, “Nggədza mji laga dlama dlama na thlata ahar Edom aɓəla bwanda Manda Una, akwa si ata kəra ga ka mpa. Kulini kurari ni da ku si adzə Hazazon Tamar, natə tsa an Engedi.”

³Antə Yehoshafat ku thlivəra, ka ləkwa bara nufiyir MTHLAKU, ka psəmnya abbər ka shanga mji na akwa tsəɗi Yahuda kəl asham.

⁴Antə mji ku thlata akwa shanga bərniyayeri na akwa Yahuda ka si ka tsaptədzi akwa Urushalima kamnyar bara dlara akəla MTHLAKU.

⁵Antə Yehoshafat thlatə ka thləthlata akəma mjir Yahuda ka Urushalima na tsaptədzi akwa bəbal na bilən ar kutakəyir mbwar vəngkər səli ni,

⁶ka pəla, “MTHLAKU, gə na Hyelər kəkayeri ar yeru, aɗi ga an Hyel na amtazi wa ya? Aɗi ga an ka kuthlikur ata kəra shanga kuthlikurayeri na akwa duniya wa ya? Ai kuthlikur ka duna japu akwa tsiya ga, natə mdər mzhi nggitə nga aɗi wa.

⁷Hyelər yeru, aɗi ga an kədləɓəla mjir tsəɗi ngəni ata nca mjir nga Israila wa ya? Tsuwa aɗi ga an hamta tsəɗi ni aka kəkayeri ar Ibrahim na pazhir nga, ka tsa ndzi arɗa ba saka madi wa ya?

⁸Antə da ku ndzəndzi akwa tsəɗi ni, ka həntə mbwar vəngkər səli ala ga akwa vəi ni, kamnyar haptə thləma ga.

⁹Tsuwa da ku hamta jiri abbər ma asar, wala mpa, wala shariya, wala shilku, ku thlata akwa tsəɗi ni, da ata mzhi si ka thləthlata akəma mbwa ngəni, vəi tə mda ana haptə thləma ga ata ni. Da ata mzhi pəla tuwar ɗa akwa bwaniyir ɗa, kamnyar ka gə nggatə ka mbantə ɗa.

¹⁰Kulini, wul giri su tə sojayeri ar Ammon, ka Mowab, ka Gar Seyir, akwa harari ja. Da an mji tə gə ngkatə ta mjir Israila adlər ɗa, sakatə da thlata akwa tsəɗi Masar ni. Antə da bari təbwa damwa, ka zhar ta kurəmta ɗa.

¹¹Ngəni an laku tə da akwa bara ntəmta ala yeru watsəɓər yeru akwa ya! Kamnyar da sur ɗa an akwa bara ka da kədləɓəla yeru akwa tsəɗi tə gə hamta ala yeru abbər ka tsa ndzi kifər yeru ni.

¹²Hyelər yeru, ga aɗi ata ɗi ɗa wa ya? Kamnyar yeru aɗi ka dunar dlu dlamar sojayeri ngəni ka mpa wa, antə apani, yeru akwa putə nca ata ga abbər yeru ata wutə dlara akəla ga.”

¹³Ata saka nda tsuwa shanga mjir Yahuda ku thləthlata akəma MTHLAKU, ata kəma duku kəga maɗankyarər ɗa na raka raka, kəga mwankir ɗa, kəga maɗa' ɗa na ku tərta.

¹⁴Antə mambələr MTHLAKU ku si ata kəra mdə laga akwa nca mji na thləthlata akəma mji na tsaptədzi ni. Thləma mdə ndaga an Yahaziyel na ɓzər Zakariya, na ɓzər Benaiya, na ɓzər Yeyiyel, na ɓzər Mattaniya na akwa kutakəyir Asaf akwa nyarmbwar mjir Lawi.

¹⁵Antə Yahaziyel pəla, “Ka barkar nga gə na Kuthli Yehoshafat, ka shanga mjir Yahuda, kəga mjir kuta bərni Urushalima, psi giri thləma giri! MTHLAKU akwa pəla, ‘Giri aɗiya thlivər wa, wala yakata kamnyar dlamar sojayeri ngəni tə giri akwa wulari ni wa. Kamnyar mpa ngəni aɗi ar giri wa, amma ar Hyel.

¹⁶Ma ɗəpa, ka giri ləghəi ata kəra ɗa ka mpa. Da ata səɓəla atar ndləɓəlar Ziz, antə giri ata wutə ɗa akwa tsikəra mular na abwar raghəi ka Mtakər Yeruyel.

¹⁷Giri aɗi ata tur ka giri mpa akwa dlər ngəni wa. Ar giri təng ka giri thləthlatə tsəkəm akwa vəi thləthlatər giri, ka giri wul su tə MTHLAKU ata harari atar nggyari ɗa ala giri. Giri aɗiya thlivər wala shishiɓa wa, ma ɗəpa, ka giri ləɓəla ata kəra ɗa, kamnyar MTHLAKU ata ndzi adzə giri!’ ”

¹⁸Antə Kuthli Yehoshafat zuzuri ka dləri kəmari ata di. Antə shanga mjir Yahuda tsuwa ka mjir kuta bərni Urushalima ku zuzuri akəma MTHLAKU ka vəngkər səli alari.

¹⁹Antə mjir Lawi na akwa nyarmbwar Kohath ka nyarmbwar Kora thlatə ka thləthlatə kamnyar hu MTHLAKU na Hyelər Israila, ka kuraku na ola.

²⁰Antə sojayeri ar Yahuda ku thlatə ɗəɗəpə mbing, ka mwari akwa Mtakər Tekowa. Sakatə da akwa ləɓəla antə Yehoshafat thlatə ka pəla ala ɗa, “Ka shanga giri na mjir Yahuda ka giri na akwa kuta Urushalima, psi thləm ali! Ka giri mbərsa ka MTHLAKU na Hyelər giri, antə giri ata wutə duna ka səma.”

²¹Sakatə tsa ku kuri hara sauri ka mji na ol'olər mji ni, antə tsa carɓəla mji na ata pwa kəma sojayeri ni, mji na ata haptə ha ar hu MTHLAKU, kamnyar olkur səliyirni na ɓɗakkarkara ni. Antə da ləkwa hara ha ni akwa pəla, “Ka giri usar MTHLAKU, kamnyar hirkur arni na ana palidzi wa an har ba saka madi!”

²²Sakatə da baɗitə hara ha akwa fwal ni ni, antə MTHLAKU vu tə sojayeri ar Ammon, ka na ar Mowab, ka na ar Gar Seyir na ɗuwamtadzi kamnyar thla mjir Yahuda ni, ndəndatedzi ka ləkwa mpa kəga kər ɗa.

²³Kamnyar mjir Ammon ka mjir Mowab thlatə ka pwa ata kəra mji na akwa Gar Seyir, abbər ka da kurəmta ɗa shang karkar. Sakatə da ku kuri kurəmta sojayeri ar Seyir, antə sojayeri ar Ammon ka Mowab ni shinangkərdzi ata kəra nvwa ɗa ka ləkwa kurəmta nvwa ɗa tsuwa.

²⁴Sakatə mjir Yahuda mzhitə vəi na haptə haptari tə da ata mzhi wutə mtaku tə sojayeri na dlama dlama ni ata, təng da wutə mshiyir mji apumta ata di leɓleɓu, mda aɗi na ku mbil ka mpika akwa nca ɗa wala duku wa.

²⁵Sakatə Yehoshafat ka mjirni si abbər ka da famnya kari tə dawayeri arɗa mtə kazhar ni, təng da wutə thlayeri hang ka duna, ka kariyayeri, ka ləptayeri, ka suayeri damwa na ka daraja hang, har tə da amzhi fatari cipu wa. Antə da hara vir makər akwa fa kari ni, kamnyar tə kari ni ku hara hang ka duna.

²⁶Akwa vir na nfwarkur antə da tsaptədzi akwa Mular Beraka, ka hu MTHLAKU. An su na hara tə mda ana kəga vəi ni abbər Mular Beraka, watau Mular Barka, har ba ashina.

²⁷Antə Yehoshafat ku pwar shanga mjir Yahuda ka mjir kuta bərni Urushalima tə da ku ngka akwa Urushalima ka kucali, kamnyar MTHLAKU ku hara tə da ku səm dawayeri arɗa.

²⁸Da si akwa Urushalima, ka təra mwari akwa mbwar vəngkər səli aka MTHLAKU, akwa tsa guləm, ka yakandi, ka mbur təmbəl.

²⁹Sakatə shanga mjir kuthlikurayeri na kalaktə Israila nggata abbər MTHLAKU ku dlərəmta dawayeri ar Israila, antə da ku thlivər Hyel ka duna.

³⁰Apani antə tsəɗi kuthlikur ar Yehoshafat ku ndzi lapiya kula mpa, kamnyar Hyelərni ku na alari ndzəndziyir lapiyakur ka shanga tsəɗiyayeri na kalaktə ni akwa kəlara bwa.

³¹Apani antə Yehoshafat ku hara kuthlikur ata kəra Yahuda. Tsa ka məvari makkumari ka ntəfu sakatə tsa baɗitə hara kuthlikur. Antə tsa hara kuthlikur ar məva sərkumari ka ntəfu akwa Urushalima. Thləma mama'ni an Azuba na ngkwar Shilhi.

³²Yehoshafat ku nu surharar baba'ni Asa, tsa aɗi pəramta kazhar wa. Tsa ku hara su na kalkal ata nca MTHLAKU.

³³Amma wala apani, tsa aɗi mzhi hartə vəyayeri ar vəngkər səli aka haptu ni wa, tsuwa har ba kulini mjir Yahuda aɗi hamta ɗəffa ɗa aka Hyelər kəkayeri arɗa wa.

³⁴Mambila kəthlərayeri tə Yehoshafat hara, akwa baɗitari har ka mwanta akwa tsikərari, shang rəbutə rəbutari akwa Kakaɗər Labar ar Yehu na ɓzər Hanani. Tsuwa mdə ku rəbuta akwa Kakaɗər Labar Kuthlyayeri ar Israila.

³⁵Aghəla nda antə Yehoshafat na kuthlir Yahuda ku paktə kər ka Ahaziya na kuthlir Israila, na ku hara kəmanggarkurayeri.

³⁶Tsa paktə kər ka tsa akwa nam sharayeri ar yimi na ata ləhar Tarshish. Antə da ku namtə sharayeri ar yimi akwa Eziyon Geber.

³⁷Antə Eliyezer na ɓzər Dodavahu na ahar Maresha ku hara naɓikur na ɗimi ata kəra Yehoshafat abbər, “Kamnyar tə ga ku paktə kər ka Ahaziya, antə MTHLAKU ata huzamta su tə ga ku namta.” Antə sharayeri ar yimi ni ku jaɓumtadzi, tə da aɗi mzhi ləhar Tarshish wa.