Read bura-pabir 2 Lab 21 Bible Online

2 Lab 21 - bura-pabir bible

2 Lab 21

¹Yehoshafat ku mti antə mdə ku harəmta ni adzə kəkayeri arni akwa Bərniyir Dauda. Antə Yehoram na ɓzərni ku dlu tsiyari ka ndzi kuthli.

²Yehoram ka maɗama'ni na shili ngkwa. Da an Azariya, ka Yehiyel, ka Zakariya, ka Azariya, ka Mikayel, ka Shefatiya. Shanga ɗa an maɗashilər Yehoshafat na kuthlir Yahuda.

³Baba ɗa ku hamta ala ɗa cautayeri hang ar adzərfa, ka dinar, ka kariyayeri ar daraja, har kəga bərniyayeri na akwa katangga akwa Yahuda. Amma tsa hamta kuthlikur ni aka Yehoram, kamnyar tsa an ɓzər na ola.

⁴Sakatə Yehoram ku lətə dəkəl kuthlikur ar baba'ni, ka wuta abbər kuthlikur ni ku ncidzi gyang, antə tsa tsəgəi shanga maɗama'ni ka katsakar ata kəma duku kəga mji laga na ol'olər Israila.

⁵Yehoram ka məvari makkumari ka suɗa ka yarni sakatə tsa ndzi kuthli. Antə tsa hara kuthlikur ar məva ncisu akwa Urushalima.

⁶Antə tsa ku nu surharar kuthlyayeri ar Israila, ka hara suayeri na ɗimi apatə kutakəyir Kuthli Ahab ku hara. Tsa hara ɗimikur ngəni kamnyar tə ngkwar Ahab an mwalankiɗa. Antə apani tsa ku hara su na ɗimi ata nca MTHLAKU.

⁷Wala apani MTHLAKU aɗi hir shamta kutakəyir Dauda wa, kamnyar alkawal tə tsa ku hara aka Dauda. Tsa hara alari alkawal abbər tsa ka kəkayeri arni an ata sə ləkəma ka ndzi kuthlir Israila ba saka madi.

⁸Akwa sakar kuthlikur ar Yehoram, antə mjir Edom hara kər ɓəɓalkur aka kuthlikur ar Yahuda, ka vəi kuthli ar kəra ɗa.

⁹Antə Yehoram ku təramta ka mji ol'olər sojarni ka shanga wagənayeri ar takurni. Amma tsa thlata aviri ka tsəgəi mjir Edom na kalaktə ni, kəga mji ol'olər sojar wagənər takurni.

¹⁰Antə baɗitə ka vir nda har ka vədza aka pci na ashina, mjir Edom akwa nggəlar ndərər kuthlikur ar Yahuda. Tsuwa tsu akwa saka ndaga antə bərni Libna nggəlar kələngkər aka kuthlikur ar Yahuda ni. Shanga suayeri ngəni akwa hara ni kamnyar tə tsa ku nggəlar MTHLAKU na Hyelər kəkayeri arni.

¹¹Tsuwa, tsa ku namtə vəi vəngkər səli aka haptu ata kəra garayeri ar Yahuda, ka vu tə mjir Urushalima ləkwa ləka atar vəngkər səli aka haptayeri, ka vu tə mjir Yahuda pəramta kazhar laku.

¹²Antə naɓi Iliya rəbutə wasika aka Yehoram akwa pəla alari, “MTHLAKU na Hyelər kəkar nga Dauda pəla, ‘Ga aɗi nu suayeri kalkal apatə baba' nga Yehoshafat hara wa, wala nu su tə kəkar nga Asa na kuthlir Yahuda hara wa.

¹³Amma ga ku nu surharar kuthlyayeri ar Israila, ka vu tə mjir Yahuda ka mjir Urushalima ləkwa ləka atar vəngkər səli aka haptayeri, tsu apatə kutakəyir Ahab vu mjir Israila akwa karwakur. Tsuwa ga ku tsəgəi maɗama' nga natə baba' giri duku kəga da, tsuwa na təramta nga ka ɓɗakkur.

¹⁴Antə kulini I na MTHLAKU ata thlentə shilku na mwavər ata kəra mjir nga, ka maɗa' nga, ka mwankir nga, ka shanga mwaɓiyayeri tə ga kəgari.

¹⁵Antə ga ka kər nga tsuwa ata hara nggawa na mwavər ka shilkər kətər kuta na akurkur wa, har ka hyala ga puɓəladzi.’ ”

¹⁶Antə MTHLAKU ku mbwantə ɗəffa mjir Filistiya ka mjir Arab na kudzəhə ka Ithliyopiya ata kəra Kuthli Yehoram.

¹⁷Antə mjir tsəɗiyayeri ngəni suɗə ni ku si ata kəra Yahuda ka mpa, ka dlərəmta ni, ka famnya shanga su tə da wuta akwa kutakəyir kuthli, purəm kəga maɗa'ni kəga mwankirni, har tə wala ɓzər duku aɗi na mbil alari wa, tar Yehowahaz ɓzərni na raka ta shang.

¹⁸Antə aghəla shanga suayeri ngəni, MTHLAKU tsa Yehoram akwa kutari ka shilku laga ata hyalari na akurkur wa.

¹⁹Antə aghəla nda, akwa kurər məva na suɗkur, təng kari kutari puɓəladzi kamnyar mwavərkurər shilku ni, antə tsa ku mti akwa bwani ar shilku na mwavər. Mjirni aɗi mbatə u'u kamnyar nar olkur apatə mdə ku hara aka kəkayeri arni wa.

²⁰Yehoram ka məvari makkumari ka suɗa sakatə tsa baɗitə hara kuthlikur, antə tsa hara kuthlikur ar məva ncisu akwa Urushalima. Antə sakatə tsa mta, mda aɗi wala duku na ku damitədzi ata kəra mtərni wa. Antə mdə harəmta ni akwa Bərniyir Dauda, amma aɗi akwa vəi kulər kuthlyayeri wa.