Read bura-pabir 2 Lab 23 Bible Online

2 Lab 23 - bura-pabir bible

2 Lab 23

¹Akwa məva na murfəkur ar kuthlikur Athlaliya, antə Yehoyada na prist ni hara ɗəffər salkur, ka paktə kər ka mji na ol'ola ata kəra sojayeri na aru aru, natə thləma ɗa an Azariya na ɓzər Yeroham, ka Ishmayel na ɓzər Yehohanan, ka Azariya na ɓzər Obed, ka Maaseya na ɓzər Adaiya, ka Elishafat na ɓzər Zikri.

²Antə mji nayeri ni ku ləɓəla akwa ɗuwari, ka mwari akwa shanga bərniyayeri na akwa Yahuda, akwa kəgatə shanga mjir Lawi kəga mji na ol'olər kutakəyayeri ar Israila, abbər ka da ra tsaptədzi ahar Urushalima.

³Antə shanga mji na tsaptədzi ni ku mbwi alkawal ka kuthli akwa mbwar Hyel. Antə Yehoyada pəla ala ɗa, “Nggədza giri ɓzər kuthli! Ndzi ka tsa hara kuthlikur, apatə MTHLAKU ku hara alkawalari aka kəkayeri ar Kuthli Dauda.

⁴Nggədza su tə giri ata sə harari. Kəlara sakatə pristayeri kəga mjir Lawi ku si akwa kəthlər akwa Vir Ghərəmtaghəra ar sati, bwa pal akwa makər ar shanga giri ata ndzi mjir sək nyarfur mbwar vəngkər səli.

⁵Antə bwa pal akwa nca giri ata ndzi akwa kutakəyir kuthli, ka mambila bwa pal akwa nca giri ata ndzi təbwar Nyarfur Səlasu. Antə shanga mji na mbila ata ndzi akwa bəbalər mbwar MTHLAKU.

⁶Giri aɗiya zhar ka mdə damwa ləkwa mbwar MTHLAKU ni wa, tar ma tsa prist, wala pal akwa nca mjir Lawi na ka kəthlər, an ata mzhi ləmbwa. Da ata mzhi ləmbwa kamnyar tə arɗa da kəcəkəcari. Amma shanga mambila mji ata nu su tə MTHLAKU tsawa kamnyar ɗa.

⁷Antə giri na mjir Lawi ni ata kalaktə kuthli ni, waskəi ka kari mparni akwa tsiyari. Giri ata ndzi kudzəhə ka kuthli ni tədəku, akwa sakatə tsa ata ləmbwa, ka akwa sakatə tsa ata ləɓəla. Antə kəlara mdə na ku si abbər tsa ata ləkwa mbwar vəngkər səli ni, mda ata tsi ni.”

⁸Antə mjir Lawi ka shanga mjir Yahuda ku hara apatə Yehoyada na prist ku tsawa ala ɗa. Antə kəlara mji ku səntə mjir ɗa na ata dlu kəthlər Vir Ghərəmtaghəra ni ata kəma duku ka mji na ata hartə kəthlər arɗa Vir Ghərəmtaghəra ni, kamnyar Yehoyada na prist ni aɗi zhar ka mdə ngka avi wa.

⁹Antə Yehoyada na prist ku hamta mwasayeri kəga partauwayeri na raka raka kəga na ol'ola aka mji na olər sojayeri, mwasayeri ka partauwayeri na ar Kuthli Dauda, na akwa mbwar Hyel.

¹⁰Antə tsa ku pwi mjir sək ni, kəlara mda ka kariyir mpa arni akwa tsiyari. Antə da thləthlata akwa layi ka kalaktə kuthli ni. Da ntəhəmtadzi akwa layi baɗitə təbwar anəmər mbwar vəngkər səli ni ka mwanta aka bwar yalar mbwa ni. Tsuwa da ku hara layi ka kalaktə bagaɗi ni.

¹¹Antə Yehoyada ka maɗa'ni ku səɓəla ka Yowash na ɓzər kuthli ni, ka tsangkər alari dzakwar kuthlikur. Antə tsa hamta alari kakaɗər waadi ar dlu kuthlikur, ka psəmnya ni abbər tsa ku ndzi kuthli. Antə Yehoyada ka maɗa'ni bartə kərari, ka haptə kuraku akwa pəla, “Ka far kuthli fi!”

¹²Sakatə Athlaliya nggatə kuraka mji akwa hwihwi ka fwal kuthli ni, antə tsa ləmbwa adzə ɗa akwa mbwar MTHLAKU.

¹³Sakatə tsa ha ncari təng tsa wutə kuthli bilən athləthlata akwa vəi thləthlatər kuthli, kudzəhə ka zhimbwal na akwa nyarmbwar ləvəi ni, ka mji na ol'olər sojayeri athləthlata adzə kuthli ni. Tsuwa shanga mambila mjir tsəɗi ni akwa hara kucali, ka mbur təmbəlayeri. Tsuwa mjir hayeri kəga sur tsa arɗa akwa pwar ɗa akwa kucali. Sakatə Athlaliya wutə su ngəni, antə tsa thləhumta zhaɓərni, ka tuwa, akwa pəla, “Giri ku səm mdəkurərna! Giri ku səm mdəkurərna!”

¹⁴Antə Yehoyada na prist ni ku kəgaɓəla sojayeri na ol'ola ata kəra mjir ɗa ni, ka tsawa ala ɗa abbər, “Səɓəla giri ka tsa kazhar mbwar vəngkər səli ni, ga giri səntə ni akwa daɓwa sojayeri ni. Kəlara mdə na ku pəla tsa ata mbuli ni, mda ata tsi ni ka katsakar.” Kamnyar prist ni pəla, “Giri aɗiya tsi ni azi akwa kutambwar MTHLAKU ni wa.”

¹⁵Antə da ku ngkəi ni, ka mwantə ni akwa Nyarfur Taku na ata ləvəi akwa kəi kuthli ni, ka tsi ni anda.

¹⁶Antə Yehoyada ku kətə alkawal akwa daɓwari ka kuthli, ka tsuwa shanga mji ni abbər da ata ndzi mjir MTHLAKU.

¹⁷Antə shanga mji ni təra ka mwari akwa mbwar haptu Baal, ka ndlamta haptu ni, ka ɓəgələmta bagaɗiyayeri ar saɗakarni kəga shanga su na dludzər haptu, ka tsi Mattan na pristər Baal ni akəma bagaɗiyayeri ar hamta saɗaka ni.

¹⁸Antə Yehoyada hamta kəthlər ar wul mbwar MTHLAKU ni akwa tsiya pristayeri na mjir Lawi. Da antə Dauda hamta ala ɗa kəthlər ar kutambwar vəngkər səli, abbər ka da an hamta saɗaka mbamba aka MTHLAKU, apatə mdə ku rəbuta akwa tsawur Musa. Tsuwa da ata hara kəthlər ni ka ha ka kucali, apatə Dauda ku thlamta.

¹⁹Tsuwa Yehoyada ku pwi mjir sək nyarfur ləvəi akwa kəyir MTHLAKU, kamnyar ngkatə ta mji na adiya aləvi akwa kəi ni.

²⁰Antə Yehoyada kəgatə mji na ol'olər sojayeri, ka mji na ol'ola damwa, ka mji na ka kuthlikur, ka shanga mambila mjir tsəɗi ni, ka vu ɗa tə da ra dlu Kuthli Jowash akwa mbwar MTHLAKU. Antə da mwari ka səghəi ka Kuthli Yowash atar Nyarfu na Amta, akwa pwar ni ka mwar pu səl, har mwantə ni akwa kəi kuthlikur, ka vətə ni ata dəkəl kuthlikur.

²¹Antə shanga mjir tsəɗi ni ku hara kucali. Antə mdə ku tsi Athlaliya ka katsakar. Antə Urushalima ku ndzi lapiya kula mpa.