Read bura-pabir 2 Lab 25 Bible Online

2 Lab 25 - bura-pabir bible

2 Lab 25

¹Amaziya ka məvari sərkumari ka ntəfu sakatə tsa baɗitə hara kuthlikur. Antə tsa hara kuthlikur ar məva sərkumari ka əmdla akwa Urushalima. Tsuwa thləma mama'ni an Yehowaddin na ngkwar di Urushalima.

²Antə Amaziya ku hara su na kalkal ata nca MTHLAKU, amma aɗi ka ɗəffari duku wa.

³Antə təkəma tə tsa wuta abbər kuthlikur ku ndzəndzi ɓəɓal akwa tsiyari, təng tsa tsəgəi shanga mji na tsi baba'ni Kuthli Yowash.

⁴Amma tsa aɗi tsəgəi maɗankyarər ɗa wa. Tsa hara kalkal apatə mdə rəbuta akwa Kakaɗər Musa, akwa vəi tə MTHLAKU pəla abbər, “Mda aɗi ata tsi mjir ya kamnyar bikər maɗa' ɗa wa, wala tsi maɗankyar kamnyar bikər mjir yar ɗa wa. Kəlara mdə na ku hara biku, tsa antə mda ata tsiyari.”

⁵Antə Amaziya ku tsaptə mji shilər nyarmbwayeri ar Yahuda ka Benjamin, ka pwi ɗa zara zara, kəlara mji ka kutakəyir ɗa. Antə tsa pungkər ala ɗa sojayeri na ol'ola na ata kəra sojayeri dəpu dəpu, ka na aru aru. Tsa tsaptə mji na ku hara məva sərkumari har ka ləmta, ka wutə mji dəpu aru makər na ata mzhi mwari akwa mpa, watau mji na masəku akwa mpa ka mwasu ka partau.

⁶Tsuwa Amaziya ku hayatə sojayeri na katsalar mpa dəpu aru pal akwa tsəɗi Israila, ata kəra talent ar adzərfa aru pal.

⁷Amma mdə laga na mdər Hyel ku si adzə ni ka pəla, “Bundi, ga aɗiya hir ka giri mwari kəga sojayeri ar Israila akwa mpa ni wa. Kamnyar MTHLAKU aɗi adzə mjir Israila wa, tsa aɗi ata dlar kəlara mdə na thlata akwa tsəɗi Israila na abwar yala wa.

⁸Kamnyar ma ga akwa dzama abbər akwa laku ngəni antə ga ata ndzi ka duna ar mpa, Hyel ata hara ka gə təri akəma dawayeri ar nga. Kamnyar Hyel ka dunar hara ka gə səma wala psəmta nga.”

⁹Antə Amaziya pəla aka mdər Hyel ni abbər, “Amma talent ar adzərfa aru pal natə I hamta aka sojayeri ar Israila ni fa, kəi hara kari ri?” Antə mdər Hyel ni shinau ka pəla, “MTHLAKU ka dunar hamta ala gə su na hang ta ngəni.”

¹⁰Antə Amaziya ku salamtə sojayeri tə tsa hayata ahar Ifrayim ni ka da ngka avi. Antə ɗəffa ɗa ku ɓzi ka duna adzə mjir Yahuda, tə da ku ngka avi ka ɗəffə ɓzəɓza na mwavər.

¹¹Antə Amaziya ku nggitə ka mwantə sojayeri arni akwa Mular Una, ka tsəgəi mjir Edom na ahar Seyir dəpu kuma.

¹²Antə sojayeri ar Yahuda tsuwa ku ngkəgəi mji damwa dəpu kuma ka mpika, ka fatə ɗa ka mwantə ɗa ata kəra gar laga na nal, ka pughəi ɗa tə da tətəri ata pelayeri ka jijaɓumtadzi.

¹³Amma sojayeri natə Amaziya ngkaghəli ɗa, ta da amwari kəga tsa akwa mpa ni, ku pwa ata kəra bərniyayeri na akwa Yahuda ka mpa, baɗita ahar Samariya har ka mwanta ahar Beth Horon, ka tsəgəi mjir ɗa dəpu makər, ka famnya kariyir ɗa hang.

¹⁴Sakatə Amaziya ku ngka akwa kurəmta mjir Edom ni, tsa si ka haptayeri arɗa, ka pwi ɗa tə da ndzi haptayeri arni, ka vəngkər səli ala ɗa, ka hamta ala ɗa saɗaka.

¹⁵Antə ɗəffa MTHLAKU ku ɓzi ka duna adzə Amaziya ata kəra su ngəni. Antə tsa thlenta alari naɓi laga na mwari ka pəla alari abbər, “Kamnyar mi tə gə ləkwa nu haptayeri na amzhi mbuli mjir ɗa akwa tsiya gə wa ri?”

¹⁶Amma akwabə naɓi ni akuri gariyirni, kuthli ni thlamta mnyari ka pəla, “Amma nawa antə yeru namtə nga mdər hamta sauri aka kuthli ri? Hartə mnya gə diya, mi wa I ata vu ka mdə tsi nga!” Antə naɓi ni zhar gari ni, amma tsa pəla, “I asənda abbər Hyel ku ɗəmhə ka tsa hilantə nga kamnyar su ngəni tə gə hara ni, tsuwa ga aɗi akwa psi thləm aka sauriyirna wa!”

¹⁷Antə Amaziya na kuthlir Yahuda ku hara sauri ka mjir hamta alari sauri, ka thlentə ndər aka Yowash na ɓzər Yehowahaz, na ɓzər Yehu, na kuthlir Israila abbər, “Asəra ka mwa pa kərathlu ma ga amzha!”

¹⁸Antə Yowash na kuthlir Israila thlenta amsa aka Amaziya na kuthlir Yahuda abbər, “Waci mtəhəra laga aɗi akwa Lebanon na ku thlentə ndər aka nfur seda laga ola akwa Lebanon abbər, ‘Hamta ngkwar nga aka ɓzərna ka tsa kəla.’ Amma təkəma təng mwaɓi mtaku laga akwa Lebanon ni si akwa təramta ka ntsəntsarəmta nfur mtəhəra ni!

¹⁹Nggədza ga ku haptə kəra ga, ka gaya akwa pəla, ‘I ku səm Edom.’ Amma I akwa pəla ala ga abbər kuji kara ndzəndzi tsu avi! Kamnyar mi tə ga ata bara ti bwari na ata ndəkərəngkər asar ata kəra ga ka mjir Yahuda ri?”

²⁰Amma Amaziya aɗi psi thləm wa, kamnyar Hyel an ɗəmha abbər ka su hara apani ni, kamnyar ka tsa hamta ɗa aka dawar ɗa, təng tə da ku ngka ka ləkwa nu haptər Edom.

²¹Apani antə Yowash na kuthlir Israila ka sojayeri arni ku ləɓəla akwa mpa ni. Antə tsa ka Amaziya na kuthlir Yahuda ku giratə kəma ɗa akwa mpa ahar Beth Shemesh, na akwa Yahuda.

²²Antə mjir Israila ku səm mjir Yahuda, tə waskəi ku hwi ləhar ngkiɗa.

²³Antə Yowash na kuthlir Israila ku ngkəi Amaziya na kuthlir Yahuda na ɓzər Yowash, na ɓzər Ahaziya ahar Beth Shemesh, ka səntə ni ahar Urushalima. Antə Yowash vu tə mdə huzamta katanggar Urushalima, baɗita adzə Nyarfur Ifrayim har ka mwanta adzə Nyarfur Kuɗəma, natə saɓəlkurari ku hara dzarsəl aru ngkwa ni.

²⁴Antə tsa famnya shanga dinar, ka adzərfa, ka shanga kari tə tsa wuta akwa mbwar Hyel, natə mdə vu tsiya kəkayeri ar Obed Edom. Tsuwa tsa ku fatə suayeri na ka daraja akwa kəi kuthlikur, ka fatə mji apa mafayeri, ka ngka ahar Samariya.

²⁵Amaziya na ɓzər Yowash, na kuthlir Yahuda, ku jaktə hara məva kumnya ntəfu aghəla mtər Yowash na ɓzər Yehowahaz na kuthlir Israila.

²⁶Mdə ku rəbutə mambila kəthlərayeri tə Amaziya hara təng akwa baɗitari har ka mwanta akwa tsikərari akwa Kakaɗər Kuthlyayeri ar Yahuda ka Israila.

²⁷Təng sakatə Amaziya zhar nu MTHLAKU, antə mji laga akwa Urushalima pəli abbər da ata tsi ni. Antə tsa hwi ka mwari ahar Lakish, amma wala apani mdə ku thlentə mji ahar Lakish na ku mwari ka tsi ni anda.

²⁸Antə da səntə mshiyirni ata hila taku, ka harəmta ni akwa vəi tə mda ana har kuthlyayeri akwa Bərniyir Dauda akwa Yahuda.