Read bura-pabir 2 Lab 26 Bible Online

2 Lab 26 - bura-pabir bible

2 Lab 26

¹Antə shanga mjir Yahuda ku kətə Uzziya na ka məvari kumnya ngkwa ni, ka na alari kuthlikur, ata vəya baba'ni Amaziya.

²Aghəla mtər Amaziya antə Uzziya dlutsə bərni Eloth, ka ngka ka tsa akira Yahuda, ka hənɓəla ni.

³Uzziya ka məvari kumnya ngkwa sakatə tsa baɗitə hara kuthlikur, antə tsa hara kuthlikur ar məva ntəfkumari ka suɗa akwa Urushalima. Thləma mama'ni an Yekoliya, ngkwar Urushalima.

⁴Antə Uzziya ku hara su na kalkal ata nca MTHLAKU, tsu apatə baba'ni Amaziya ku hara.

⁵Uzziya ku vu hangkalari akwa bara Hyel akwa shanga sakar Zakariya na thlipa alari thlivər Hyel. Tsuwa akwa shanga sakatə kuthli ni akwa nu MTHLAKU ka jirkur, Hyel vu tə tsa ku ləkəma.

⁶Uzziya ku ləɓəla ka ra dlər mjir Filistiya, ka huzamta katangga ar Gath, ka na ar Yabne, ka na ar Ashdod. Antə tsa jaktə hənɓəla bərniyayeri na akwa tsəɗi Ashdod, ka vəyayeri damwa na akwa tsəɗi mjir Filistiya.

⁷Antə Hyel ku dlar Uzziya tə tsa ku səm mjir Filistiya, ka mjir Arab na akwa Gurbaal, ka mjir Meyuni akwa mpa.

⁸Antə mjir Ammon ku ntə tsəma aka Uzziya, antə thləmari ku tuwa ba akwa kəla tsəɗi Masar, kamnyar tsa ku ndzi ka duna swaiswai.

⁹Tsuwa Uzziya ku həntə mbwayeri na nal nal ahar Urushalima, akwa Nyarfur Kuɗəma, ka akwa Nyarfur Mular, ka akwa vəi tə katangga ni mbalidzi, ka dunautə ɗa.

¹⁰Tsuwa tsa ku həntə mbwayeri na nal nal akwa mtaku, ka lamta jiɓayeri hang, kamnyar tsa ka ciɓayeri na ol'ola ar thla ata kusar garayeri kəga akwa kuta bəbalayeri. Tsuwa tsa ka mjir tsuhwa, ka mjir wul fakayeri ar anap na akwa garayeri kəga na akwa vəi ɓwaɓwa, kamnyar tsa hir tsuhwa swaiswai.

¹¹Tsuwa Uzziya ka sojayeri na masəkur mpa, na ɗəmhəɗəmhari kamnyar mpa. Tsuwa mdə ku ndəkəi ɗa zara zara kalkal apatə Yeyiyel na sakatari ka Maaseya na olər sojayeri ku thlamta, apatə Hananiya na olər sojar kuthli ku pəla ala ɗa.

¹²Hangkur mji na masəkur mpa tə mdə ndəkɓəla ɗa atar kutakəyayeri ar kəkar ɗa an mji dəpu suɗa ka aru ngkwa.

¹³Tsuwa akira mji nayeri ni, sojayeri aɗi dəpu aru makər ka murfa ka aru ntəfu, na ata mzhi mpa ka duna, kamnyar ka da dlar kuthli akwa mpamta dawayeri arni.

¹⁴Antə Uzziya ku ɗəmha aka sojayeri arni partauwayeri kəga mwasayeri, kəga dzakwar mpa, kəga ləptər liya, kəga lali, kəga pelayeri ar mavinding.

¹⁵Tsuwa akwa Urushalima tsa vu tə mji laga na masəku namtə injayeri laga. Antə tsa pwi ɗa ata kəra mbwayeri na nal nal, ka ata kəra kuɗəmar katanggayeri, kamnyar shi afayeri kəga pelayeri na ol'ola. Antə thləma Uzziya ku tuwa ka duna ka ndlətə shanga bwa, kamnyar tə Hyel ku dlar ni ka duna, har tə tsa ndzi ka duna swaiswai.

¹⁶Amma sakatə Uzziya wuta abbər tsa ku hara duna swaiswai, antə tsa ləkwa nca kər olkur na ku sənta alari asar. Kamnyar tsa ku ndzi kula jirkur aka MTHLAKU na Hyelərni, har tə tsa ləkwa mbwar vəngkər səli aka MTHLAKU kamnyar mba tulari ɗuza ata bagaɗi saɗaka ka kərari surni.

¹⁷Amma Azariya na prist na ola ka pristayeri ar MTHLAKU nciskumari na katsala ku nu Uzziya ka ləkwa mbwar vəngkər səli ni,

¹⁸ka da ngkatə ni. Da pəla alari, “Uzziya! Aɗi kalkal ka ga an mba tulari ɗuza aka MTHLAKU ni wa, kamnyar ngəni an kəthlər ar pristayeri na akwa nyarmbwar Haruna. Da an mji tə mdə pwi ɗa dzak kamnyar kəthlər mba tulari ɗuza ni. Antə ləɓəla kazhar Vəi na Ɓɗakkarkar ni, kamnyar ga ku hara biku, antə ga aɗi ata wutə barka akəla MTHLAKU na Hyel wa.”

¹⁹Antə ɗəffa Uzziya ku ɓzi. Tsuwa ata sakanda tsa athləthlata adzə bagaɗi mba tulari ɗuza akwa mbwar MTHLAKU ka tasar mba tulari ɗuzə ni akwa tsiyari. Antə sakatə ɗəffari ku ɓzi adzə pristayeri ni, təng shilkər kəsəm səɓəla ata murkəmari, tsu akəma pristayeri ni akwa mbwar MTHLAKU, akəma bagaɗi mba tulari ɗuzə ni.

²⁰Antə Azariya na prist na ola, ka shanga mambila pristayeri ku wul ni, ka wutə shilkər kəsəm dza ata murkəmari! Antə da bukɓəla ni taktar, tə tsa ka kərari ku hara taktar ka ləɓəla, kamnyar tə MTHLAKU ku tsa ni.

²¹Antə Kuthli Uzziya ku ndzi ka shilkər kəsəm dzari ni har virər mtərni. Tsuwa mdə ku kəɓəla ni ka mwantə ni akwa mbwa laga shini, ka ndəkəmta ni ka mbwar MTHLAKU, kamnyar shilkər kəsəm dza na adzə ni ni. Antə Yothlam na ɓzər ni ku ndzi ata kəra kutakəyir kuthli, ka hara kuthlikur ata kəra mjir tsəɗi ni.

²²Antə naɓi Ishaya na ɓzər Amoz ku rəbutə shanga mambila suayeri tə Kuthli Uzziya hara təng akwa baɗitari har ka mwanta akwa tsikərari ni.

²³Antə Uzziya ku mti, antə mdə ku harəmta ni kudzəhə ka vəi har mshiyir kuthlyayeri. Amma mda aɗi har ni akwa nca ɗa wa, kamnyar tə mji akwa pəla abbər, “Tsa ka shilkər kəsəm dza.” Antə ɓzərni Yothlam ku dlu tsiyari ka ndzi kuthli.