Read bura-pabir 2 Lab 27 Bible Online

2 Lab 27 - bura-pabir bible

2 Lab 27

¹Yothlam ka məvari sərkumari ka ntəfu sakatə tsa baɗitə hara kuthlikur. Antə tsa hara kuthlikur ar məva kumnya ngkwa akwa Urushalima. Thləma mama'ni an Yerusha, ngkwar Zadok.

²Antə Yothlam ku hara su na kalkal ata nca MTHLAKU, tsu apatə baba'ni Uzziya ku hara. Sai dai ar Yothlam tsa aɗi ləkwa mbwar vəngkər səli aka MTHLAKU ka dwalikurari wa. Wala tə tsu mji ku ləkəma ka surharar ɗa na ɗimi.

³Yothlam an namtə Nyarfu na Amta ar mbwar MTHLAKU, ka hara kəthlərayeri hang ata kəra katangga na mwari təbwar Gar Ofel.

⁴Tsuwa tsa ku nthləi kauyayeri akwa tsəɗi garayeri ar Yahuda, ka həntə katanggayeri kəga mbwayeri na nal nal akwa kuɓər nfwa na ata ɗəɗəgəlayeri.

⁵Tsa ku mpa ka kuthlir mjir Ammon, antə mjirni ku səm ɗa. Antə tsu akwa məva nda tsa vu tə mjir Ammon ntə tsəma ar adzərfa talent aru pal, ka alkama tasa dəpu kuma, ka barli tasa dəpu kuma. Apani antə mjir Ammon ku ləkəma ka ntə su nayeri ni akwa məva na suɗkur ka məva na makərkur.

⁶Apani antə Yothlam ku ləkəma ka wutə duna kamnyar tə tsa ku mwa kalkal akəma MTHLAKU na Hyelərni.

⁷Kulini mambila kəthlərayeri tə Yothlam hara, ka shanga mpa tə tsa hara, ka laku tə tsa mwa ka kuthlikur arni akwa, mdə ku rəbutə ɗa akwa Kakaɗər Kuthlyayeri ar Israila ka Yahuda.

⁸Yothlam ka məvari sərkumari ka ntəfu sakatə tsa baɗitə ndzi kuthli. Antə tsa hara kuthlikur ar məva kumnya ngkwa akwa Urushalima.

⁹Antə Yothlam ku mti, antə mdə ku harəmta ni akwa Bərniyir Dauda. Antə Ahaz na ɓzərni ku dlu tsiyari ka ndzi kuthli.