Read bura-pabir 2 Lab 28 Bible Online

2 Lab 28 - bura-pabir bible

2 Lab 28

¹Ahaz ka məvari sərkumari ka yarni sakatə tsa baɗitə hara kuthlikur. Antə tsa hara kuthlikur ar məva kumnya ngkwa akwa Urushalima. Tsa aɗi hara su na kalkal ata nca MTHLAKU apatə kəkarni Dauda ku hara wa.

²Ahaz ku nu surharar kuthlyayeri ar Israila, har ka namtə dludzər haptu Baal, kamnyar ka tsa vəngkər səli ala ɗa.

³Tsuwa tsa ku mba tulari ɗuza akwa Mular ar Ɓzər Hinnom, ka hara saɗaka mbamba ka maɗashilərni. Tsa nu sur hara na ɗimi ar durayeri natə MTHLAKU kədləɓəla akəma mjir Israila ni.

⁴Ahaz ku hamta saɗakayeri kəga saɗaka mbamba akwa vəi vəngkər səli aka haptu, ka ata kəra garayeri, kəga akira kəlara nfwa na ka shanggur ola.

⁵Kamnyar ngəni antə MTHLAKU na Hyelərni ku hamta ni aka kuthlir mjir Siriya. Antə mjir Siriya ku səm ni akwa mpa, ka fatə mjirni dlama dlama apa mafa ka mwantə ɗa ahar Damaska. Tsuwa Hyel ku hamta ni aka Peka na kuthlir Israila, antə mjir Israila ku kurəmta mjir Yahuda hang ka duna.

⁶Antə vir nda Peka na ɓzər Remaliya ku tsəgəi sojar Yahuda na masəku akwa mpa dəpu aru ka sərkumari, akwa pci pal. Kamnyar tə mjir Yahuda ku shinadzə bwahili aka MTHLAKU na Hyelər kəkayeri arɗa.

⁷Antə soja laga ka thləmari Zikri, na masəkur mpa akwa Israila, ku tsi Maaseya na ɓzər Kuthli Ahaz, ka Azrikam na olər sojayeri ar kutakəyir kuthli, ka Elkana mdə na akwa nu kuthli ka olkur.

⁸Antə wala tə mjir Yahudi ni yangkura mjir Israila, mjir Israila ni ku ngkəgəi mjir Yahudi dəpu aru suɗa, kəga mwanki, kəga maɗashili, kəga maɗankwi. Tsuwa da ku famnya kariyayeri arɗa hang, ka sənta ahar Samariya.

⁹Amma naɓi laga aɗi na ar MTHLAKU anda ka thləmari Oded. Antə tsa ləɓəla ka kəɓa ka sojayeri ar Israila na si akwa Samariya ni, ka pəla ala ɗa, “Wul giri, kamnyar tə ɗəffa MTHLAKU na Hyelər kəkayeri ar giri ku ɓzi adzə mjir Yahuda, antə tsa hamta ɗa ala giri ni. Amma giri ku tsəgəi ɗa kamnyar ɗəffə bwarbwarkur ar giri, natə har ku mzhitə vəi na amtazi.

¹⁰Har kulini giri akwa bara namtə mjir Urushalima ka Yahuda, shili ka mwanki, ka da ndzi mafar giri. Watau, giri ku fwari abbər wala giri ma giri ku hara biku aka MTHLAKU na Hyelər giri ya?

¹¹Kulini psi giri thləma giri ali! Psi gir maɗama' giri natə giri fatə ni ka da ngka avi. Kamnyar ma apani wa, ɗəffə bwarbwarkur ar MTHLAKU ata sə ata kəra giri.”

¹²Antə mji ol'ola laga na akwa nyarmbwar Ifrayim, watau Azariya na ɓzər Yehohanan, ka Berekiya na ɓzər Meshillemoth, ka Yehizkiya na ɓzər Shallum, ka Amasa na ɓzər Hadlai, ku thləthlatə ka mji na akwa ngka akwa mpa ni,

¹³ka pəla ala ɗa, “Giri aɗiya səntə mji tə giri ngkəgəi ni azi wa, kamnyar su ngəni ata ndəkərəngkər ala mburu ɗimikur akəma MTHLAKU. Yeru aɗi ata bara ka bikər yeru jakjakə wa. Kamnyar kulini ma bikər yeru ni ku hara ol ka duna, tsuwa ɗəffə bwarbwarkur ar Hyel ku kurtə si ata kəra Israila!”

¹⁴Antə sojayeri ni ku psi mji tə da ngkəgəi ni, ka hamta shanga su tə da fatə ni akəma mji na ol'ola ka shanga mji na tsaptədzi.

¹⁵Antə mji na nfwar tə mdə kamnya thləma ɗa ni, thlatə ka ndəkəmta kariyayeri tə sojayeri fata akwa mpa ni, ka hamta aka mji na dura akwa nca ɗa. Da hamta ala ɗa ləptayeri, ka ɓaɓiyayeri, ka susəmayeri, kəga sur sa, ka kəcimta ala ɗa mbəlka ɗa ka fadzə mal zaitun. Antə da putə shanga mji na kula duna akwa nca ɗa ata kwarayeri, ka ngka ka da aka mjir ɗa ahar Yariko, watau Bərni ar Nfur Dipənau. Antə mjir Israila ku ngka ahar Samariya.

¹⁶Ata saka ndaga, antə Kuthli Ahaz thlentə labar ar bara dlara akəla kuthlir Assiriya.

¹⁷Kamnyar mjir Edom ku jaktə ra dlər mjir Yahuda ka səm ɗa, ka ngkəgəi mji ka təra ka da.

¹⁸Antə mjir Filistiya ku mwari ka dlər bərniyayeri na ata kusar garayeri ka na akwa bwar anəmər Yahuda. Antə da dlutsə Beth Shemesh, ka Ayalon, ka Gederoth, ka Soko ka kauyayeri na kalaktə ni, ka Timna ka Gimzo kauyayeri na kalaktə ɗa, ka ndzəndzi akwa kauyayeri ni.

¹⁹Kamnyar MTHLAKU ku kəli səliyir Yahuda kamnyar tə Ahaz na kuthlir Yahuda ku dunautə ɗimikur akwa Yahuda, ka ndzi kula jirkur aka MTHLAKU.

²⁰Antə Tiglath Pilneser na kuthlir Assiriya ku si ata kəra Kuthli Ahaz ka mpa, ka hara bwani alari, ata vəya ka tsa dlar ni.

²¹Ahaz ku fatə suayeri laga na akwa mbwar MTHLAKU, ka na akwa kəi kuthlikur, ka na akwa kəyir kwakunayeri, ka hamta aka kuthlir Assiriya. Amma wala apani su ngəni aɗi dlar ni wa.

²²Sakatə bwani ku si ata kəra Kuthli Ahaz, antə tsa vərvər ndzi kula jirkur aka MTHLAKU.

²³Kamnyar tsa ku hamta saɗaka aka haptayeri ar Damaska na ku səm ni akwa mpa. Kamnyar tsa pəla, “Kamnyar haptayeri ngəni an dlar kuthlir Siriya tə da səm ra ni, antə I ata hamta ala ɗa saɗaka ka da sə dlar ra tsuwa.” Amma ata vəya ka da dlar ni, da ndəkərəngkər alari asar, ka aka shanga tsəɗi Israila.

²⁴Antə Ahaz tsaptə kari kutambwar Hyel ka jijaɓumta ɗa, ka hagartə nyarmbwayeri ar mbwar MTHLAKU. Antə tsa həntə bagaɗiyayeri ar hamta saɗaka aka haptu akwa shanga kuɗəmayeri na akwa Urushalima.

²⁵Akwa kəlara di na akwa Yahuda, Ahaz ku namtə vəi vəngkər səli kamnyar mba tulari ɗuza aka haptayeri. Antə su ngəni ku mbwantə ɗəffa MTHLAKU na Hyelər kəkayeri arni.

²⁶Kulini mambila kəthlərayeri tə Ahaz hara akwa kuthlikurərni, ka lakwayeri tə tsa hara su akwa, akwa baɗitari har ka mwanta akwa tsikərari shang, mdə ku rəbutə ɗa akwa Kakaɗər Kuthlyayeri ar Yahuda ka Israila.

²⁷Antə Ahaz ku mti, antə mdə ku harəmta ni akwa Urushalima, amma aɗi akwa vəi kulər kuthlyayeri ar Israila wa. Antə Hezekiya na ɓzərni ku dlu tsiyari ka ndzi kuthli.