Read bura-pabir 2 Lab 29 Bible Online

2 Lab 29 - bura-pabir bible

2 Lab 29

¹Hezekiya baɗitə hara kuthlikur sakatə tsa ka məvari sərkumari ka ntəfu. Antə tsa hara kuthlikur ar məva sərkumari ka əmdla akwa Urushalima. Thləma mama'ni an Abija, ngkwar Zakariya.

²Antə tsa ku hara su na kalkal ata nca MTHLAKU, tsu apatə kəkarni Dauda ku hara.

³Akwa məva na ntangkəma ar kuthlikurərni, akwa thliya na ntangkəma, antə tsa kəlar nyarmbwar mbwar MTHLAKU ka nagamtə ɗa.

⁴Tsa kəgatə pristayeri ka mjir Lawi, ka tsaptə ɗa akwa bəbal na abwar raghəi.

⁵Antə tsa pəla ala ɗa, “Psi gir thləma giri, giri na mjir Lawi! Kəcimta gir kər giri, ka giri kəcimta mbwar MTHLAKU na Hyelər kəkayeri ar giri tsuwa, ka giri fwaɓəla diɗayeri na akwa Vəi na Ɓɗakkarkara.

⁶Kamnyar kəkayeri ar mburu ku ndzi kula jirkur, ka hara ɗimikur ata nca MTHLAKU na Hyelər mburu. Da ku fwari ata kərari ka shinamta bwakəma ɗa kazhar mbwar MTHLAKU, ka shinadzə bwahila ɗa alari.

⁷Tsuwa kəkayeri ar giri ku hartə nyarmbwayeri ar ləkwa galahər mbwar vəngkər səli, ka tsi pitəlayeri. Tsuwa da ku zhar mba sur shiwura ka zhar hamta saɗaka mbamba akwa Vəi na Ɓɗakkarkara ar Hyelər Israila.

⁸Antə ɗəffa MTHLAKU ku ɓzi ata kəra Yahuda ka Urushalima. Antə tsa namtə ɗa tə da ndzi sur thlivəra, ka surndatə mda, ka sur ncaɓwi, apatə giri ka kəra giri ku wutə ka nca giri.

⁹Kamnyar ngəni antə mdə ku tsəgəi kəkayeri ar mburu akwa mpa, ka fatə maɗashilər mburu, kəga maɗankwiyir mburu, kəga mwankir mburu, ka mwantə ɗa akwa mafakur.

¹⁰Amma kulini I ku vu ɗəffi abbər I ata mbwi waadi ka MTHLAKU na Hyelər Israila, kamnyar ka ɗəffari na bwarbwar ata kəra mburu ni pwi.

¹¹Maɗa'na, giri aɗiya gyal ka ndər ngəni wa, kamnyar MTHLAKU an carɓəla giri abbər ka giri thləthlata akəmari ka hara kəthlər alari, ka mba tulari ɗuza alari.”

¹²Antə mjir Lawi nayeri ni ku thlatə ka ləkəma ka kəthlər təkəma. Akwa kutakəyir Kohath, an Mahath na ɓzər Amasai, ka Yowel na ɓzər Azariya. Akwa kutakəyir Merari an Kish na ɓzər Abdi, ka Azariya na ɓzər Yehallelel. Akwa kutakəyir Gershon, an Yowa na ɓzər Zimma, ka Eden na ɓzər Yowa.

¹³Akwa kutakəyir Elizafan, an Shimri ka Yeyiyel. Akwa kutakəyir Asaf, an Zakariya ka Mattaniya.

¹⁴Akwa kutakəyir Heman, an Yehiyel ka Shimeyi. Akwa kutakəyir Yeduthlun, an Shemaiya ka Uzziyel.

¹⁵Antə mji nayeri ni ku tsagaptə maɗama' ɗa ka kəcimta kər ɗa, ka ləmbwa kamnyar kəcimta mbwar vəngkər səli apatə kuthli ku tsawa, kalkal apatə MTHLAKU ku pəla.

¹⁶Antə pristayeri ni ləmbwa, ka ləkwa kutambwar MTHLAKU na aghəli, kamnyar ka da kəcimta ni. Antə da fwaɓəla shanga diɗayeri tə da wuta akwa mbwar vəngkər səli aka MTHLAKU ni, ka sənta aɓəla akwa bəbalər mbwar MTHLAKU. Antə mjir Lawi famta diɗi ni ka ra pumtari akwa Zərkər Kidron.

¹⁷Da baɗitə kəcə mbwa ni akwa vir na ntangkəma ar thliya na ntangkəma, tsuwa akwa vir na nciskur ar thliya ni antə da kuri har ka səɓəla akwa galahər mbwar MTHLAKU ni. Antə da jaktə hara vir ncisu akwa kəcimta mbwar MTHLAKU ni. Antə apani da ku si kuri kəthlər ni akwa vir na kumnya ngkwakur ar thliya na ntang.

¹⁸Antə da ləvəi adzə Kuthli Hezekiya ka pəla alari abbər, “Yeru ku kəcimta shanga mbwar MTHLAKU, kəga bagaɗi mbamba, ka shanga kari kəthlərari, ka tebər ar Vəi Buradi tə mdə ku hamta aka Hyel, ka shanga kari kəthlərari.

¹⁹Tsuwa shanga kariyayeri tə Ahaz fwaɓəla ka titiləmta akwa sakar kuthlikur arni, sakatə tsa ndzi kula jirkur ni, yeru ku ngka kəgari, ka kəcimta ɗa, ka pwi ɗa shang akəma bagaɗi aka MTHLAKU.”

²⁰Antə Kuthli Hezekiya ku thlatə ɗəɗəpə mbing ka tsaptə mji ol'olər bərni ni, ka təra mwari akwa mbwar MTHLAKU.

²¹Antə da səntə gyal murfa, ka gam murfa, ka maɗa' gam murfa, ka nciwa murfa, kamnyar hamta saɗakar kəcimta bikər kuthlikur, ka na ar Vəi na Ɓɗakkarkara, ka kamnyar shanga mjir Yahuda. Antə Kuthli Hezekiya ku tsawa aka pristayeri na maɗa' Haruna abbər ka da hamta mwaɓiyayeri ni saɗaka ata kəra bagaɗi aka MTHLAKU.

²²Antə da ku tsi gyalayeri ni, tə pristayeri ku kathlətsə mamshari, ka pshita ata bagaɗi ni. Antə da tsi gamayeri ni, ka pshitə mamshir ɗa ata bagaɗi ni. Antə da tsi maɗa' gamayeri ni, ka pshitə mamshir ɗa ata bagaɗi ni.

²³Antə mdə səntə nciwayeri ar saɗakar kəcə biku ni akəma kuthli ka shanga mji na tsaptədzi ni, antə da pungkər tsiya ɗa ata kəra nciwayeri ni.

²⁴Antə pristayeri ni ku tsi ɗa, ka hamta saɗakar kəcimta biku ka mamshir ɗa ata kəra bagaɗi saɗaka ni kamnyar kələmta bikər shanga Israila. Kamnyar kuthli ku tsawa abbər ka mdə hamta saɗaka mbamba ka saɗakar kəcimta biku kamnyar shanga Israila.

²⁵Antə Kuthli Hezekiya ku pwi mjir Lawi ni akwa mbwar MTHLAKU, ka hamta ala ɗa liyar ɓu tsi, kəga guləmayeri, kəga yakandiyayeri. Tsa nu shanga su kalkal apatə MTHLAKU ku tsawa aka Dauda, ka aka Gad na mdər wulsu ar kuthli, ka aka naɓi Nathlan.

²⁶Antə mjir Lawi ku thləthlatə ɗəmhəɗəmhari ka surtsayeri na ar Dauda ni, antə pristayeri ni tsuwa thləthlatə ka təmbəlayeri ni akwa tsiya ɗa.

²⁷Antə Hezekiya ku tsawa abbər ka mdə hamta saɗaka mbamba ni ata kəra bagaɗi ni. Sakatə mdə baɗitə hamta saɗaka mbamba ni, təng mji baɗitə hara ha ar hu MTHLAKU, antə mjir tsa su ni hangkir mbur təmbəlayeri kəga surtsayeri natə Dauda na kuthlir Israila vu tə mdə namtə kamnyar hu Hyel.

²⁸Antə shanga mji na tsaptədzi ni ku vəngkər səli aka Hyel, tə mjir hara ha tsuwa ku hara hayeri, antə mjir mbur təmbəl tsuwa ku mbur təmbəlayeri. Antə mdə ku ləkəma ka harari apani har tar tə mdə kuri hamta saɗaka mbamba ni.

²⁹Aghəla saɗaka ni, antə Kuthli Hezekiya ka shanga mji na adzə ni ku zuzuri ka kəma ɗa ata di ka vəngkər səli aka Hyel.

³⁰Antə Kuthli Hezekiya ka mji na ol'olər tsəɗi ni tsawa aka mjir Lawi abbər ka da ləkəma ka hu MTHLAKU ka ndərayeri na ar Dauda, ka na ar Asaf na mdər wulsu. Antə da ku hara hayeri ar hu Hyel ni ka kucali, ka zuzuri ka vəngkər səli aka Hyel.

³¹Antə Hezekiya pəla, “Kulini tə giri ku hamta kər giri aka MTHLAKU ni, shahə girdzi kudzəha, səntə giri saɗakayeri ar giri kəga sur hamta ar gwaɗita akwa mbwar MTHLAKU.” Antə mji na tsaptədzi ni ku səntə saɗakayeri kəga cautayeri ar gwaɗita akwa mbwar MTHLAKU. Tsuwa mji laga akwa hirər ɗəffa ɗa, ku səntə mwaɓiyayeri kamnyar saɗaka mbamba.

³²Hangkur mwaɓiyayeri tə mdə tsi akwa saɗaka mbamba ni an gyal murfəkumari, ka gam aru pal, ka tsuwa maɗa' gam aru suɗa. Shanga su nayeri ni an kamnyar hara saɗaka mbamba aka MTHLAKU.

³³Shanga mwaɓiyayeri tə mdə hamta aka Hyel ni an gyal aru ngkwa, ka təma dəpu makər.

³⁴Amma pristayeri ni ku hara raka, antə da aɗi mzhi hənəmta shanga mwaɓiyir saɗaka mbamba ni wa. Antə tar tə maɗama' ɗa na mjir Lawi ni si ka dlar ɗa har tə da kuri, akwabə pristayeri damwa akuri kəcimta kərɗa ka si. Kamnyar mjir Lawi ni ana vu hangkala ɗa akwa kəcimta kərɗa ɓɗakta laku tə pristayeri ni ana kəcimta kər ɗa.

³⁵Ata kəra sur hamta ar saɗaka mbamba na hang ni, saɗakar sur sa aɗi tsuwa, kəga saɗakar malkum kamnyar saɗakar jakə mwardzi. Apani antə mdə ku jaktə baɗitə vəngkər səli akwa mbwar MTHLAKU.

³⁶Antə Hezekiya ka shanga mji ku hara kucali kamnyar su tə Hyel harata aka mjirni. Kamnyar shanga su ku kuri taktar.