Read bura-pabir 2 Lab 3 Bible Online

2 Lab 3 - bura-pabir bible

2 Lab 3

¹Antə Solaman ku baɗitə hən mbwar MTHLAKU akwa Urushalima ata Gar Moriya. Ata vəi ngəni antə MTHLAKU ɗar ncantə kərni aka Dauda na baba' Solaman ni. Antə Solaman ku həntə mbwa ni ata vəi tə Dauda carɓəla nda, watau ata vəi dəkə mthlir Arauna na mdər Yebusi ni.

²Antə Solaman baɗitə hən mbwa ni akwa vir na suɗkur ar thliya na suɗkur akwa məva na nfwarkur ar kuthlikurərni.

³Antə nggədza laku tə Solaman ɗəmhə hən mbwar Hyel ni akwa. Saɓəlkur səla mbwar vəngkər səli ni dzarsəl əmdləkumari, baukurari dzarsəl makkumari.

⁴Tsuwa saɓəlkur kuta galahər mbwar vəngkər səli ni an dzarsəl makkumari, kalkal ka baukur mbwa ni, antə nalkur galahəu ni tsuwa an dzarsəl makkumari. Tsuwa mdə ku fəi dza kuta galahəu ni ka dinar swakti.

⁵Tsuwa tsa hartə dza kutambwa na ol ni ka katako na ɓɗaku, ka fəi dzari ka dinar swakti, ka ɗahətə dludzər nfur dipənau ka sarkayeri ata kər.

⁶Antə tsa dəɓatə mbwa ni ka pelayeri na ka daraja. Tsuwa jili dinar tə tsa kəthlər kəgari an dinar tsəɗi Parvayim.

⁷Antə tsa fəi shanga dza mbwa ni ka dinar, purəm kəga udzəm ciɓ kəra mbwa ni, kəga udzəm nyarmbwa ni, kəga tapərayeri ar mbwa ni, ka vu tə mjir hən mbwa ni marɓəla dludzər kerubayeri ata shanga dza mbwa ni.

⁸Antə tsa namtə Vəi na Ɓɗakkarkara ta Shang akwa kutambwa ni, natə saɓəlkurari ka baukurari japu dzarsəl makkumari makkumari, kalkal ka baukur mbwa ni surni. Antə tsa hartə dzari na avivi ka dinar swakti na ku mwantə talent aru ngkwa.

⁹Tsuwa mdə ku hara kəthlər ka kusa ar dinar natə kəgəɓkurari ku hara shekel ntəfkumari. Tsuwa tsa ku fəi dza mbwayeri na amta ka dinar swakti.

¹⁰Tsuwa Solaman ku namtə dludzər kerubayeri suɗa, ka fəi dza ɗa ka dinar, ka pwi ɗa akwa Vəi na Ɓɗakkarkara ta Shang ni.

¹¹Saɓəlkura ɓəɓəka kerubayeri japu suɗə ni an dzar tsi sərkumari, ma mdə ndəraɓəla ɗa, kamnyar saɓəlkur kəlara ɓəɓəku pal an dzar tsi ntəfu. Tsuwa pala ɓəɓəka kerub na abwani ku tsəkwar dza mbwa ni, antə pala ɓəɓəkari na abwanda ku tsəkwar ɓəɓəka kerub na dukwari ni.

¹²Tsuwa saɓəlkura ɓəɓəka kerub na suɗkur ni ma dzar tsi ntəfu, antə ɓəɓəkari na təbwar dza mbwa ni ku tsəkwar dza mbwa ni, antə ɓəɓəkari na duku tsuwa ku tsəkwar ɓəɓəka kerub na ntangkəma ni. Tsuwa saɓəlkur ɓəɓəkari an dzar tsi ntəfu.

¹³Antə saɓəlkura ɓəɓəka kerubayeri ngəni suɗə ni, ma mdə ndəraɓəla ɗa ata mwantə dzar tsi sərkumari. Antə kerubayeri ni ku thləthlata ata səla ɗa ret ka nvwa ni, ka kəma ɗa awul kutambwa na olari ni.

¹⁴Tsuwa Solaman ku vu tə mdə namtə lapəliyir nyarmbwar Vəi na Ɓɗakkarkar ta Shang ni ka puwa na lipəla, ka na kalar ndləngi həng'ha, ka na mamza, ka tsuwa lilin na ɓɗaku, ka dəɓatə lapəli ni atar nduɓtə dludzər kerubayeri ata.

¹⁵Tsuwa Solaman ku namtə zhimbwalayeri suɗa abwakəma mbwar Hyel ni, kəlara pal nalkurari dzar tsi makkumari ka ntəfu. Tsuwa kəlara kəra zhimbwal ni ka kuɓashu na ka nalkurərni dzar tsi ntəfu.

¹⁶Tsa vu tə mdə dəɓatə kəra kəlara zhimbwal ni ka dludzər sarkayeri tə mdə tsata. Tsuwa tsa vu tə mdə namtə dludzər yar rumman aru pal ka tsatə ɗa ata sarka ni.

¹⁷Antə tsa ncigəi zhimbwalayeri ni anyarmbwar vəngkər səli ni, duku abwar anəm ka duku tsuwa abwar yala. Antə tsa vətə thləm aka zhimbwal na təbwar anəm ni abbər Yakin, antə na abwar yala ni tsuwa Bowaz.