Read bura-pabir 2 Lab 30 Bible Online

2 Lab 30 - bura-pabir bible

2 Lab 30

¹Antə Hezekiya thlentə ndər aka shanga Israila ka Yahuda, ka rəbutə wasika tsuwa aka Ifrayim ka Manasse, abbər kalkal ka da si akwa mbwar MTHLAKU ahar Urushalima, kamnyar hara Kucalər Fəlɓəla Kəi aka MTHLAKU na Hyelər Israila.

²Kamnyar hwatu Kuthli Hezekiya, ka kwakunayeri arni, ka shanga mji na tsaptədzi akwa Urushalima ni, ku hara sauri abbər da ata hara Kucalər Fəlɓəla Kəi ni akwa thliya na suɗkur,

³kamnyar tə da aɗi mzhi harari akwa sakatə mdə thlamta ni wa. Tsuwa su na ngkata an kamnyar hangkur pristayeri na kəcimta kərɗa ni ku hara raka, tsuwa aɗi mji hang an tsaptədzi akwa Urushalima wa.

⁴Antə akwa wutər kuthli ka shanga mji na tsaptədzi ni, ɗəmhədzi ngəni ku ndzi kalkal.

⁵Apani antə da ku hamta tsawa tə ka mdə psəmnya akwa shanga Israila, baɗita ahar Beyersheba akwa anəm har ka ləmta ahar Dan akwa yala, abbər ka da si akwa Urushalima kamnyar hara Kucalər Fəlɓəla Kəi aka MTHLAKU na Hyelər Israila. Kamnyar ku fəi da aɗi jaktə hara kucali ni ka mji hang apatə mdə thlamta wa.

⁶Sakatə kuthli ka mjirni na ol'ola ku hamta tsawu ni, antə mjir thlentə tə mda ana kəga ɗa abbər “ka tsa pi wa” ni, ku mwari ka dlarhə shanga Israila ka Yahuda, ka wasika na akwa pəla, “Giri na mjir Israila, ngka giri adzə MTHLAKU na Hyelər Ibrahim, ka Ishaku, ka Israila, watau Yakub. Ngka giri adzə ni, kamnyar ka tsa ngka adzə mji na mbila akwa nca giri yiɗauwa, na msəra akwa tsiya kuthlyayeri ar Assiriya ni.

⁷Giri aɗiya ndzi apa kəkayeri ar giri ka maɗama' giri na ndzi kula jirkur aka MTHLAKU na Hyelər kəkayeri arɗa ni wa. Kamnyar an su na hara tə tsa namtə ɗa sur kətadza, apatə giri akwa wulari ni.

⁸Giri aɗiya hara kər ɓəɓalkur apatə kəkayeri ar giri ku hara wa, amma ka giri hamta kər giri aka MTHLAKU. Ka giri si akwa Vəi na Ɓɗakkarkara arni, vəi tə tsa ku namtə ni ɓɗakkarkara ba saka madi. Ka giri vəngkər səli aka MTHLAKU na Hyelər giri, kamnyar ka ɗəffari na thlatə bwarbwar ata kəra giri ni pwi.

⁹Kamnyar ma giri ku ngka aka adzə MTHLAKU, to, Hyel ata vu ka mji na ngkəi maɗa' giri ni ndzi ka kətadza ala ɗa, har ka da sə ngka akwa tsəɗi ngəni. Kamnyar MTHLAKU na Hyelər giri ana hara ɓɗakkur, tsuwa tsa ana kətadzə mda. Antə ma giri ku ngka adzə ni, tsa aɗi ata shinamta kəmari kazhar giri wa.”

¹⁰Antə mjir “ka tsa pi wa” ni ku mwari ka dlarhə shanga kauyayeri na akwa tsəɗi Ifrayim ka Manasse, har ka mwari ahar Zebulun, amma təng mji ni kumshi ɗa ka mnya ɗimi ala ɗa.

¹¹Təng mji laga yiɗauwa akwa tsəɗi Asher, ka Manasse, ka Zebulun, an tərghəi kəra ɗa ka si ahar Urushalima.

¹²Tsuwa akwa saka ndaga, Hyel akwa wulwul mjir Yahuda, tə tsa na ɗa ɗəffər paktə kər ka kələngkər aka kəlara tsawa tə Kuthli Hezekiya ka mjirni na ol'ola ku hamta, kamnyar shanga tsawayeri arɗa thlata akəla MTHLAKU.

¹³Antə akwa thliya na suɗkur, mji hang ku tsaptədzi akwa Urushalima kamnyar hara Kucalər Buradi Na Kula Yist, tsuwa mji ku tsaptədzi hang ka duna.

¹⁴Antə mji ni baɗitə kəthlər ka huzamta bagaɗiyayeri ar hamta saɗaka aka haptu na akwa Urushalima, ka famta shanga bagaɗiyayeri ar mba sur shiwura, ka ra pumta ɗa akwa Mular Kidron.

¹⁵Antə da tsi təmar Kucalər Fəlɓəla Kəi ni akwa vir na kumnya nfwarkur ar thliya na suɗkur. Antə pristayeri kəga mjir Lawi na aɗi kəcimta kərɗa wa ku ləkwa səli. Antə da kəcimta kər ɗa, ka səntə saɗaka mbamba akwa mbwar MTHLAKU.

¹⁶Antə da mwari ka ndzəndzi akwa vəi ndzəndziyir ɗa apatə mdə ku rəbuta akwa tsawur Musa na mdər Hyel. Antə mjir Lawi ni hamta mamshir saɗaka ni aka pristayeri ni, antə da pshingkər ata kəra bagaɗi ni.

¹⁷Təng tə mji hang aɗi kəcimta kərɗa wa, ku ndzi dwali aka mjir Lawi ka da an thlamta ala ɗa wulya maɗa' gamayeri ar Kucalər Fəlɓəla Kəi ni, ka hamta ɗa aka MTHLAKU. Apani antə da ku namtə mji ni tə da ndzi kəcəkəcari akəma MTHLAKU.

¹⁸Tsuwa mji dlama dlama ku thlata akwa nyarmbwar Ifrayim, ka Manasse, ka Issakar, ka nyarmbwar Zebulun, na aɗi kəcimta kərɗa wa. Amma wala apani da ku səm susəmər Kucalər Fəlɓəla Kəi ni, wala tə aɗi kalkal wa ma mda ata nu tsawur Musa. Amma Kuthli Hezekiya ku hara ala ɗa adduwa abbər, “Ka MTHLAKU na ana hara ɓɗakkur tifəmta aka kəlara mda

¹⁹na ku hamta ɗəffari akwa bara MTHLAKU na Hyelər kəkayeri arni, wala tə ma mda ata nu tsawu na ar Vəi na Ɓɗakkarkara tsa aɗi kəcəkəcari wa.”

²⁰Antə MTHLAKU ku nggatə Hezekiya, ka mbantə mji ni.

²¹Antə mjir Israila na akwa Urushalima ku hara Kucalər Buradi na Kula Yist ni har vir murfa akwa kucali ka duna. Antə mjir Lawi ka pristayeri ku hu MTHLAKU tədək viri, akwa hara ha ka surtsayeri na ka kuraku swaiswai.

²²Antə Hezekiya ku gari ka dunautə shanga mjir Lawi na ku ncantə masəkukur akwa kəthlər aka MTHLAKU. Antə akwa virayeri ngəni murfə ni, mji ku kəɗar səm susəmər vir kucali ni, akwa hamta saɗakar jakə mwardzi, ka ar gwaɗita aka MTHLAKU na Hyelər kəkayeri arɗa.

²³Antə shanga mji na tsaptədzi ni ku kələngkər ka da jaktə ləkəma ka kucalər vəngkər səli ni har vir murfa ka damwa. Antə da ku ləkəma ka kucali mnyar vir murfə ni.

²⁴Kamnyar Hezekiya na kuthlir Yahuda ku hamta aka tsaptədzi ni gyal dəpu pal, ka təma kəga kwi dəpu murfa, kamnyar saɗaka. Antə kwakunayeri tsuwa ku hamta aka tsaptədzi ni gyal dəpu pal, ka təma kəga kwi dəpu kuma. Antə pristayeri hang ku kəcimta kər ɗa.

²⁵Antə shanga mjir Yahuda na tsaptədzi ni, ka pristayeri kəga mjir Lawi, ka shanga mjir Israila na ku si akwa tsaptədzi ni, ka mətəpiyayeri na ka ndzi akwa Yahuda ka Israila, shang ku hara kucali.

²⁶Antə mdə ku hara kucali na ola akwa Urushalima. Kamnyar təng akwa sakar Solaman na ɓzər Dauda na kuthlir Israila, mda aɗi ɗar jaktə hara kucali na ola apani akwa Urushalima wa.

²⁷Aghəla nda antə pristayeri ka mjir Lawi ku thlatə ka vədzə barka aka mji, antə Hyel ku nggatə adduwar ɗa akwa vəi ndzəndziyirni na ɓɗakkarkara amtazi.