Read bura-pabir 2 Lab 31 Bible Online

2 Lab 31 - bura-pabir bible

2 Lab 31

¹Aghəla tə mdə ku kuri kucali ni, antə shanga mjir Israila na ku mwari akwa Urushalima ni ku mwari akwa bərniyayeri ar Yahuda, ka Benjamin, ka Ifrayim, ka Manasse, ka pukthləmta haptayeri ar Ashera, ka huzamta vəi vəngkər səli aka haptayeri, kəga bagaɗiyayeri arɗa. Aghəla nda antə mjir Israila ku ngka akwa bərniyayeri arɗa kəga kutakəyayeri arɗa.

²Antə Hezekiya ku pwi pristayeri ka mjir Lawi zara zara, kəlara zara ka jili kəthlər tə tsa ata harari. Mji aɗi na kamnyar hamta saɗaka mbamba ka saɗakar jakə mwardzi. Tsuwa mji aɗi na kamnyar kəthlər akwa nyarfayeri ar ləkwa mbwar MTHLAKU, ka da pwara akwa suayeri zumzum ar vəngkər səli, ka hamta gwaɗita ka huwa aka MTHLAKU.

³Tsuwa Kuthli Hezekiya ka kərari ku hamta dlarərni ar sur hara saɗaka mbamba, tə mda ana hara tədəku ɗəɗəpa ka tahaku, ka natə mda ana hara Vir Ghərəmtaghəra ar Sati, ka na ar Thliya Bilən, ka tsuwa shanga vir kucalayeri tə mdə ku thlamta, kalkal apatə mdə ku rəbuta akwa tsawur MTHLAKU.

⁴Tsuwa kuthli ni ku tsawa aka mji na ka ndzi akwa Urushalima abbər ka da ləkəma ka səntə sur hamta tə kalkal ka mdə hamta aka pristayeri kəga mjir Lawi, kamnyar ka da mzhi hamta kərɗa swakti akwa nu tsawur MTHLAKU.

⁵Sakatə mjir Israila nggatə labar tə kuthli pəla ni, təng təkəma da səntə yarakəmar mthlir ɗa hang, ka ar yimər anap, ka mal zaitun, ka cirməma, ka ar shanga sur faku. Tsuwa da ku səntə zaka ar shanga su, antə su tə da tsaptə ni ku hara hang ka duna.

⁶Antə mjir Israila ka Yahuda na ka ndzi akwa bərniyayeri ar Yahuda tsuwa ku səntə zaka arɗa na ar thla, ka təma kəga kwi, kəga zaka ar suayeri damwa na ɓɗakkarkara tə mdə hamta aka MTHLAKU na Hyelər ɗa. Antə da tsaptə ɗa ata kəma duku tyaləm tyaləm.

⁷Akwa thliya na makərkur antə da baɗitə tsaptə kariyayeri ata kəma duku ni, ka sə kuri akwa thliya na murfəkur.

⁸Sakatə Hezekiya ka mjirni na ol'ola ku si ka wutə hangkur kariyayeri tə mdə tsaptə ni, antə tsa usar MTHLAKU ka mjirni Israila.

⁹Antə Hezekiya yu pristayeri ka mjir Lawi ni abbər, “Mdə wuta ama kariyayeri ngəni shang nə ri?”

¹⁰Antə Azariya na olər pristayeri ni, na akwa kutakəyir Zadok ni, shinau alari abbər, “Təng sakatə mji baɗitə səntə cautayeri arɗa akwa mbwar MTHLAKU, yeru ku wutə susəma tə yeru ana səma ka mzhi yeru, har ka mbiləmta hang, kamnyar MTHLAKU ku vədzə barka aka mjirni. An su na hara tə yeru ka kari na mbiləmta hang apani ni.”

¹¹Aghəla nda, antə Hezekiya tsawa ala ɗa abbər ka da ɗəmhə kutambwayeri ar pwi su na akwa mbwar MTHLAKU ni, antə da ku ɗəmhə ɗa.

¹²Antə kula beɗi, da fatə cautayeri ni, kəga zaka, ka shanga suayeri tə mdə hamta aka Hyel ni, ka mwanta akwa mbwayeri ni. Antə mdə vəngkər mdər nyarmbwar Lawi laga na ka thləmari Konaniya abbər ka tsa an wul kari ni, ka ɓzərma' ni Shimeyi abbər ka tsa an ndzi mdər dlarərni.

¹³Mambila mji na akwa dlar Konaniya ka ɓzərma' ni Shemeyi akwa kəthlər ni an Yehiyel, ka Azaziya, ka Nahath, ka Asahel, ka Yerimoth, ka Yozabad, ka Eliyel, ka Ismakiya, ka Mahath, ka tsuwa Benaiya. Kuthli Hezekiya ka Azariya na olər mbwar vəngkər səli ni an pwi mji nayeri ni.

¹⁴Antə Kore na ɓzər Imna na mdər Lawi, na mdər sək nyarfu na abwar raghəi, an ata kəra sur hamta na ar hirər ɗəffu tə mdə hamta aka Hyel ni. Tsuwa tsu tsa an ata kəra ndəkəmta cautayeri tə mdə hamta aka MTHLAKU, ka shanga mambila cautayeri na ɓɗakkarkara ta shang.

¹⁵Thləma mji na akwa dlar Kore ni an Eden, ka Miniyamin, ka Yeshuwa, ka Shemaiya, ka Amaliya, ka tsuwa Shekaniya. Antə kula beɗi da ku dlar ni akwa bərniyayeri ar prist ni, ka ndəkəmta cautayeri ni aka maɗama' ɗa zara zara, aka mji na ol'ola kəga maɗankyar shang kula nca zumzumkur.

¹⁶Tsuwa da ku ndəkəmta cautayeri aka shanga mji shili na ka məva makər har ka ləmta, mji tə mdə ku rəbutə thləma ɗa akwa labar nyarmbwar mjir Lawi, watau shanga mji na ku ləkwa mbwar MTHLAKU, kamnyar hara kəthlər tədək viri apatə mdə ku thlamta, atar mnya kəthlərər ɗa ka zarar ɗa.

¹⁷Antə mdə ku ndəkəmta kəthlərayeri aka pristayeri ni atar kutakəyir kəkayeri arɗa, ka hamta aka mjir Lawi na ka məva sərkumari ka ləmta kəthlər na ku kəɓa ka kəthlər ar zarar ɗa.

¹⁸Mdə rəbutə thləma pristayeri ni ata kəma duku kəga maɗankyarər ɗa na raka raka, ka mwankir ɗa, ka maɗashilər ɗa, ka maɗankwiyir ɗa, watau shanga mji, kamnyar da ku ndzi ka jirkur akwa kəcimta kər ɗa.

¹⁹Tsuwa ar pristayeri na akwa nyarmbwar Haruna, watau na ka ndzi akwa mtakayeri na kalaktə bərniyayeri ni, mdə pwi mji shili ata thləm ata thləm akwa kəlara di, ka da ndzi mjir ndəkəmta ala ɗa kari na mbiləmta tə mdə tsaptə ni. Antə kəlara mdə sal na akwa nca mjir Lawi ni, natə mdə ku wutə thləmari akwa labar ar mjir nyarmbwar Lawi na gwang ni, mdə ku na alari kari akwa nca na mbil ni.

²⁰Apani antə Hezekiya ku hara akwa shanga Yahuda. Tsa ku hara su na ɓɗaku, ka na kalkal, ka jirkur tsuwa akəma MTHLAKU na Hyelərni.

²¹Antə akwa shanga kəthlərayeri tə Hezekiya kəta abbər tsa ata harari akwa mbwar Hyel, na ku ndzi kalkal ka su tə tsawa pəla, tsa ku bara kəma Hyel ka hara kəthlər ni ka ɗəffari shang. Antə apani tsa ku wutə ləkəma swaiswai.