Read bura-pabir 2 Lab 32 Bible Online

2 Lab 32 - bura-pabir bible

2 Lab 32

¹Aghəla suayeri ngəni tə Kuthli Hezekiya ku hara ka jirkur ni, antə Sennakerib na kuthlir Assiriya ku si ka dlər Yahuda. Antə tsa ka sojayeri arni si ka kalaktə bərniyayeri na akwa katangga abbər ka da dlərəmta ɗa ka da ndzi arni.

²Sakatə Hezekiya wuta abbər Sennakerib ku si ka dzamər dlər Urushalima,

³antə Hezekiya gari aka kwakunayeri arni, ka mji na ol'olər sojayeri arni. Antə da ɗəmha abbər da ata dzəɓta mnya kucirkilayeri na ata hildi, antə da ku dlar kuthli ni.

⁴Antə mji dlama dlama ku tsaptədzi ka hartə shanga kucirkilayeri ka thlamta lakur zərkayeri na ləɓəla, ta mji nda awutə yimi. Kamnyar da pəla, “Kamnyar mi tə kuthlyayeri ar Assiriya ata si ka wutə yimi hang azi ri?”

⁵Antə kuthli Hezekiya ku thlatə ka hara kəthlər ka duna akwa hənɓəla shanga vəi na ku ɓələmtadzi ata katangga ni, ka həntə mbwayeri na nal nal ata kəra ri. Tsuwa tsa ku həntə katangga damwa aɓəlaɓəla na ku kalaktə katangga na ntangkəma ni, kamnyar dunautə ni. Tsuwa tsa ku jaktə namtə vəyayeri laga tə mdə shiktə ka həi akwa Bərniyir Dauda, ka nagamtə kari ar mpa ka partauwayeri hang.

⁶Antə tsa pwi mji na ol'olər sojayeri ata kəra mji, ka tsaptə ɗa akəmari akwa bəbal na anyarfur bərni ni, ka dunautə ɗa akwa pəla,

⁷“Ka giri ntsətədzi, ka ndzi ɓəɓal! Giri aɗiya thlivər kuthlir Assiriya wa, wala ka shaha giri fəidzi kamnyar sojayeri arni na dlama dlama ni wa. Kamnyar dunar mdə na adzə mburu ni ku təramta dunar mji na adzə ni ni.

⁸Kamnyar wala tə tsa ka sojayeri hang, da an mji daci na kum ka mamshi. Amma ar mburu, MTHLAKU na Hyelər mburu an adzə mburu, kamnyar dlar mburu, antə tsa ata dlərəmta ɗa ala mburu.” Antə gari tə Hezekiya na kuthlir Yahuda hara ni ku dunautə mji ni ka duna.

⁹Aghəla nda, akwa sakatə Sennakerib na kuthlir Assiriya ka shanga sojayeri arni akwa dlər Lakish, antə tsa thlentə mji ahar Urushalima. Tsa thlentə mji ka pəla aka Hezekiya na kuthlir Yahuda ka shanga mjir Yahuda na anda akwa Urushalima, abbər,

¹⁰“Nggədza su tə Sennakerib na kuthlir Assiriya pəla, ‘Man tə giri ntsari ri, har tə giri akwa tamata abbər su aɗi na ata wutə giri akwa Urushalima wa ni?’

¹¹Ai Hezekiya akwa pwaktə giri, kamnyar ka tsa zhar giri ka giri kurəmtadzi ka mi ka thləli. An su na hara tə tsa pəla ala giri abbər MTHLAKU na Hyelər giri ata mbuli giri akwa tsiya kuthlir Assiriya ni.

¹²Aɗi tsu Hezekiya ka kərari an huzamta vəyayeri ar vəngkər səli na ata garayeri kəga bagaɗi saɗakar ɗa wa ya? Kambəla tsa tsawa aka shanga mjir Yahuda ka Urushalima abbər ka da vəngkər səli ka mba tulari ɗuza ata kəra bagaɗi saɗaka duku ɗeng ni?”

¹³“ ‘Giri aɗi səndə su tə iya ka kəkayeri arna hara aka shanga durayeri ar mambila tsəɗiyayeri ni wa ya? Haptayeri ar tsəɗiyayeri ndaga ku mzhi mbuli tsəɗiyayeri ni akwa tsi ya?

¹⁴Hyelər mjir tsəɗi madi akwa nca tsəɗiyayeri natə kəkayeri arna ɓdləmta ni an mzhi mbuli mjirni akwa tsi ri? Kaha, tə aɗi wala duku wa, man hara tə giri ata mbərsa abbər Hyelər giri ata mzhi mbuli giri akwa tsi nə ri?

¹⁵Antə giri aɗiya zhar ka Hezekiya pwaktə giri ka shamta giri akwa laku ngəni wa. Tsuwa Giri aɗiya mbərsa ka tsa wa, kamnyar hyelər tsəɗi wala kuthlikur aɗi na ku ɗar msərantə mjirni akwa tsi wala tsiya kəkayeri arna wa. Antə apa madi tə Hyelər giri ata mzhi mbuli giri akwa tsi ri?’ ”

¹⁶Antə mji natə Kuthli Sennakerib thlentə ni ku ləkəma ka mnya ɗimi ata kəra MTHLAKU na ka Duna ta Shang ka mafarni Hezekiya.

¹⁷Tsuwa Sennakerib ku rəbutə wasikayeri laga akwa nggənggəl MTHLAKU na Hyelər Israila. Tsa pəla akwa wasika ni abbər, “Tsu apatə haptayeri ar mjir tsəɗiyayeri ni aɗi mzhi mbuli mjir ɗa akwa tsi wa, apani tsuwa Hyelər Hezekiya aɗi ata mzhi mbuli mjirni akwa tsi wa.”

¹⁸Antə mjir thlenta ar Assiriya ni haptə kuraka ɗa ka pəla akwa mnya Ibrani, kamnyar ka shanga mji na ata katanggar Urushalima ni mzhi nggatari, ka da thlivər ka yakata. Da hara apani kamnyar ka da mzhi dlutsə bərni ni.

¹⁹Da ku mnya ata kəra Hyelər Urushalima apa dlu tsa kalkal ka haptayeri natə mda an namta.

²⁰Antə Kuthli Hezekiya ka naɓi Ishaya na ɓzər Amoz ku hara adduwa aka Hyel na amtazi kamnyar ndərayeri ngəni.

²¹Antə MTHLAKU ku thlentə mdərthlentərhyel laga tə tsa si ka kurəmta shanga sojayeri na mulmulari akwa mpa ni, ka mji na ol'olər sojayeri, ka sojayeri na ol'ola, na akwa vəi fəliyir kuthlir Assiriya. Antə kuthli ni ku ngka akwa tsəɗiyirni ka səli akwa ncari. Antə vir laga sakatə tsa mwari akwa mbwar haptərni, təng mji laga akwa nca maɗashilərni na maɗakutari tadərwa ni ka katsakar.

²²Apani antə MTHLAKU ku msərantə Hezekiya ka shanga mji na akwa Urushalima akwa tsiya Sennakerib na kuthlir Assiriya ka shanga mambila dawayeri arni. Antə tsa na ɗa ndzəndzi lapiyakur ka shanga tsəɗiyayeri na kalaktə ni.

²³Antə mji hang ku səntə sur hamta aka MTHLAKU akwa Urushalima kəga cautayeri na ka daraja aka Hezekiya na kuthlir Yahuda. Təng akwa saka ndaga antə Hezekiya baɗitə wutə daraja ata nca shanga mjir tsəɗiyayeri ni.

²⁴Akwa saka na ndaga antə Hezekiya ku hara nggawa na mwavər har tə tsa abaka mta. Antə tsa hara adduwa aka MTHLAKU, antə MTHLAKU ku hamta alari amsa ka na alari seɗar mbantədzi laga.

²⁵Amma kamnyar kər olkur tə Hezekiya kəgari, tsa aɗi ncantə gwaɗitərni aka Hyel wa. Kamnyar ngəni antə ɗəffə bwarbwarkur ar MTHLAKU ku thlata ata kərari, ka ata kəra Yahuda ka Urushalima.

²⁶Antə Hezekiya ku tubi ata kəra olkur na akwa ɗəffari ni, tsa ka shanga mjir Urushalima, antə ɗəffə bwarbwarkur ar MTHLAKU aɗi si ata kəra ɗa akwa sakatə Hezekiya ka mpikə wa.

²⁷Antə Hezekiya ku ndzi ka gəna hang ka duna, tsuwa shanga mji ku nar olkur. Tsa ku həntə mbwayeri kamnyar pwi gəna ar adzərfa, ka na ar dinar, ka tsuwa kamnyar pelayeri na ka daraja, ka yaji, ka partauwayeri, ka shanga kariyayeri na ɓɗakɓɗaku.

²⁸Tsuwa tsa ku həntə mbwayeri kamnyar pwi mthli, ka yimər anap, ka mal zaitun. Tsuwa tsa ku latə səvayeri kamnyar pwi thla ka namtə ciɓayeri kamnyar pwi təma kəga kwi.

²⁹Tsuwa tsa ku nthləi kauyayeri hang, ka wutə mwaɓiyayeri zumzum hang apa thla, kəga təma, kəga kwi, kamnyar Hyel ku na alari gəna hang.

³⁰Tsuwa tsu Hezekiya ngəni an dzəɓtə lakur yimi na amta ahar Gihon, ka shinar ni tə tsa ləghəi təbwar ramta ka Bərniyir Dauda ni. Antə Hezekiya ku wutə ləkəma akwa shanga kəthlərayeri arni.

³¹Antə wala sakatə mji na ol'olər Babila thlentə mji adzə Hezekiya ka da ra yu ni ata kəra seɗayeri na ol'ola na hara akwa tsəɗi ni, Hyel zhar Hezekiya kamnyar ngkərtə ni ka tsa nggaɓəla su na akwa ɗəffari.

³²Kulini mambila kəthlərayeri natə Hezekiya ku hara ɓɗakɓɗaku, mdə ku rəbutə ɗa akwa Su na Kəlardzi aka naɓi Ishaya na ɓzər Amoz, ka tsuwa akwa Kakaɗər Kuthlyayeri ar Yahuda ka Israila.

³³Antə Hezekiya ku mti, antə da ku harəmta ni akwa kul na amta ata kəra kulayeri ar maɗa' Dauda. Antə shanga mjir Yahuda kəga mji na akwa Urushalima ku nar olkur akwa sakar mtərni. Antə Manasse na ɓzərni ku ndzi kuthli ata vəyari.