Read bura-pabir 2 Lab 34 Bible Online

2 Lab 34 - bura-pabir bible

2 Lab 34

¹Yosiya ka məvari ncisu ka yarni sakatə tsa ləkwa kuthlikur. Antə tsa hara kuthlikur ar məva makkumari ka ntang akwa Urushalima.

²Tsa ku hara su na kalkal ata nca MTHLAKU, ka nu surharar Dauda na kəkarni. Tsa aɗi pəramta abwa mazəm wala abwa matsəkar wa.

³Akwa məva na nciskur ar kuthlikurərni, sakatə tsa tsu ɓzəngkyar, antə Yosiya baɗitə bara kəma Hyelər Dauda na kəkarni. Antə akwa məva na kumnya suɗkur, tsa baɗitə huzamta vəyayeri ar vəngkər səli aka haptu Ashera ka haptayeri tə mdə marəmta wala fatəmta, na akwa Yahuda ka Urushalima.

⁴Tsa vu tə mji pukthləmta bagaɗiyayeri ar hamta saɗaka aka haptu Baal, ka huzamta bagaɗiyayeri ar mba tulari ɗuza na ata kəra ɗa. Tsa vu tə mji pukthləmta haptu Ashera ka dludzər haptayeri tə mdə marəmta kəga natə mdə fatəmta, har tar tə da ndzi apa bərbər, ka titiləmta bərbərari ata kəra kulayeri ar mji na hamta ala ɗa saɗaka ni.

⁵Tsuwa tsa ku mbamta ɗethlər pristayeri ar haptu ata kəra bagaɗi arɗa. Antə apani tsa ku kəcimta Yahuda ka Urushalima.

⁶Tsuwa tsa ku hara su ngəni akwa shanga bərniyayeri kəga fyayeri na akwa tsəɗi Manasse, ka Ifrayim, ka Simeyon, har ka mwari akwa tsəɗi Naftali.

⁷Tsa huzamta bagaɗiyayeri ar hamta saɗakar ɗa, ka hadləmta haptu Ashera ka shanga haptayeri tə da ndzi apa bərbər. Tsuwa tsa ku pukthləmta shanga bagaɗi ar mba tulari ɗuza na akwa shanga Israila. Aghəla nda antə tsa ngka ahar Urushalima.

⁸Akwa məva na kumnya nciskur ar kuthlikurərni, sakatə tsa ku kəcimta tsəɗi ni ka mbwar vəngkər səli ni, antə tsa na Yosiya ni thlentə Shafan na ɓzər Azaliya, ka Maaseya na gwamnar bərni ni, ka Yowa na ɓzər Yowahaz, na sakatari abbər ka da ra namtə mbwar MTHLAKU na Hyelərni.

⁹Antə mji ngəni makər ni ku mwari adzə Hilkiya na prist na ol ni, ka hamta alari kwaba tə mdə sənta akwa mbwar Hyel ni, kwaba natə mjir Lawi na ana sək nyarmbwar vəngkər səli tsapta akəla mjir Manasse, ka mjir Ifrayim, ka akəla shanga mji na mbila akwa Israila, ka Yahuda, ka Benjamin, ka mji na ka ndzi akwa Urushalima.

¹⁰Antə da hamta kwaba ni aka mji na akwa wul kəthlər ar nam mbwar MTHLAKU ni. Antə mjir wul kəthlər ni ku kəthlər ka kwaba ni akwa ntəmta mji na akwa nam mbwar MTHLAKU ni, kamnyar ka mbwa ni jaktə namtədzi apa na hwatu.

¹¹Da hamta mambila kwaba ni aka kapəntayeri ka mjir hən mbwa ni, kamnyar ka da mastə pela marmara, ka katako ar basi ka ar mbwa kəra mbwayeri natə kuthlyayeri ar Yahuda zhar tə da ndla ni.

¹²Antə mji ni ku hara kəthlər ka jirkur. Mji na ata kəra ɗa akwa wul ɗa ni an Yahath ka Obadiya na akwa kutakəyir Merari, ka Zakariya ka Meshullam na akwa kutakəyir Kohath. Shanga mjir Lawi nayeri ni an masəku akwa hayeri kəga tsatsa su swaiswai.

¹³Tsuwa bwadukwa mjir Lawi laga ku ndzi ata kəra mjir fa kəla, antə da an akwa wul shanga mji na akwa hara kəlara kəthlər madi. Bwadukwa mjir Lawi tsuwa ku ndzi mjir rəbuta, ka maləmayeri na ol'ola, ka tsuwa mjir sək nyarmbwa.

¹⁴Sakatə da akwa fwaɓəla kwaba tə mdə tsapta akwa mbwar MTHLAKU ni, antə Hilkiya na prist ni wutə Kakaɗər Tsawur MTHLAKU natə mdə hamta atar Musa.

¹⁵Antə Hilkiya pəla aka Shafan na sakatari abbər, “I ku wutə Kakaɗər Tsawa ni akwa mbwar MTHLAKU!” Antə Hilkiya hamta kakaɗə ni aka Shafan.

¹⁶Antə Shafan mwantə kakaɗə ni aka kuthli, ka pəla alari, “Yeru na mafar nga, yeru ku haratə shanga su tə ga ku tsawa ala yeru ka yeru hara.

¹⁷Yeru ku fwaɓəla kwaba natə mdə tsapta akwa mbwar MTHLAKU ni, ka hamta akwa tsiya mjir wul kəthlər ni, ka mjir kəthlər ni.”

¹⁸Antə Shafan na sakatari pəla aka kuthli abbər, “Tsuwa nggədza kakaɗə laga tə Hilkiya na prist ku na ali.” Antə Shafan ku karatəmta aka kuthli.

¹⁹Sakatə kuthli ku nggatə su tə mdə rəbuta akwa kakaɗər tsawu ni, antə tsa thləhumta ləptərni.

²⁰Antə tsa kəga Hilkiya, ka Ahikam na ɓzər Shafan, ka Abdon na ɓzər Mika, ka Shafan na sakatari, ka Assaiya na buɗar kuthli, ka pəla ala ɗa abbər,

²¹“Mwar giri, ka giri ra yuɓəla ali akəla MTHLAKU, ali ka aka mji na mbila akwa Israila ka akwa Yahuda, ata kəra ndərayeri na akwa kakaɗu tə mdə wutə ni. Kamnyar ɗəffa MTHLAKU ku ɓzi ka duna, antə tsa ata pumta ɗəffari ni ata kəra mburu. Kamnyar kəkayeri ar mburu aɗi nu tsawur MTHLAKU wa, da aɗi hara shanga su tə mdə rəbuta akwa kakaɗə ngəni wa.”

²²Apani antə Hilkiya ka mji tə kuthli thlentə ni ku mwari ra bara sauri akəla Hulda na naɓi mwala. Hulda an mwalar Shallum na ɓzər Tokhath, na ɓzər Hasra. Shallum an ata kəra vəi pwi ləptayeri ar kəthlər akwa mbwar Hyel. Antə Hulda ni ka ndzi akwa Urushalima akwa Zara na Bilən. Antə mji nda ngkərɓəla alari su na ku hara.

²³Antə mwala ni pəla ala ɗa, “Nggədza su tə MTHLAKU na Hyelər Israila pəla aka mdə na thlentə giri adzə ra ni. Pəla giri aka mdə na thlentə giri adzə ra ni abbər,

²⁴MTHLAKU pela, ‘Jiri, I ata sənta asar ata kəra tsəɗi ngəni, ka ata kəra mji na akwa, shanga asarayeri tə mdə rəbuta akwa kakaɗu tə mdə karata akəma kuthlir Yahuda ni.

²⁵Kamnyar mjir Yahuda ku fwari ata kəri ka mba sur shiwura aka haptayeri. Antə apani da ku ɓzamtə ɗəffi ka duna, kamnyar tə da akwa vəngkər səli aka suayeri tə da nam shang ka tsiya ɗa ni. Antə hangkali ku thlatə ka duna ata kəra tsəɗi ngəni, antə sur mtathliyari aɗi wa.’

²⁶Amma aka kuthlir Yahuda na thlentə giri abbər ka giri sə yuɓəla alari su akəla MTHLAKU ni, ka giri pəla alari su tə MTHLAKU na Hyelər Israila pəla ata kəra ndərayeri tə giri nggatə ni.

²⁷MTHLAKU akwa pəla, ‘Kamnyar I ku wuta abbər gə ka ɗəffər tubi, har tə ga ku tərghəi kəra ga akəmi sakatə gə nggatə ndərayeri tə I pəla ata kəra bərni ngəni ka mji na akwa ni, antə ga ku tərghəi kəra ga, ka thləhumta ləptər nga, ka tuwa ka shimwi akəmi, antə I ma tsuwa I ku nggatə nga.

²⁸I ata vu ka gə mta, ka mdə harəmta nga akwa msərakur akwa kula adzə kəkayeri ar nga. Antə ga aɗi ata wutə shanga asarayeri tə I ata səntari akwa tsəɗi ni kəga mji na akwa ka nca gə wa.’ ” Antə da ku ngka ka labar ni aka kuthli.

²⁹Antə kuthli ku thlentə labar abbər ka shanga mji na ol'olər Yahuda ka na akwa Urushalima tsaptədzi ata kəma duku.

³⁰Antə kuthli ni ku ləmta akwa mbwar MTHLAKU ata kəma duku kəga shanga mjir Yahuda, ka mji na akwa bərni Urushalima, ka pristayeri ka mjir Lawi, ka shanga mji na ol'ola kəga maɗankyar. Antə kuthli ku karata ala ɗa shanga su na akwa Kakaɗər Alkawal tə mdə wuta akwa mbwar MTHLAKU ni.

³¹Aghəla tə kuthli ni ku kuri karatə ni antə tsa thləthlata akwa vəi thləthlatərni, ka hara alkawal aka MTHLAKU abbər tsa ata nu MTHLAKU, ka ɓəlatə tsawayeri ka suayeri tə tsa thlamta abbər ka mdə hara, ka ɗəffari shang, akwa shanga ndzəndziyir mpikari. Tsuwa tsa ata ɓəlatə shanga ndərayeri ar alkawal tə mdə ku rəbuta akwa kakaɗə ni.

³²Antə tsa vu tə shanga mji na anda akwa Urushalima kəga mjir tsəɗi Benjamin kətə alkawal ngəni. Antə mjir Urushalima ku jaktə kətə alkawal aka Hyel na Hyelər kəkayeri arɗa.

³³Antə Yosiya ku famta shanga su na ku ndzi sur cika kazhar kuta tsəɗi Israila, ka tsawa aka shanga mji na akwa Israila ka da vəngkər səli aka MTHLAKU na Hyelər ɗa. Antə akwa shanga ndzəndziyir mpikari, da aɗi zhar nu MTHLAKU na Hyelər kəkayeri arɗa wa.