Read bura-pabir 2 Lab 35 Bible Online

2 Lab 35 - bura-pabir bible

2 Lab 35

¹Yosiya ku hara Kucalər Fəlɓəla Kəi aka MTHLAKU akwa Urushalima. Akwa vir na kumnya nfwarkur ar thliya na ntangkəma, antə da tsi təma na ar Kucalər Fəlɓəla Kəi ni.

²Antə Yosiya ku pwi pristayeri akwa vəi kəthlərər ɗa, ka dunautə ɗa akwa kəthlərər ɗa na akwa mbwar MTHLAKU.

³Antə tsa pəla aka mjir Lawi na ana thlipa aka shanga mjir Israila, tsuwa mji tə mdə ku hamta ɗa kamnyar hara kəthlər aka MTHLAKU abbər, “Ka giri vəi Akwati Alkawal na ɓɗakkarkar ni akwa mbwa natə Solaman na ɓzər Dauda, na kuthlir Israila tsatə ni. Giri aɗi ata ləkəma ka kəlari ata pathlaha giri wa. Ar giri kulini ka giri hamta kər giri kamnyar hara kəthlər aka MTHLAKU na Hyelər giri, ka aka mjirni Israila.

⁴Ɗəmhə girdzi, ka giri ndəkəidzi zara zara kəlara mji ka kutakəyir kəkar ɗa, kalkal apatə Dauda na kuthlir Israila ka ɓzərni Solaman ku ɗəmha.

⁵Ka giri thləthlatə zara zara akwa Vəi na Ɓɗakkarkara ni, ka kəlara mji akwa nca giri na mjir Lawi ni dlar mjir kutakəyayeri tə mdə paktə giri kəga da.

⁶Ka giri tsi ɓzər gam ar vir Kucalər Fəlɓəla Kəi ni, ka giri kəcimta kər giri ka ndzi ɓɗakkarkara, kalkal apatə MTHLAKU ku pəla aka Musa.”

⁷Antə Yosiya ku hamta dlara ar maɗa' gam kəga maɗa' kwi dəpu makkumari aka mji na ndzang kamnyar ka mdə tsi akwa Kucalər Fəlɓəla Kəi ni. Tsuwa tsa ku hamta ala ɗa gyalayeri dəpu makər. Shanga mwaɓiyayeri ngəni thlata akwa ciɓər kuthli.

⁸Antə kwakunayeri arni ku hamta su ar hirər ɗəffa ɗa aka mji ni, ka aka pristayeri, ka aka mjir Lawi. Antə Hilkiya, ka Zakariya, ka Yehiyel, na mji ol'ola ata kəra kəthlər na akwa mbwar Hyel, ku hamta aka pristayeri sur hamta arɗa na an maɗa' gam kəga maɗa' kwi dəpu suɗa ka aru ngkwa, ka gyalayeri aru makər shang kamnyar saɗakar Kucalər Fəlɓəla kəi.

⁹Antə mji laga na ol'ola ata kəra mjir Lawi ni ku hamta maɗa' gam kəga maɗa' kwi dəpu ntəfu ka gyalayeri aru ntəfu aka mjir Lawi, kamnyar hara saɗakar Kucalər Fəlɓəla Kəi ni. Thləma mji ngəni ol'ol ni an Konaniya, ka mji shili na maɗama'ni suɗa, watau Shemaiya ka Nethlanel, ka tsuwa Hashabiya, ka Yeyiyel, ka Yozabad.

¹⁰Sakatə mdə ku kuri shanga ɗəmhədzi ar Kucalər Fəlɓəla Kəi ni, antə pristayeri thləthlata akwa vəi thləthlatər ɗa, tə mjir Lawi tsuwa ku thləthlata akwa zarayeri arɗa kalkal apatə kuthli ku tsawa.

¹¹Antə mjir Lawi ni ku thlamta wulya maɗa' gam ar Kucalər Fəlɓəla Kəi ni, antə pristayeri ku dlu mamshari, ka pshingkər ata kəra bagaɗi saɗaka ni. Antə mjir Lawi ku ləkəma ka hənəmta mwaɓiyayeri ni.

¹²Antə da kəɓəla bwar saɗaka mbamba ka vəi kamnyar ka da sə ndəkəmta aka mji na ndzang tə mdə pwi ɗa zara zara kəlara mji ka kutakəyir kəkar ɗa ni, kamnyar ka da hamta aka MTHLAKU apatə mdə ku rəbuta akwa Kakaɗər Musa ni. Tsuwa tsu apani antə da hara ka gyalayeri ni.

¹³Antə mjir Lawi ni ku ptsatə maɗa' gam ar Kucalər Fəlɓəla Kəi ni ata u'u apatə mdə ku tsawa, ka ɓwatə saɗakayeri na ɓɗakkarkara akwa tughumayeri, ka akwa gəlamayeri, ka akwa hahəi sul su, ka kətə taktar ka mwanta aka shanga mji ka da ɓɗa.

¹⁴Aghəla nda antə mjir Lawi ni ɗəmhə susəma aka kəra ɗa ka aka pristayeri na kəkayeri ar Haruna. Kamnyar pristayeri ni ndzi akwa kəthlər ar hamta saɗaka mbamba, ka bwar malkum, har aviri. Apani antə mjir Lawi ni ku ɗəmhə susəma aka kəra ɗa ka pristayeri na akwa nyarmbwar Haruna.

¹⁵Tsuwa mjir ha na akwa nyarmbwar Asaf ni ku ndzəndzi tsu akwa vəi ndzəndziyir ɗa apatə Dauda ku thlamta. Antə thləma ɗa an Asaf, ka Heman, ka Yeduthlun na mdər wulsu aka kuthli. Tsuwa wala mjir sək nyarfu na akwa kəlara nyarfur ləvəi akwa kutakəyir mbwar Hyel ni ku ndzəndzi tsu anda, mda aɗi na tərardzi kazhar vəi kəthlər arni wa. Kamnyar maɗama' ɗa na mjir Lawi ni ku ɗəmhə saɗakar Kucalər Fəlɓəla Kəi kamnyar ɗa.

¹⁶Apani antə mdə ku ɗəmhə shanga kəthlər ar MTHLAKU vir nda, kamnyar ɓəlatə vir Kucalər Fəlɓəla Kəi, ka tsuwa kamnyar ka da hamta saɗaka mbamba ata kəra bagaɗi saɗaka aka MTHLAKU, apatə kuthli Yosiya ku tsawa.

¹⁷Antə shanga mjir Israila na aɗi sakanda ku ɓəlatə vir Kucalər Fəlɓəla Kəi ni akwa saka ndaga, ata kəma duku ka Kucalər Buradi na Kula Yist ar vir murfə ni.

¹⁸Təng ka sakar naɓi Samiwal, mda aɗi ɗar jaktə hara jili Kucalər Fəlɓəla Kəi apani akwa Israila wa. Mda aɗi akwa nca kuthlyayeri ar Israila na ku ɗar hara jili kucali ngəni tə Yosiya hara ni wa. Kamnyar tsa ku tsaptə shanga pristayeri kəga mjir Lawi, ka shanga mjir Urushalima, kəga mji na thlata akwa tsəɗi Yahuda ka Israila shang anda.

¹⁹Akwa məva na kumnya nciskur ar kuthlikur Yosiya, antə mdə hara jili Kucalər Fəlɓəla Kəi ngəni.

²⁰Aghəla ngəni shang, sakatə Yosiya ku ɗəmhə mbwar vəngkər səli aka Hyel, antə Neko na kuthlir Masar ku mwari ka ra dləra ahar Karkemish ata mnya Thlyagha Yufiretis, antə Yosiya ku ləɓəla ka tsa mpa ni.

²¹Amma Kuthli Neko ku thlentə mjir thlenta adzə Yosiya ka labar abbər, “Man tə ga akwa barari akəli ri, kuthlir Yahuda? Ai ashina I aɗi si kamnyar mpa ka gə wa. I si kamnyar dlər tsəɗi na akwa hara dawakur ka iya daci. Tsuwa Hyel ku pəla ali abbər kəi hara taktar. Antə ga aɗiya hara dawakur ka Hyel na ata vəi duku ka I ni wa, ta tsa asə tsi nga.”

²²Amma wala apani Yosiya aɗi hir psi thləm aka su tə Hyel pəla atar kuthli Neko ni wa. Ata vəya ndaga təng tsa mwantə sojayeri arni akwa mpa akwa bəbal ar Megiddo. Antə tsa ntsumta ləptər kuthlikur arni ka pwi, ka pali dludzərni, ka ləkwa mpa ka Neko.

²³Antə akwa mpa ni sojar mjir Masar ku shi Kuthli Yosiya ka afa. Antə kuthli ni pəla aka buɗayeri arni abbər, “Kəɓəla gir ra, kamnyar I ku dəkəidzi ka duna!”

²⁴Antə da ku kəɓəla ni kazhar wagənər taku ni, ka vu ni akwa wagənər taku damwa, ka ngka ka tsa akwa Urushalima. Antə tsa ku mti anda, antə mdə ku harəmta ni akwa vəi kulər kuthlyayeri. Antə shanga mjir Yahuda ka Urushalima ku tuwa Yosiya.

²⁵Antə naɓi Irmiya ku hara ha ar jikatuwar Yosiya, hayeri natə har ba ashina shili ka mwanki ana hara kamnyar tuwa ni. Antə ha ngəni ku ndzi sur hara aka mjir ha na akwa Israila. Tsuwa mdə ku rəbutə ha ngəni ni akwa Kakaɗər Jikatuwayeri.

²⁶Tsuwa mambila kəthlərayeri tə Yosiya hara, kəga kəthlərayeri arni na ɓɗakɓɗaku tə tsa hara kalkal apatə mdə ku rəbuta akwa Kakaɗər Tsawur MTHLAKU,

²⁷watau shanga su tə tsa hara baɗita ata səlari har ka mwantə ka tsikərari mdə ku rəbutə ɗa akwa Kakaɗər Labar ar Kuthlyayeri ar Israila ka Yahuda.