Read bura-pabir 2 Lab 36 Bible Online

2 Lab 36 - bura-pabir bible

2 Lab 36

¹Antə mjir Yahuda ku kətə Yehowahaz na ɓzər Yosiya, ka vətə ni ata kuthlikur akwa Urushalima ata vəya baba'ni.

²Yehowahaz ka məvari sərkumari ka makər sakatə tsa baɗitə hara kuthlikur. Antə tsa hara kuthlikur ar thliya makər akwa Urushalima.

³Antə kuthlir Masar ku kəli Yehowahaz ata olkur akwa Urushalima, ka vu tsəɗi Yahuda akwa ntə tsəma ar adzərfa talent aru pal, ka tsuwa ar dinar talent pal.

⁴Antə kuthlir Masar vətə Eliyakim na ɓzərma' Yehowahaz, tə tsa ndzi kuthlir Urushalima ka Yahuda, ka pali alari thləmari tə ndzi Yehoyakim. Antə Neko kətə Yehowahaz na ɓzərma'ni ni ka mwantə ni ahar Masar.

⁵Yehoyakim ka məvari sərkumari ka ntəfu sakatə tsa baɗitə hara kuthlikur. Antə tsa hara kuthlikur ar məva kumkantang akwa Urushalima. Tsa ku hara su na ɗimi ata nca MTHLAKU na Hyelərni.

⁶Antə Nebukadnezzar na kuthlir Babila ku si ka dlər Yahuda, ka ngkəi Yehoyakim, ka mbwau məsəsal akwa səlari, ka mwantə ni ahar Babila.

⁷Tsuwa Nebukadnezzar ku fatə bwadukwa kariyayeri ar mbwar MTHLAKU, ka mwanta akwa kəi kuthlikur arni ahar Babila.

⁸Mambila kəthlərayeri ar Yehoyakim, ka shanga sur cika tə tsa hara, ka su tə tsa ɓzamta, mdə ku rəbutə ɗa akwa Kakaɗər Kuthlyayeri ar Israila ka Yahuda. Antə Yehoyacin na ɓzərni ku dlu tsiyari, ka ndzi kuthli.

⁹Yehoyacin ka məvari ncisu sakatə tsa baɗitə hara kuthlikur. Antə tsa hara kuthlikur ar thliya makər ka vir kuma akwa Urushalima. Tsa ku hara su na ɗimi ata nca MTHLAKU.

¹⁰Akwa sakatə di ata mərta, antə Kuthli Nebukadnezzar thlenta abbər ka mdə səntə Yehoyacin alari ahar Babila, ata kəma duku ka kariyayeri na ka daraja na akwa mbwar MTHLAKU. Antə tsa vətə Zedekiya na ɓzərma' Yehoyacin ni ata kuthlikur tə tsa ndzi kuthlir Yahuda ka Urushalima.

¹¹Zedekiya ka məvari sərkumari ka ntang sakatə tsa baɗitə hara kuthlikur. Antə tsa hara kuthlikur ar məva kumkantang akwa Urushalima.

¹²Amma Zedekiya ku hara su na ɗimi ata nca MTHLAKU na Hyelərni. Tsa aɗi tərghəi kərari akəma Naɓi Irmiya na pəla alari su tə MTHLAKU pəla wa.

¹³Amma Zedekiya ku hara sur thlentə hangkal aka Nebukadnezzar, antə Nebukadnezzar ni vu ni tə tsa kahyel alari akwa thləma Hyel abbər tsa ata kələngkər alari akwa shanga su. Zedekiya ku hara kər ɓəɓalkur ka ndzi su hilhila, ka nggəlar ta ngka adzə MTHLAKU na Hyelər Israila.

¹⁴Tsuwa shanga mjir Yahuda purəm kəga pristayeri na ol'ola, ku ndzi kula jirkur, ka ləkwa nu shanga sur cika natə durayeri damwa ana hara ni. Antə da diɓərantə mbwar MTHLAKU natə tsa ka kərari ku namtə ni ɓɗakkarkara akwa Urushalima.

¹⁵MTHLAKU na Hyelər kəkayeri arɗa ku kəɗar thlenta ala ɗa mjirthlentərni, kamnyar tsa ana kətadzə mjirni ka tsuwa mbwarni ni.

¹⁶Amma da ku ləkəma ka kyartəkur aka mjirthlentərhyel, ka rutəmta ndərər Hyel, ka mnya ɗimi aka naɓiyayeri arni, har tə ɗəffə bwarbwarkur ar MTHLAKU ku thlata ata kəra mjirni, har tə kuzəkari aɗi kəra wa.

¹⁷Kamnyar ngəni antə Hyel vu tə kuthlir Babila səntə mpa ata kəra ɗa, har tə tsa ku kurəmta maɗadakwi arɗa ka katsakar akwa mbwar vəngkər səli arɗa. Tsa aɗi kətadzə mda wala duku wa, wala ɓzərdakwi wala ɓzərngkwa na kula səndə sal wa, wala maɗiya wala kusta wa. Hyel hamta ɗa shang aka kuthlir Babila ni.

¹⁸Tsuwa kuthlir Babila ni ku fatə shanga kari na akwa mbwar Hyel, kariyayeri na raka raka kəga na ol'ola, kəga suayeri na ka daraja akwa mbwar MTHLAKU, ka na akwa kəi kuthlikur, ka na akwa kəyir kwakunayeri arni, ka mwantə ɗa ahar Babila.

¹⁹Antə da mbamta mbwar Hyel ni, ka ɓəgələmta katangga ar Urushalima, ka mbamta shanga kəyayeri na ar kuthlikur ka u'u, ka hilantə shanga su na ka daraja.

²⁰Antə tsa fatə mji na ku mbil ka mpika ka mwantə ɗa ahar Babila, antə da ku ndzi mafa alari ka aka maɗa'ni, har ka vədza aka sakatə mdə nci kuthlikur ar Pashiya,

²¹tsu apatə MTHLAKU ku pəla atar naɓi Irmiya. Antə tsəɗi ni ku wutə sakar ghərəmtaghəra ar məva murfəkumari, watau sakatə tsəɗi ni ata ndzi kula mdə kəthlər ata. Antə tsəɗi ni ku ndzi shizha har tar tə məva murfəkumari ni nghyaɓəladzi, tsu apatə naɓi ni ku pəla.

²²Akwa məva na ntangkəma ar Sairus na kuthlir Parsiya antə MTHLAKU ku tsəkwar ɗəffa Kuthli Sairus abbər ka tsa psəmnya labar akwa shanga kuthlikur arni. Su ngəni ku hara kamnyar nghyaɓəla su tə MTHLAKU pəla atar naɓi Irmiya. Tsuwa akwa kakaɗə ni kuthli rəbuta abbər,

²³“Nggədza tsawur Sairus na kuthlir Parsiya. MTHLAKU na Hyel na amtazi, ku hamta ali shanga kuthlikurayeri ar duniya.Tsuwa tsa ku tsawa ali kəi hənta alari mbwa ahar Urushalima akwa Yahuda. Antə kəlara mda akwa nca giri na mjirni ata mzhi ngka ahar Israila kamnyar kəthlər ngəni. Antə ka MTHLAKU na Hyelərni ndzi ata vəi duku ka tsa.”