Read bura-pabir 2 Lab 4 Bible Online

2 Lab 4 - bura-pabir bible

2 Lab 4

¹Antə Kuthli Solaman ku namtə bagaɗi saɗaka ar əmza natə saɓəlkurari dzar tsi sərkumari, baukurari dzar tsi sərkumari, ka nalkurari tsuwa dzar tsi kuma.

²Tsa vu tə mdə fatəɓəla gəlam əmza laga tawarwar tə mda ana kəga thləmari Manda. Zurangkurari dzar tsi ntəfu, baukurər mnyari dzar tsi dzar tsi kuma. Tar ka səwu natə saɓəlkurari ku mwantə dzar tsi makkumari antə mda ata mzhi kalaktə mnya gəlam ni kəgari.

³Tsuwa aghəya mnya gəlam ni, layi suɗa aɗi tə mdə dəɓatə ka dludzər gyalayeri natə mdə nam ka əmza, kəlara dzar tsi pal dludzər gyal kuma, har ka kalaktə wulya gəlam ni. Tsuwa mdə fatəmta dludzər gyalayeri ni ata dza gəlam ni tə da ndzi su duku.

⁴Antə mdə vətə gəlam ni ata ata hila dludzər gyalayeri kumnya suɗa, makər ka kəma ɗa awul bwar yala, makər ka kəma ɗa awul bwar ramta, makər ka kəma ɗa awul bwar anəm, ka makər tsuwa kəma ɗa awul bwar raghəi. Antə gəlam ni ata hila ɗa, har ka hartə bwar kuciva ɗa ata ɗəffu.

⁵Kəkəskur mnya gəlam ni an apa baukur mandaɓar tsi, tsuwa mnyari ni apa mnya kwapu, apa pukdlər kudla. Gəlam ni ata mzhi kəsi yimi lita dəpu ngkwakumari.

⁶Tsuwa tsa ku namtə balang tasayeri na ol'ola kuma kamnyar kəca, ka pwi ntəfu abwar anəm, ka ntəfwari tsuwa abwar yala. Akwa da antə mda ana yimta kariyayeri tə mdə hara saɗaka mbamba kəgari. Amma ar gəlam ni prist an ata kəthlər kəgari kamnyar kəca.

⁷Antə tsa namtə zwalər dinar kuma ar kəsi pitəlayeri, apatə mdə ku thlamta. Antə tsa pwi ɗa akwa mbwar vəngkər səli ni, ntəfu abwar anəm ka ntəfwari tsuwa abwar yala.

⁸Tsuwa tsa ku namtə tebər kuma, ka pwi ɗa akwa mbwar vəngkər səli ni, ntəfu abwar anəm, ka ntəfwari tsuwa abwar yala. Antə tsa namtə balang tasayeri ar dinar aru pal.

⁹Tsa thlaɓəla bəbal laga kamnyar pristayeri, ka namtə bəbal laga na ola, ka tapərar nyarmbwayeri ar ləkwa kuta bəbal ni. Antə tsa fəi dza tapərayeri ni ka əmza.

¹⁰Antə tsa vəi gəlam tə mda ana kəga thləmari Manda ni abwar anəm, akwa kuɗəmar anəmər bwa raghəi.

¹¹Antə Huram ku namtə tughumayeri, kəga ka tebərayeri ar famta su, kəga balang tasayeri. Apani antə Huram ku kuri kəthlər natə Kuthli Solaman na alari ka tsa hara akwa mbwar Hyel ni.

¹²Nggədza suayeri tə Huram namta, Zhimbwalayeri suɗa, ka kuɓashayeri na ol'ola suɗa apa balang tasa ata kəra zhimbwalayeri ni, ka layi suɗa natə mdə dəɓatə ka dludzər sarka ata kuɓashayeri na ata zhimbwalayeri ni,

¹³ka dludzər yar rumman aru nfwar, kəlara layi pal ka rumman aru pal ata, tsuwa kəlara zhimbwal ka layi suɗa ata,

¹⁴ka amalangkeyayeri, kəlara amalangke ka balang tasa arni ata,

¹⁵ka gəlam na ol ni, ka dludzər gyalayeri na kumnya suɗa na akirari ni,

¹⁶ka tughumayeri, ka tebər famta su, ka cagwaliyayeri na ka kuleng ar kəl kum. Tsuwa shanga suayeri tə Huram Abi namta aka Kuthli Solaman kamnyar mbwar MTHLAKU ni, tsa hara ɗa ka əmza tə mdə fwavumta ɓɗaku.

¹⁷Kuthli vu tə mdə fatəmta liyayeri ni akwa bəbal na kudzəhə ka Thlyagha Jodan, akwa daɓwa Sukkoth ka Zereda.

¹⁸Solaman ku namtə kariyayeri ni hang ka duna, har tə mda amzhi səndə hangkur kəgəɓkur əmza na sha akwa wa.

¹⁹Tsuwa Solaman ku namtə shanga kari kutambwar Hyel ni, watau bagaɗi ar dinar, ka tebərayeri ar putə buradi tə mdə ku hamta aka Hyel,

²⁰ka zwalər kəsi pitəlayeri, kəga pitəlayeri arɗa tə mdə nam shang ka dinar swakti, kamnyar hamta parakəu aka Vəi na Ɓɗakkarkara, apatə mdə ku thlamta,

²¹ka dludzər pukdla tə mdə hara ka dinar, ka pitəlayeri, ka məksayeri tə mdə nam ka dinar swakti,

²²ka makasu ar pamta kəra lagwani, ka balang tasayeri, ka tasayeri, ka tasayeri ar mba sur shiwura. Shanga suayeri ngəni mdə nam ɗa ka dinar swakti. Suayeri bwaduku an nyarmbwayeri ar mbwar vəngkər səli, ka nyarmbwayeri ar Vəi na Ɓɗakkarkara ta Shang na avivi, ka nyarmbwayeri ar mbwar Hyel ni ka kərari, natə shanga ɗa mdə ku fəi dza ɗa ka dinar.