Read bura-pabir 2 Lab 6 Bible Online

2 Lab 6 - bura-pabir bible

2 Lab 6

¹Antə Solaman hara adduwa akwa pəla, “MTHLAKU, gə pəla abbər, ga ata ndzəndzi akwa dlamba na mənggəl.

²Nggədza, I ku hənta ala gə mbwa na ɓɗaku, vəi tə ga ata ndzəndzi akwa har ba saka madi.”

³Sakatə shanga mjir Israila na tsaptədzi ni tsu athləthlata, antə Kuthli Solaman shinar kəmari təbwar ɗa, ka vədza ala ɗa barka.

⁴Tsa pəla, “Hu gir MTHLAKU na Hyelər Israila! Tsa ku nghyaɓəla alkawal tə tsa hara aka baba'na Dauda. Kamnyar tsa pəla aka baba'na,

⁵‘Təng vir tə I fwaɓəla mjirna akwa Masar, I aɗi ɗar carɓəla bərni ar nyarmbwa laga akwa Israila abbər ka mdə vəngkər səli ali akwa wa. Tsuwa I aɗi carɓəla mdə laga ka tsa pwar mjirna Israila wa.

⁶Amma kulini I ku carɓəla Urushalima ka tsa ndzi vəi tə mda ata vəngkər səli ali, ka carɓəla nga, Dauda, ka gə ndzi kuthlir mjirna Israila.’

⁷Babana Dauda ku vu akwa ɗəffari ka tsa həntə mbwar vəngkər səli aka MTHLAKU na Hyelər Israila.

⁸Amma MTHLAKU pəla alari, ‘Dzamər nga ar hən ali mbwar vəngkər səli ali ni ɓɗaku jiri,

⁹amma wala apani, aɗi ga an ata hən mbwa ni wa. Amma ɓzər nga, na ɓzər kuta ga, an ata hən mbwar vəngkər səli ali ni.’

¹⁰Antə kulini MTHLAKU ku nghyaɓəla alkawal tə tsa hara. Kamnyar kulini I ku dlu tsiya baba'na Dauda, ka lətə dəkəl kuthlikur ar Israila, tsu apatə MTHLAKU ku hara alkawalari. Tsuwa I ku həntə mbwar vəngkər səli aka MTHLAKU na Hyelər Israila.

¹¹Tsuwa akwa mbwa ni, antə I vəi Akwati Alkawal ni, tsuwa akwa akwati ni an alkawal natə MTHLAKU ku hara aka mjir Israila.”

¹²Antə Solaman ku thləthlata akəma bagaɗi ar MTHLAKU, akəma shanga mjir Israila na tsaptədzi, ka haptə tsiyari amta.

¹³Solaman ku kurtə namtə vəi tə mda ata lətari ka thləthlata ata. Tsa nam vəi thləthlatə ni ka liyar əmza, saɓəlkurari dzar tsi ntəfu, baukurari dzar tsi ntəfu, ka nalkurari tsuwa dzar tsi makər, ka vəi ata ɗəffa bəbal aɓəla. Antə tsa lətə vəi thləthlatə ngəni, ka zuzuri akəma shanga mjir Israila na tsaptədzi ni, tə shanga mji ata mzhi wutə ni, ka haptə tsiyari amtazi.

¹⁴Antə tsa hara adduwa ka pəla, “MTHLAKU na Hyelər Israila, Hyel aɗi damwa na apa gə wa, wala amtazi wala azi akwa duniya! Gə na ana kəsi alkawalər nga, ka ncantə hirkur na ana palidzi wa aka shanga mji na ana nu nga ka ɗəffa ɗa shang.

¹⁵Ga ku nghyaɓəla alkawal tə ga ku hara aka mafar nga Dauda, na baba'na. Ga ku pəla ka mnya ga ka nghyaɓəla ka tsiya ga ashina.

¹⁶Antə kulini, MTHLAKU na Hyelər Israila, nghyaɓəla alkawal natə gə hara aka baba'na Dauda, tə gə pəla alari, ‘Ma maɗashilər nga ku nu shanga su ka hangkal akwa shanga su tə da ata harari, ka nu tsawayeri arna apatə ga ku hara, to, saka aɗi tə ga ata ni ka mda akwa kutakəyir nga na ata ndzi ata dəkəl kuthlikur ar Israila wa.’ ”

¹⁷Antə kulini, MTHLAKU na Hyelər Israila, zhar ka alkawal tə gə pəla aka mafar nga baba'na Dauda ni ndzi jiri bu.

¹⁸Amma Hyel, ga ata mzhi ndzəndzi ka mda akwa duniya jiri ya? Wala vəi na amta ta shang ma aɗi mzhi kəsi ngə wa, zhar ka mbwa ngəni ntingnga tə I həntə ni ya!

¹⁹Amma wala apani, MTHLAKU na Hyelərna, ka gə psi thləma ga aka adduwa tə I na mafar nga akwa hara ala ga, ka gə nggatə tuwarna.

²⁰Ka gə wul kəra mbwa ngəni pci ka viri, vəi ngəni tə gə pəla ka mdə vəngkər səli ala ga ata ni. Ka gə nggatə adduwarna akwa kəlara sakatə I ku thlentə kəmi təbwar vəi ngəni akwa hara adduwa.

²¹Ka gə nggatə adduwarna, I na mafar nga, ka na ar mjir nga Israila, akwa kəlara sakatə da ku thlentə kəma ɗa təbwar vəi ngəni akwa hara adduwa. I, nggatə adduwar yeru akwa kəyir nga na amtazi ni. Tsuwa kəlara sakatə ga ku nggatə adduwar yeru, ka gə yafitə yeru.

²²Ma mdə laga akwa wula apa mdə laga ku hara alari ɗimikur. Antə har mdə ku səntə mdə tə tsa akwa dzama abbər tsa an hara ɗimikur ni akəma bagaɗi saɗaka akwa mbwa ngəni kamnyar ka tsa kamtahyel. Antə ma tsa ku kamtahyel abbər tsa aɗi hara ɗimikur wa,

²³ka gə nggata amtazi, ka gə hara su ata kər. Ka ga an hara ala ɗa shariya. Ka gə pungkər biku aka mdə na ka biku ni ka gə ɗi ni. Tsuwa ka pəlaɓəla mdə na ka jiri ni, ka gə msərantə ni.

²⁴Ma dawayeri ar mjir nga Israila ku səm mjir nga akwa mpa kamnyar tə mjir nga ku hara biku ala ga. Antə ma mjir ngə ni ku ngka adzə nga, ka hara adduwar tubi akwa thləma ga, ka kiɗə su akəla ga akwa mbwa ngəni,

²⁵ka gə nggata amtazi. Ka gə tifəmta bikər mjir ngə ni, ka gə jaktə ngka ka da akwa tsəɗi tə gə hamta ala ɗa kəga kəkayeri arɗa.

²⁶Ma mdə ku hartə vəi na amtazi tə yimi aɗi wutədzi wa, kamnyar tə mjir nga ku hara biku ala ga. Antə ma da ku hara adduwa ka kəma ɗa awul mbwa ngəni, ka kələngkər abbər da ku hara biku, ka tubi akwa thləma ga, ka zhar hara biku, kamnyar tə ga ku ɗi ɗa,

²⁷ka gə nggata amtazi. Ka gə tifəmta bikər mafayeri ar nga na mjir nga Israila. Ka gə thlipa ala ɗa laku na kalkal ar ndzəndzi, ka gə thlenta ala ɗa yimi akwa tsəɗi tə gə hamta ni kifa aka mjir ngə ni.

²⁸Ma mi wala shilku ku təri akwa tsəɗi ni, wala ma dəmən, wala mpururu, wala ntsəkwa wala hawayeri ku hartə fakayeri arɗa, wala ma dawayeri ku kalaktə mjir nga akwa bərniyayeri arɗa, wala kəlara asar madi, wala shilku madi an ku si ata kəra ɗa,

²⁹antə ma kəlara mda akwa nca mjir nga Israila, wala ma shanga ɗa ku hara adduwa ka kiɗa, tə waskəi ku səndə bwaniyirni ka damitədzərni, har tə da ku haptə tsiya ɗa amta ka kəma ɗa awul mbwar vəngkər səli ngəni,

³⁰to, ka gə nggata amtazi akwa vəi ndzəndziyir nga, ka gə yafitə ɗa. Ka gə hara ka waskəi kalkal apatə tsa ku hara, kamnyar tə ga asəndə ɗəffa waskəi.

³¹Atar apani antə mjir nga ata thlivər nga, ka nu shanga su tə gə pəla akwa shanga ndzəndziyir mpika ɗa akwa tsəɗi tə ga ku hamta aka kəkayeri ar yeru.

³²Tsuwa ma mətəpi na aɗi akwa nca mjir nga Israila wa, ku thlata akwa tsəɗi na ciju ka si kamnyar olkur thləma ga, ka dunar nga, ka surndatayeri na ol'ola tə gə hara. Ma tsa ku si ka hara adduwa ka kəmari awul mbwa ngəni,

³³ka gə nggata amtazi, akwa vəi ndzəndziyir nga, ka gə hamta alari shanga su tə tsa ku yuwa akəla ga. Atar apani antə shanga mjir duniya ata səndə nga, ka thlivər nga tsu apatə mjir nga Israila ana hara, tsuwa ka da sənda abbər mbwa ngəni tə I həntə ni an kamnyar nga.

³⁴Ma sakatə mjir nga ku ləɓəla kamnyar mpa dawar ɗa, kəlara vəi tə ga ku mwanta akwa, ma da ku hara adduwa ka kəma ɗa awul bərni ngəni tə gə carɓəla ni, ka mbwa tə I həntə kamnyar ngə ni,

³⁵ka gə nggatə adduwar ɗa ka kiɗər ɗa akwa vəi na amtazi, ka gə dlar ɗa.

³⁶“Ma mjir nga ku hara biku ala ga, kamnyar mda aɗi na kula ana hara biku wa, tə ɗəffa ga ku ɓzi, har tə ga ku hamta ɗa aka dawayeri arɗa na ku fatə ɗa apa mafa ka mwantə ɗa akwa tsəɗi na ciju wala kudzəha,

³⁷ma da ku ngka akwa hangkala ɗa akwa tsəɗi tə mdə mwantə ɗa apa mafa ni, ka tubi, ka kiɗa akəla ga abbər, ‘Yeru ku hara biku, yeru ku sha, ka hara su na ɗimi.’

³⁸Tsuwa ma da ku tubi akwa ɗəffa ɗa ka jirkur akwa tsəɗi mafakur tə mdə mwantə ɗa akwa ni, ka hara adduwa ka kəma ɗa awul tsəɗi tə gə hamta aka kəkayeri arɗa ni, ka kəma ɗa awul bərni tə gə carɓəla ni, ka awul mbwa tə I həntə kamnyar ngə ni,

³⁹ka gə nggatə adduwar ɗa ka kiɗər ɗa akwa vəi ndzəndziyir nga na amtazi ni, ka gə dlar ɗa. Ka ra yafitə mjir nga na ku hara ala gə biku ni.”

⁴⁰“Antə kulini, Hyelərna, ka gə wul yeru ka ncar ɓɗakkur, ka gə psi thləm aka adduwayeri tə mda ata harari akwa vəi ngəni.”

⁴¹“Kulini MTHLAKU na Hyel, thlatə ka gə si akwa vəi ghərəmtaghəra ar nga, ga ka Akwatiyir ncantə dunar nga. MTHLAKU na Hyel, zhar ka pristayeri ar nga, ndzi ka dunar mbantə mji. Hara ka mji na hir nga hara kucali, kamnyar ɓɗakkur tə gə hara ala ɗa.

⁴²MTHLAKU na Hyel, ga aɗiya nggəlar kuthli tə ga an vəi wa. Ka gə ɗangtə hirkur ar nga na ana palidzə wa, tə gə hara alkawalari aka mafar nga Dauda.”