Read bura-pabir 2 Lab 7 Bible Online

2 Lab 7 - bura-pabir bible

2 Lab 7

¹Sakatə Solaman ku kuri adduwarni, antə u'u ku səghəi akwar amtazi ka mbamta saɗaka mbamba ka mambila saɗakayeri. Antə parakər səliyir MTHLAKU ku nghyantə mbwar vəngkər səli ni.

²Antə pristayeri aɗi mzhi ləkwa mbwar MTHLAKU wa, kamnyar tə səliyir MTHLAKU ku nghyantə mbwa ni.

³Sakatə shanga mjir Israila ku wutə u'u na səghəi ni, ka səliyir MTHLAKU ata kəra mbwar vəngkər səli ni, antə da zuzuri ka dləri kəma ɗa ata di, akwa vəngkər səli ka hu MTHLAKU, akwa pəla, “Kamnyar tsa ana hara ɓɗakkur kamnyar hirkurərni na ana palidzə wa an har ba saka madi.”

⁴Antə kuthli ka shanga mji ku hamta saɗaka akəma MTHLAKU.

⁵Kuthli Solaman ku hamta saɗaka ar gyal dəpu sərkumari ka suɗa, ka təma dəpu aru ka sərkumari. Apani antə kuthli ka shanga mji ku hamta mbwar vəngkər səli ni aka Hyel.

⁶Antə pristayeri ku thləthlata akwa vəi thləthlatər ɗa. Antə mjir Lawi tsuwa ku thləthlata akwa vəi thləthlatər ɗa ka sur tsa akwa tsiya ɗa kamnyar hu MTHLAKU, jili sur tsa natə Kuthli Dauda namtə kamnyar hu MTHLAKU kəgari ni. Antə da hu ni abbər, “Kamnyar hirkurərni na ana palidzə wa an har ba saka madi!” Antə da ana hara har hu Hyel ka sur tsa nayeri ni akwa laku tə Dauda ku tsawa ala ɗa. Tsuwa athlimbəla ɗa akwa bwa na awul mjir Lawi ni, kəlara sakatə pristayeri ni ku thləthlatə ka mbur təmbəl, shanga mjir Israila ata thləthlata.

⁷Antə Solaman ku hamta ɗəffa bəbal na akəma mbwar MTHLAKU ni aka Hyel. Antə tsa hamta saɗaka mbamba, ka mal ar saɗakar jakə mwardzi. Tsa hara apani kamnyar tə bagaɗi əmza natə Solaman namtə ni amzhi kəsi saɗaka mbamba, ka saɗakar mthli, ka saɗakar malkum ata kəma duku wa.

⁸Antə ata saka ndaga Solaman ka shanga mjir Israila ku hara vir murfa akwa Kucalər Kir Səva ni. Tsuwa mji ku tsaptədzi dlama dlama, kamnyar mji ku thlatə ciju ka si, baɗita akwa Lebo Hamath na abwar yala har ka pudza aka Zərkəu na akwa kəla Masar tə bwar anəm.

⁹Antə akwa vir na nciskur ni da hara tsaptədzi laga ola, kamnyar da ku kuri hara vir murfa akwa hamta bagaɗi saɗaka aka Hyel, ka vir murfa damwa akwa hara Kucalər Kir Səva.

¹⁰Akwa vir na sərkumari ka makərkur ar thliya na murfəkur antə tsa salamtə mji tə da ngka akwa kəyayeri arɗa. Antə da ku ngka avi ka kucali ka ɗəffu mwapu kamnyar ɓɗakkur natə MTHLAKU ku ncanta aka Dauda, ka aka Solaman, ka aka mjirni Israila.

¹¹Apani antə Solaman ku kuri hən mbwar MTHLAKU ka kəi kuthlikur ni. Tsuwa shanga su tə Solaman ɗəmha abbər tsa ata harari akwa mbwar MTHLAKU ka akwa kəi kuthlikur na arni ni, tsa ku kuri kalkal.

¹²Antə MTHLAKU ku ncantə kərni aka Solaman aviri ka pəla alari, “I ku nggatə adduwar nga, tsuwa I ku carɓəla vəi ngəni kamnyar kəri, ka tsa ndzi vəi hamta ali saɗaka.

¹³Akwa kəlara sakatə I ku hartə vəi na amtazi, tə yimi aɗi ata tər wa, wala ma I ku tsawa aka ntsəkwa ka da ɓɗəmnya sur tsəɗi ni, wala ma I ku thlentə shilku na mwavər ata kəra mjirna,

¹⁴ma mjirna natə mda ana kəga ɗa ka thləmi ku tərghəi kəra ɗa, ka hara adduwa, ka bara kəmi, ka zhar surharar ɗa na ɗimi, I ata nggatari amtazi. Antə I ata tifəmta ala ɗa bikər ɗa, kəi mbantə tsəɗiyir ɗa.

¹⁵Kulini I ata pungkər nci ata kəra vəi ngəni, kəi psi thləmi aka shanga adduwayeri tə mda ata harari akwa vəi ngəni.

¹⁶Kamnyar tə kulini I ku carɓəla mbwa ngəni, ka vəi ni aka kəri ka tsa ndzi vəi vəngkər səli ali har ba saka madi. Antə nci ka hangkali ata ndzi anda tədəku.

¹⁷Antə ar nga, ma ga ku kələngkər ali apatə baba' nga ku hara, ka hara shanga suayeri tə I tsawa ala ga, ka ɓəlatə tsawayeri arna kəga suayeri tə I thlamta abbər ka mdə hara,

¹⁸to, I ata nci nyarmbwar nga ka tsa an ndzi nyarmbwar kuthlikur tədəku, apatə I ku hara alkawalari aka baba' nga Dauda. Kamnyar I ku pəla alari abbər, ‘Mda aɗi ata ni ka mda akwa nyarmbwar nga na ata hara kuthlikur ata kəra Israila wa.’

¹⁹Amma ma giri ku shinadzə bwahili ali, ka fwari ata kəra tsawayeri arna kəga suayeri tə I thlamta abbər ka mdə hara, natə I hamta ala giri ni, ka ləkwa hara mafakur aka haptayeri ka vəngkər səli ala ɗa,

²⁰I ata fwaɓəla giri, giri na mjirna Israila akwa tsəɗi tə I hamta ala giri ni. Antə mbwa ngəni tə I namtə ni kamnyar haptə thləmi ni, I ata kələmtari kazhar kəmi, kəi namtə ni ka tsa ndzi sur ngkəra ka sur kumshi akwa nca mji.

²¹Antə wala tə mbwa ngəni ku ndzi sur wula, aghəlazi kəlara mdə na ata təramta adza ata sə ndatədzi, ka pəla, ‘Kamnyar mi tə MTHLAKU hara su apani aka tsəɗi ngəni ka mbwa ngəni ri?’

²²Antə mji ata pəla ala ɗa abbər, ‘Ai, kamnyar tə da fwari ata kəra MTHLAKU, na Hyelər kəkayeri arɗa, Hyel na fwaɓəla ɗa akwa tsəɗi Masar, antə da fəfahə haptayeri akwa vəngkər səli ala ɗa, ka hara mafakur ala ɗa. An su na hara tə tsa səntə shanga asar ngəni ata kəra ɗa ni.’ ”