Read bura-pabir 2 Lab 8 Bible Online

2 Lab 8 - bura-pabir bible

2 Lab 8

¹Akwa kurər məva na sərkumari tə Solaman hara akwa hən mbwar MTHLAKU ka kəi kuthlikur,

²antə tsa jaktə hənɓəla bərniyayeri tə Huram na alari ni, ka pwi mjir Israila akwa bərniyayeri ni.

³Antə Solaman mwari ahar Hamath Zoba, ka səm ni akwa mpa.

⁴Tsuwa tsa ku jaktə hənɓəla Tadmor na akwa mtaku, ka shanga bərniyayeri ar pwi su na akwa Hamath.

⁵Tsuwa tsa ku hənɓəla Beth Horon na Amta ka Beth Horon na aghəi tə da ndzi bərniyayeri na akwa katangga, ka namtə nyarfayeri tə mda ana dzəkata ka udzəm liya.

⁶Tsuwa Solaman ku jaktə hənɓəla Baalath, ka shanga bərniyayeri ar pwi su tə tsa kəgari, kəga bərniyayeri ar pwi wagənayeri ar taku, kəga na ar takwayeri. Solaman ku həntə shanga su tə tsa bara ka tsa hənta akwa Urushalima, ka Lebanon, ka akwa shanga tsəɗi na akira kuthlikur arni.

⁷Tsuwa durayeri aɗi na ku mbili akwa tsəɗi ni na aɗi mjir Israila wa. Durayeri ngəni an mjir Hitti, ka mjir Amor, ka mjir Perizzi, ka mjir Hivi, ka mjir Yebusi.

⁸Mji nayeri ni an mjir nyarmbwar durayeri natə mjir Israila aɗi kurəmta akwa mpa wa. Da an mji tə Solaman fata, ka pu ɗa akwa kəthlər dwalikur, apatə da aɗi har ba ashina.

⁹Amma Solaman aɗi vu mdər Israila wala duku akwa kəthlər mafakur ni wa. Arɗa da ndzi sojayeri arni, kəga mji na ol'ola ata kəra sojayeri, kəga mji na ol'olər sojar wagənayeri ar taku, kəga mjir fəl taku.

¹⁰Tsuwa tsa ku putə mji aru suɗa ka ntəfkumari akwa nca ɗa ka da ndzi mji ol'ola na ata wul mjir kəthlər ni.

¹¹Antə Solaman səntə ngkwar kuthli na akwa Bərniyir Dauda ni, ka vu ni akwa kəi tə tsa hənta alari. Kamnyar tsa pəla, “Mwalankiya aɗi ata ndzəndzi akwa kəyir Dauda na kuthlir Israila wa, kamnyar kəlara vəi tə Akwati Alkawal ar MTHLAKU ata, vəi nda ata ndzi ɓɗakkarkara.”

¹²Antə Solaman ku hamta saɗaka mbamba aka MTHLAKU ata kəra bagaɗi ar MTHLAKU natə tsa hənta akəma galahər mbwar vəngkər səli ni.

¹³Antə tsa ku hamta saɗakayeri na ar tədək viri ni kalkal apatə Musa ku tsawa. Tsuwa tsa ku hamta saɗakayeri na ar Vir Ghərəmtaghəra ar Sati, ka na ar Kucalər Thliya Bilən, ka na ar sakar kucalayeri makər tə mda ana hara tədək məva, watau vir Kucalər Buradi na kula Yist, ka Kucalər Fəi Sur Faku, ka Kucalər Kir Səva.

¹⁴Akwa sakatə Solaman akwa hamta kəthlər aka pristayeri ni, tsa nu laku tə baba'ni Dauda ku tsawa alari. Tsuwa tsa ku na aka mjir Lawi kəthlər ar hara har huwa, ka tsuwa ka da dlar pristayeri ni akwa kəthlərayeri arɗa tədəku. Tsuwa tsa ku pwi mjir sək zara zara kamnyar nyarfayeri na aɗi. Kamnyar apani antə Dauda na mdər Hyel ku tsawa.

¹⁵Antə pristayeri ka mjir Lawi ni aɗi pəramta kazhar su tə kuthli tsawa ala ɗa ata kəra mbwayeri ar pwi su ni wa, wala ata kəra wujirayeri damwa wa.

¹⁶Apani antə shanga kəthlər ar Solaman ku sə kuri, watau təng vir tə mdə baɗitə nci səla mbwar MTHLAKU ni har tə vədza aka kurari. Apani antə mbwar MTHLAKU ku kuri.

¹⁷Aghəla nda antə Solaman ku mwari ahar Eziyon Geber ka Eloth na ata mnya manda, akwa tsəɗi Edom.

¹⁸Antə Hiram ku thlenta aka Solaman sharayeri ar yimi kəga mjir nggurari na asəndə yimi ka duna. Antə mji ngəni ka mjir Solaman ku paktədzi, ka təra mwari ahar Ofir, ka fatsa dinar talent aru nfwar ka ntəfkumari, ka sənta aka Kuthli Solaman.