Read bura-pabir 2 Lab 9 Bible Online

2 Lab 9 - bura-pabir bible

2 Lab 9

¹Akwa tsəɗi Sheba, Kuthli Mwala laga aɗi na ku kəɗar nggatə laku tə Solaman hara thləm akwa, antə tsa mwari ahar Urushalima kamnyar ka tsa ngkərtə ni ka sur yuwa na mwavər mwavər. Antə tsa fatə kwakunayeri arni laga rakər su, ka dləkəmauwayeri ka kələr yaji, ka dinar hang ka duna, ka pelayeri ar dəɓa. Sakatə da kəɓa ka Solaman antə tsa pəlaɓəla shanga su na akwa ɗəffari alari.

²Antə Solaman ngkərɓəla alari shanga su. Su aɗi ama kula Solaman mzhi ngkərɓəlari alari wa.

³Antə sakatə kuthli mwala ar Sheba ni ku wutə laku tə Solaman ni ɗəɗu akwa, ka kəi tə tsa ku həntə ni,

⁴ka jili susəma na ata tebər arni, ka laku tə kwakunayeri arni ndzəndzi akwa, ka laku tə buɗayeri arni akwa hara kəthlər akwa, ka ləptayeri arɗa, ka mjir hamta sur sa, ka ləptayeri arɗa, ka saɗaka mbamba tə tsa hamta akwa mbwar MTHLAKU, antə tsa kəsi mnyari kamnyar ndatədzi.

⁵Antə tsa pəla aka kuthli, “Su tə mji pəla ali akwa tsəɗiyirna ata kəra suayeri tə ga akwa harari, ka ɗəɗukur ar ngə ni an jiri!

⁶Amma I aɗi mbərsa ka su tə da pəla wa, tar tə I si ka wutə ka nci surna. Azha ma shang su tə da ngkər ali ni aɗi ləkwa retar su tə I wutə wa. Jiri ɗəɗukur nga ka gənar nga ku təramta su tə I nggatə ni.

⁷Jiri, ar mjir nga msəra ala ɗa! Msəra aka mji na akwa hara kəthlər ala ga, mji na ana thləthlata akəma ga tədəku ka nggatə ndər ar ɗəɗukur tə ga ana ngkəra!

⁸I akwa hu MTHLAKU na Hyelər nga, na ku nggatə msərakurər nga, ka vətə nga ata dəkəl kuthlikur ar Israila, kamnyar ka gə hara kuthlikur akwa thləma MTHLAKU na Hyelər nga! Kamnyar Hyelər ngə ni ku hir mjirni Israila, tsuwa tsa akwa bara ka tsa nci ɗa har ba saka madi. An su na hara tə tsa vəi nga kuthlir ɗa kamnyar ka gə hara su na kalkal ka jirkur.”

⁹Antə kuthli mwala ni hamta cautər dinar talent aru pal ka sərkumari, ka pelayeri ar dəɓa, kəga yaji hang ka duna. Mda aɗi ɗar wutə jili yaji na msəra apa natə kuthli mwala ar Sheba ni hamta aka Kuthli Solaman ni wa.

¹⁰Tsuwa mjir kəthlər ar Hiram na akwa nggur sharər yimi ni, ka mjir kəthlər ar Solaman ni, ku səntə dinar na ɓɗaku na ahar Ofir. Tsuwa da ku səntə udzəm algum ka pelayeri ar dəɓa.

¹¹Antə kuthli ku kəthlər ka udzəm algum ni ka namtə sur ndlətə ka ləkwa mbwar MTHLAKU, ka tsuwa ar ləvəi akwa kəi kuthlikur. Tsuwa tsa ku namtə yakandiyayeri ka guləmayeri aka mjir hara ha tsu ka udzəm algum ni. Mda aɗi jaktə wutə jili udzəm algum ndaga akwa tsəɗi Yahuda har ba ashina wa.

¹²Antə Kuthli Solaman hamta aka kuthli mwala ar Sheba ni shanga su tə tsa ku bara ka yuwa akəlari. Solaman hamta alari su hangta su tə mwala ni sənta alari. Antə mwala ni ku ngka akwa tsəɗiyirni ata kəma duku kəga kwakunayeri arni na pwar ni.

¹³Abaka kəlara məva Kuthli Solaman ana dlu dinar natə kəgəɓkurari ku mwantə talent aru ngkwa ka ngkwakumari ka ngkwa,

¹⁴ata kəra tsəma natə mjir fəli ana nta. Tsuwa shanga kuthlyayeri ar Arabiya ka gwamnayeri na akwa tsəɗi ni ana səntə dinar kəga adzərfa aka Solaman.

¹⁵Kuthli Solaman ku namtə partauwayeri ol'ola aru suɗa, ka fəi dza kəlara partau ka dinar natə kəgəɓkurari ku hara apa kilogram murfa.

¹⁶Tsuwa tsa ku namtə partauwayeri damwa raka raka aru makər, ka fəi dza kəlara pal ka dinar natə kəgəɓkurari ku hara apa kilogram suɗa. Antə kuthli ni ku pwi ɗa akwa Mbwar Kuɓər Nfur Lebanon.

¹⁷Aghəla nda antə kuthli ni ku namtə dəkəl kuthlikur na ola ka thlira ciwar, ka fəi dzari ka dinar shini.

¹⁸Tsuwa dəkəl ni ka sur ndlətə na ka vəi vətə səl ngkwa, ka kulahər putə səl ar dinar tə mdə paktə ka dəkəl ni. Tsuwa dəkəl ni ka vəi vətə tsi athlimbəli abwani ka abwanda, ka tsəngi suɗa athləthlata athlimbəla vəi putə tsi ni.

¹⁹Tsuwa Solaman ku namtə dludzər tsəngi kumnya suɗa athləthlata athlimbəla vəi ndlətə su ni, kəlara vəi vətə səl pal ka tsəngi abwani ka abwandari. Mda aɗi ɗar wutə jili dəkəl kuthlikur ngəni akwa kuthlikur damwa wa.

²⁰Shanga kapayeri ar Kuthli Solaman mdə nam ka dinar. Tsuwa shanga kari kəthlər na akwa Mbwar Kuɓər Nfwa ar Lebanon ni mdə hara ka dinar shini. Mda aɗi hara ɗa ka adzərfa wa, kamnyar adzərfa aɗi su laga akwa sakar Solaman wa.

²¹Kamnyar Kuthli Solaman ka sharayeri ar yimi na ana nu kəra yimi akwa fəli ata kəma duku kəga sharayeri ar Kuthli Hiram. Antə aghəla kəlara məva makər sharayeri ni ana ngka alari ka dinar, ka adzərfa, ka thlira ciwar, ka candəmayeri na ol'ola kəga ɗikar kuthli.

²²Apani antə Kuthli Solaman ku təramta shanga kuthlyayeri ar duniya ka gəna ka ɗəɗukur.

²³Antə shanga kuthlyayeri ar duniya ku bara si adzə Solaman ka da nggatə ɗəɗukurərni natə Hyel na alari ni.

²⁴Tsuwa tədək məva, kəlara mda akwa nca ɗa, ana səntə cautərni ar su tə mdə nam ka adzərfa, ka dinar, ka ləptayeri na ol'ola, ka turari, ka yaji, ka takwayeri, ka kwara ləmbandərayeri hang.

²⁵Tsuwa Solaman ka mbwar mbwi takwayeri dəpu nfwar kamnyar takwayeri ka wagənayeri arni. Tsuwa tsa ka mjir fəl takwayeri dəpu kumnya suɗa, natə tsa pwi ɗa akwa bərniyayeri ar pwi wagənər taku ni, ka bwaduku natə tsa pwi adzə ni akwa Urushalima.

²⁶Antə Solaman ku hara kuthlikur ata kəra shanga kuthlyayeri, baɗita akwa Thlyagha Yufiretis ka mwanta akwa tsəɗiyir mjir Filistiya, har ka pudza aka kəla tsəɗi Masar.

²⁷Antə kuthli ku namta adzərfa hang apa su gapani akwa Urushalima apa pela, ka namtə nfur seda hang apa nfur kwataɓəla na ana ptsa akwa dzər garayeri ar Yahuda.

²⁸Tsuwa takwayeri ar Solaman ni mdə mastə ɗa ahar Masar ka mambila tsəɗiyayeri damwa.

²⁹Mambila kəthlərayeri tə Solaman hara akwa baɗitari har ka mwanta akwa tsikərari mdə ku rəbutə ɗa akwa Labar ar Naɓi Nathlan ka Naɓikur Ahija na Mdər Shilo ka akwa Su na Kəlardzi aka Iddo na Mdər Wulsu, natə tsa hara ata kəra kuthlikur ar Yerobowam na ɓzər Nebat.

³⁰Antə Solaman ku hara kuthlikur akwa Urushalima ata kəra shanga Israila ar məva nfwarkumari.

³¹Antə tsa ku mti, antə mdə ku harəmta ni akwa Bərniyir Dauda, watau Urushalima. Antə ɓzərni Rehobowam ku dlu tsiyari akwa kuthlikur.