Read bura-pabir Ezra 10 Bible Online

Ezra 10 - bura-pabir bible

Ezra 10

¹Sakatə Ezra zuzuri akwa hara adduwa anyarmbwar vəngkər səli aka Hyel, akwa tuwa ka jikaɓəla bikayeri, antə mjir Israila, shili kəga mwanki, kəga maɗangkyar, ku tsaptədzi adzə ni dlama dlama, akwa tuwa ka duna.

²Antə Shekaniya na ɓzər Yehiyel, na akwa nyarmbwar Elam, pəla aka Ezra abbər, “Yeru ku ɓəli alkawal tə yeru kəta aka Hyel ka kəl mwanki akwa durayeri damwa na akwa tsəɗi ni. Amma wala apani tsu mjir Israila ka vu su akwa ɗəffu.

³Antə ndzi ka yeru kətə alkawal aka Hyelər mburu abbər yeru ata kədləmta shanga mwanki nayeri ni kəga maɗa' ɗa kalkal apatə ga ka mambila mji na ol'ola na ana ɓəla tsawur Hyel ku hamta ala yeru sauriyari. Yeru ata nu su tə tsawur Hyel ku pəla.

⁴Antə thlata, kamnyar kəthlər ngəni akwa tsiya ga. Ar yeru, yeru ata vəi duku ka ga, antə ntsətədzi ka gə wuta abbər ga ku harata suari.”

⁵Antə Ezra ku thlatə ka vu pristayeri na ol'ola, ka mjir Lawi, ka shanga mjir Israila, kahyel abbər da ata hara su tə Shekaniya ku pəla ni. Antə da ku kahyel ni.

⁶Antə Ezra ku thlatə kazhar nyarmbwar vəngkər səli ni, ka təra mwari ahar Yehohanan na ɓzər Eliyashib, ka pi avəi anda, kula səm susəma kula sa yimi, kamnyar ɗəffari na ɓzi ata kəra ndzi kula jirkur tə mjir Israila na thlata akwa mafakur hara ni.

⁷Antə mdə ku psəmnya bamama akwa Urushalima ka shanga Yahuda, aka shanga mji na thlata akwa mafakur ni, abbər ka da tsaptədzi ahar Urushalima.

⁸Antə ma mdə na aɗi si akwa kuta vir makər apatə mji na ol'ola ku thlamta wa, tsa ata hara asar ar shanga kariyirni, tsuwa mda ata kədləɓəla ni kazhar nca mjir Yahudi na thlata akwa mafakur ni.

⁹Antə shanga mjir Yahuda ka Benjamin ku tsaptədzi ahar Urushalima akwa kuta vir makər. Da tsaptədzi ni akwa vir na sərkumarkur ar thliya na əmdləkur. Antə shanga ɗa ndzəndzi akwa bəbal na akəma mbwar vəngkər səli aka Hyel ni, akwa kədza kamnyar mwavərkur wujir ni, ka tsuwa kamnyar tə yimi akwa təra.

¹⁰Antə Ezra na prist ku thlatə ka pəla ala ɗa, “Giri ku hara biku atar kəl mwanki akwa dur damwa, antə bikər mjir Israila ku jakjaka.

¹¹Antə kulini tar ka giri jikaɓəla bikər giri aka MTHLAKU na Hyelər kəkayeri ar giri, ka giri hara su na ata kəskərari. Ka giri ndəkəmtadzi ka mjir tsəɗi ni, ka tsuwa mwanki natə giri kəla akwa durayeri damwa.”

¹²Antə shanga mji na tsaptədzi ni shinau alari ka kuraku abbər, “Apani antə mda ata harari! Kamnyar dwali ka yeru hara su tə gə pəla ni.

¹³Amma mji ku hara hang ka duna, tsuwa ngəni an sakatə yimi ana mbuta, antə yeru amzhi thləthlata aɓəla wa. Tsuwa kəthlər ni aɗi ar vir duku wala suɗə daci wa, kamnyar hang akwa nca yeru ku hara biku akwa su ngəni.

¹⁴Ndzi ka mji na ol'olər yeru ni ndzi azi akwa Urushalima ka da wula ala yeru su ni. Antə ka shanga mjir yeru na akwa bərniyayeri, mji na ku kəl mwala akwa dur damwa ni, si akwa sakatə mdə ku thlamta ala ɗa, ata kəma duku kəga mji ol'ola ka alkaliyayeri ar kəlara di. Yeru ata hara apani kamnyar ka ɗəffə bwarbwarkur ar Hyelər yeru ni mtathla ata kəra su ngəni.”

¹⁵Mda aɗi na nggəlar ndər ngəni wa, tar Jonathlan na ɓzər Asahel ka Yazeyiya na ɓzər Tikvah, ka tsuwa Meshullam ka Shabbethlai na mdər Lawi na dlartə ɗa.

¹⁶Antə mji na thlata akwa mafakur ni ku hara apatə mdə pəla. Antə Ezra na prist ku carɓəla mji ol'olər kutakəyir kəkayeri arɗa nyarmbwa nyarmbwa, waskəi ka thləmari. Antə da tsaptədzi ka baɗitə wul wujir mjir Yahudi na kəl mwankir dur damwa ni akwa vir na ntangkəma ar thliya na kumkur.

¹⁷Antə da sə kuri wulɓəla mji shili na ku kəl mwanki akwa dur damwa ni akwa vir na ntangkəma ar thliya na ntangkəma ar məva damwa.

¹⁸Mdə nggaɓəla abbər nayeri ni an pristayeri na ku kəl mwala akwa dur damwa. Akwa nyarmbwar Yeshuwa na ɓzər Yozadak ka maɗama'ni, an Maaseya, ka Eliyezer, ka Yarib, ka Gedaliya.

¹⁹Antə da ku kətə alkawal abbər da ata psi mwankir ɗa, tsuwa shanga ɗa ku hamta gam kamnyar saɗakar ntə bikər ɗa.

²⁰Akwa nyarmbwar Immer, an Hanani ka Zebadiya.

²¹Akwa nyarmbwar Harim: an Maaseya, ka Iliya, ka Shemaiya, ka Yehiyel, ka Uzziya.

²²Akwa nyarmbwar Pashhur, an Eliyoyenai, ka Maaseya, ka Ishmayel, ka Nethlanel, ka Yozabad, ka Eleyasa.

²³Akwa nca mjir Lawi, an Yozabad, ka Shimeyi, ka Kelaiya na an Kelita, ka Pethlahiya, ka Yahuda, ka Eliyezer.

²⁴Akwa nca mjir ha, an Eliyashib. Akwa nca mjir sək nyarfu, an Shallum, ka Telem, ka Uri.

²⁵Nayeri ni an thləma mambila mjir Israila na ku hara su ngəni ni. Akwa nyarmbwar Parosh, an Ramiya, ka Izziya, ka Mijamin, ka Eleyazar, ka Malkiya, ka Benaiya.

²⁶Akwa nyarmbwar Elam, an Mattaniya, ka Zakariya, ka Yehiyel, ka Abdi, ka Yeremoth, ka Iliya.

²⁷Akwa nyarmbwar Zattu, an Eliyoyenai, ka Eliyashib, ka Mattaniya, ka Yeremoth, ka Zabad, ka Aziza.

²⁸Akwa nyarmbwar Bebai, an Yehohanan, ka Hananiya, ka Zabbai, ka Athlai.

²⁹Akwa nyarmbwar Bani, an Meshullam, ka Malluk, ka Adaiya, ka Yashub, ka Sheyal, ka Yeremoth.

³⁰Akwa nyarmbwar Pahath Mowab, an Adna, ka Kelal, ka Benaiya, ka Maaseya, ka Mattaniya, ka Bezalel, ka Binnuwi, ka Manasse.

³¹Akwa nyarmbwar Harim, an Eliyezer, ka Isshiya, ka Malkiya, ka Shimeyiya, ka Shimeyon,

³²ka Benjamin, ka Malluk, ka Shemariya.

³³Akwa nyarmbwar Hashum, an Mettenai, ka Mattatta, ka Zabad, ka Elifelet, ka Yeremai, ka Manasse, ka Shimeyi.

³⁴Akwa nyarmbwar Bani, an Maadai, ka Amram, ka Uyel,

³⁵ka Benaiya, ka Bedeya, ka Kelluhi,

³⁶ka Vaniya, ka Meremoth, ka Eliyashib

³⁷ka Mattaniya, ka Mettenai, ka Yaasu.

³⁸Akwa nyarmbwar Binnuwi, an Shimeyi,

³⁹ka Shelemiya, ka Nathlan, ka Adaiya,

⁴⁰ka Maknadebai, ka Shashai, ka Sharai,

⁴¹ka Azarel, ka Shelemiya, ka Shemariya,

⁴²ka Shallum, ka Amaliya, ka Yusuf.

⁴³Akwa nyarmbwar Nebo, an Yeyiyel, ka Mattithliya, ka Zabad, ka Zebina, ka Yaddai, ka Yowel, ka Benaiya.

⁴⁴Shang mji nayeri ni ku kəl mwanki akwa dur damwa, antə da ku salamtə ɗa kəga maɗa' ɗa.