Read bura-pabir Ezra 3 Bible Online

Ezra 3 - bura-pabir bible

Ezra 3

¹Akwa sakatə thliya na murfəkur hara, mjir Israila ku kurtə ndzəndzi akwa diyayeri arɗa. Antə shanga ɗa tsaptədzi ahar Urushalima.

²Antə Yeshuwa na ɓzər Yozadak, ka pristayeri nvwani, ka Zerubbabel na ɓzər Sheyaltiyel, ka yangkurayerari ku baɗitə jaktə həntə bagaɗi aka Hyelər Israila, kamnyar sə hamta saɗaka mbamba ata, apatə mdə ku rəbuta akwa tsawur Musa na mdər Hyel.

³Wala tə mji na ngka ni akwa thlivər mji tə da si ka wuta akwa di ni, tsu da ku həntə bagaɗi ni akwa vəi vəyari, ka hamta saɗaka mbamba ata, aka MTHLAKU, tədək ɗəɗəpa ka tahaku.

⁴Antə da ku hara Kucali ar Səvayeri apatə mdə ku rəbuta, ka hamta hangkur saɗaka mbamba na tədək viri kalkal apatə mdə ku thlamta.

⁵Aghəla nda, da ku ləkəma ka hamta saɗaka mbamba na hwatu, ka saɗakayeri na ar Kucalər Thliya Bilən, ka shanga saɗakar mambila virayeri tə mdə thlamta ar kucali aka MTHLAKU, kəga sur hamta ar hirər ɗəffu natə waskəi hamta aka MTHLAKU.

⁶Təng vir na ntangkəma ar thliya na murfəkur antə da baɗitə hamta saɗaka mbamba aka MTHLAKU, təng tə da aɗi baɗitə vəi səla mbwar vəngkər səli aka MTHLAKU ni katagu wa.

⁷Antə mji ku hamta kwaba kamnyar ntəmta mjir həna kəga kapəntayeri, ka hamta susəma, kəga sur sa, kəga mal zaitun aka mjir Sidon kəga Taya, kamnyar səntə udzəmər seda na ahar Lebanon ni. Da ata putə udzəm ni ata kəra manda ka da sənta ala ɗa ahar Yoppa. Mdə hara shanga su nayeri ni apatə Sairus na kuthlir Parsiya ku pəla.

⁸Akwa thliya na suɗkur ar məva na suɗkur ka səyir ɗa akwa vəi mbwar vəngkər səli aka Hyel na ahar Urushalima, antə Zerubbabel na ɓzər Shiyaltiyel, ka Yeshuwa na ɓzər Yozadak, ka pristayeri kəga mjir Lawi baɗitə kəthlər, ata kəma duku ka shanga mji na thlata akwa mafakur ka ngka ahar Urushalima. Mdə pwi shanga mjir Lawi na ka məva ɗa sərkumari ka ləmta ata kəra kəthlər hən mbwar vəngkər səli aka MTHLAKU ni.

⁹Antə Yeshuwa ka maɗashilərni, kəga yangkurayerari, ka Kadmiyel ka maɗashilərni, watau mjir nyarmbwar Yahuda, ka maɗashilər Henadad, ku paktə kəra ɗa akwa wul mji na akwa kəthlər hən mbwar Hyel ni.

¹⁰Sakatə mjir həna ku kuri nci səla mbwar vəngkər səli aka MTHLAKU ni, antə pristayeri səɓəla akwa ləptər ɗa ka thləthlata, waskəi ka təmbəl akwa tsiyari. Antə mjir Lawi tsuwa na akwa nyarmbwar Asaf ku səɓəla ka thləthlatə waskəi ka liyar ɓu tsi akwa tsari. Shanga ɗa səɓəla kamnyar hu MTHLAKU, apatə Dauda na kuthlir Israila ku tsawa.

¹¹Antə mji laga akwa nca ɗa ku psə hayeri ar huwa ka gwaɗita aka MTHLAKU, tə bwadukwa ɗa akwa dlu ha ni akwa pəla, “Kamnyar Tsa ana hara ɓɗakkur, kamnyar hirkurərni na ana palidzi wa an ba saka madi aka Israila.” Antə shanga mji ku haptə kuraka ɗa ka duna akwa hu MTHLAKU, kamnyar tə mdə ku vəi səla mbwar vəngkər səli aka MTHLAKU ni.

¹²Amma hang akwa nca pristayeri, ka mjir Lawi, ka mji na ol'olər nyarmbwayeri na ku fəi ka wutə mbwar vəngkər səli na ntangkəma ni, ku tuwa ka kuraku sakatə da wutə səla mbwar vəngkər səli ngəni ni. Amma wala apani bwadukwa mji na anda ku haptə kuraka ɗa akwa hara kucali.

¹³Antə mji aɗi mzhi ndəkɓəla kurakər kucali ka kurakər tuwa ni wa, kamnyar tə mji ni ku haptə kuraka ɗa ka duna, har tə mji na ciju akwa nggatə ɗa.