Read bura-pabir Ezra 4 Bible Online

Ezra 4 - bura-pabir bible

Ezra 4

¹Sakatə dawayeri ar mjir Yahuda ka na ar Benjamin nggata abbər mjir Israila na thlata akwa mafakur ni, ku si akwa jaktə hən mbwar vəngkər səli aka MTHLAKU na Hyelər Israila,

²antə da mwari adzə Zerubbabel ka mji ol'ola ar nyarmbwayeri ni, ka pəla ala ɗa, “Ndzi ka mburu paktə kər kəga giri akwa hən mbwa ni, kamnyar wala yeru, yeru ana vəngkər səli aka Hyelər giri akwa laku tə giri ana hara ni. Kamnyar yeru ana hamta alari saɗaka təng akwa zamanər Esarhaddon na kuthlir Assiriya, mdə na səntə yeru azi.”

³Amma Zerubbabel, ka Yeshuwa, ka mambila mji na ol'olər nyarmbwayeri ar Israila ni pəla ala ɗa, “Su aɗi na paktə giri ka yeru akwa hən mbwar vəngkər səli aka Hyelər yeru wa. Yeru ata həntə mbwar vəngkər səli aka MTHLAKU na Hyelər yeru ni yeru shi yeru, apatə Sairus na kuthlir Parsiya ku tsawa ala yeru.”

⁴Antə mji na anda hwatu ni ku bara fəi shaha mjir Yahuda ka thlivərantə ɗa ta da hən mbwa ni.

⁵Da hamta sur dzəɓə mnya aka mjir hamta sauri ar gwamnatiyir Parsiya, kamnyar ka da hilantə kəthlər ar hən mbwa tə mjir Yahuda akwa bara harari ni, akwa shanga zamanər Sairus na kuthlir Parsiya, har ka mwanta akwa zamanər Kuthli Dariyus.

⁶Antə akwa baɗitər kuthlikur ar Ahasuwerus, dawayeri ni ku rəbutə kakaɗər burka ata kəra mjir Yahuda ka Urushalima.

⁷Tsuwa aghəla nda akwa zamanər Artashasta na kuthlir Parsiya, antə Bishlam, ka Mithredath, ka Tabeyel, kəga pazhayeri arɗa, ku paktə kər ka rəbutə wasika aka Artashasta na kuthlir Parsiya ni. Mdə ku rəbutə wasika ngəni akwa mnya Aramiya, antə mdə ku ngkərɓəla aka kuthli ni.

⁸Antə Rehum na olər sojayeri ka Shimshai sakatari na ola ar kuthli, ku rəbutə wasika aka Artashasta ata kəra Urushalima, abbər,

⁹“Wasika ngəni thlata akəla Rehum na olər sojayeri, ka Shimshai sakatari, kəga pazhayeri arɗa, kəga alkaliyayeri, ka gwamnayeri, ka mjir kəthlər na ol'ola, watau mjir Parsiya, ka mjir Erek, ka mjir Shushan na akwa tsəɗi Elam,

¹⁰ata kəma duku ka mambila mji tə Asnappar mdə na ola, fwaɓəla ka mwanta akwa bərni Samariya ka mambila diyayeri na aɓəla bwanda Thlyagha Yufiretis.”

¹¹Nggədza su tə da rəbuta akwa wasika ni, “Ka barkar nga Kuthli Artashasta. Yeru na buɗayeri ar nga, na ka ndzi akwa lardu na aɓəla bwanda Thlyagha Yufiretis, an akwa thlawar nga.”

¹²“Yeru akwa bara ka barkar nga sənda abbər mjir Yahudi na thlata adzə nga ka si adzə yeru ni ku təra mwari ahar Urushalima. Antə da akwa jaktə həntə bərniyir mji ngəni ɗimi na hir thlentə hangkala mdə ni. Da akwa kuri nci səla mbwa ni, har ma da abaka kuri həntari.

¹³Tsuwa yeru akwa bara ka barkar nga sənda abbər ma mdə ku jaktə həntə bərni ngəni, ka tsangkər alari katangga, da aɗi ata jaktə ntə tsəma kəra wa, wala ntə kwabar səvəi ka kari, wala kwabar ləɓəla ka kari, wala kwabar kəra laku kəra wa. Antə lakur wutə kwaba ar kuthlikur ata sə kəmtadzi.

¹⁴Yeru akwa thlenta ala gə labar ngəni kamnyar tə yeru ana ɗar su akwa kuthlikur ni, antə aɗi kalkal ala yeru, ka yeru wul mda akwa səm mdəkurər kuthli wa. Antə yeru akwa rəbuta ala ga,

¹⁵kamnyar ka mdə wul akwa kakaɗər kəkayeri ar nga. Ga ata wuta akwa kakaɗu abbər mjir di ngəni ni hir haptə hangkala mda. Təng waci bərni ngəni ana nar bwani aka kuthlyayeri kəga lardayeri na ata kəra ɗa. Tədəku mji ngəni akwa hara su na ata thlentə hangkala mda təng waci. An su na hara ma tə mdə tsi di ni.

¹⁶Antə yeru akwa pəla ala ga abbər ma mdə ku jaktə namtə di ngəni, ka hənɓəla katanggari, to ga aɗi ata jaktə mzhi hara kuthlikur ata kəra lardu na aɓəla bwanda Thlyagha Yufiretis ni wa.”

¹⁷Antə Kuthli Artashasta thlenta ala ɗa amsa apani, “Aka Rehum na olər sojayeri, ka Shimshai sakatari na ola, ka mambila pazhayeri ar giri na akwa Samariya, ka mambila giri na akwa lardu na aɓəla bwanda Thlyagha Yufiretis.

¹⁸Kakaɗu tə giri ku thlenta ala yeru ni, mdə ku karatəmta, ka ngkərɓəla ali ata bəbal.

¹⁹Apani I ku hamta tsawa, antə mdə ku wul kakaɗayeri, ka wuta abbər təng waci mjir di ngəni ana hara sur thlentə hangkala kuthlyayeri, tsuwa mjir di ni hir karidzi ka haptə hangkala mji.

²⁰Kuthlyayeri na ol'ola na ku hara kuthlikur ata kəra Urushalima, ka shanga lardayeri na aɓəla bwanda Thlyagha Yufiretis, ka dlu tsəma, ka kwabar ləɓəla wala səvəi ka kari, kəga kwabar kəra laku, akəla ɗa.

²¹Antə apani, ka gə tsawa aka mji ni ka da thləthlatə ka kəthlər ar hən ni, tar ma da ku jaktə nggatə ndəra akəli.

²²Ka gə vədzə hangkala ga aka su ngəni kula shamta saka, ta mda asə jaktə hilantə su ka sə damitə hangkala kuthli.”

²³Təkəma tə mdə karatə wasikar kuthli Artashasta aka Rehum, ka Shimshai, ka mambila pazhayeri arɗa, antə da hangkər mwari adzə mjir Yahudi ahar Urushalima ni, ka vu ɗa tə da thləthlatə ka kəthlər ni ar dwalikurari ka dunar ɗəva

²⁴Apani antə mdə ku thləthlatə ka kəthlər hən mbwar vəngkər səli aka Hyel na ahar Urushalima ni, tar akwa məva na suɗkur ar Dariyus na kuthlir Parsiya.